Obama Hrang Ralkap Bur Tampi Le Kilhimtu 1000

Obama in Asia ram Thailand ih a tlawnnak dingah US security team cun an in ding tidai khal anmahten an keng ding. Cucu tur thlak pang ding ti ṭihphannak ruangah a si. Cutawk ah President Barack Obama cu amah thluntu pawl thawn Zarhpini, 17.11.12, le Tlawngkai Nikhatni, 18.11.12, nihnih sung a um ding. Obama ih security thu ah US acozah lam ṭuanvo neitu pawl cun ahlan US president hlun George W Bush le Ramdang Secretary Hillary Clinton pawl UK an tlawng lai khalah cuti ṭhiamṭhiam in an tuahsak thu an sim. “Thailand acozah lamin Obama ra tlawng dingmi ih an timtuahawk ve dan hi, mumal neilomi a si. America hi an ra tlawng ding tinten ramdang ra tlawngtu pawl hnakin thu le hla tambik a si. White House ih kan tlawng caan ah hmuah an hnenah hivek lawmmam cun tuahsak dingin kan dil dah kel lo. Cuvek cun annih khalin thil tampi tuahsak dingin dil lo sehla a ṭha,” ti’n hmin tarlang duhlotu acozah tuanvo nei pakhat cun a phunzai.

US President Barack Obama in president ih hriltlin a sisal zo hnu a hmaisabik ramdang a tlawnnak dingah body guard 1000 hnakih tam cu amah kilhimtu dingah a hmang ding a si. Cumi sungah Thai ralkap 500 le police tampi cu Thailand a um sung amah kilhimtu ding ṭuanvo an lak bawm ve ding. Security hrangih a cipciar cu FBI (US Federal Bureau of Investigation) le CIA (Central Intelligence Agency), le Marines Corps. pawl kom-aw in ṭuanvo an la ding. Obama ih to dingmi vanzam (Air Force One aircraft) khal ralkhamnak, meithal le pukpi ih menmen ih kahsiat theihlomi thir thawn tuam a si dingih, sanman hriamhrei pawl thawn a zam ding. Cun Black Hawk helicopter khalin a thlun ding.

Ralkap bawi pawl cun National Security Centre, Counter-Terrorism Operations Centre, le Air Force’s Security Force Command, tvp. in hmakhatte ah suak lohli le zam lohli thei dingin an vanzam pawl cu ready ringring ding a si. US ihsin a rami ṭuanvo neitu pawl cun ralring cia ṭhepṭhep in an um zo. US Embassy ih hnaṭuan pawl le midang upa 20 lenglo cun an umdan ding pawl an zir cia thluh zo. Zohhliahtu, intelligent, pawl cun a hleice in Thai Khufah le Santi Maitri innpi pawl cu an zoh. Ziangahtile cutawk ahcun Obama cu a rung ding. Thuthang laktu pawl khal cutawk hmun ahcun free zetin lutkhuan an ngah lo.

Obama cun Thailand Siangpahrang khal Siriraj siizung ah, Zarhpini zaanlam nazi 3 ah, a tawng ding. Cuṭheh lawngah Government House (Parliament innpi) ah a feh ding ti’n Foreign Minister Surapong Towichukchaikul in a sim. Obama cun Thailand a suahsan hnu Tlawngkai Nikhatni ah kan ram, Myanmar, ah tlawng in President Thein Sein le Daw Awng San Suu Kyi pawl a tong ding. Cuṭheh Tlawngkai Nihnihni ah Cambodia ah a feh ding. Cutawk ahcun ASEAN (Association of Southeast Asian Nations) ih a vei 21 nak meeting pi ih a rasuaktu ASEAN hruaitu upa pawl cu a tong ding.

The Nation(nationalmaltimedia.com)

Comments

comments

One Comment

  1. ai ha!

    cu ti kel tete… tete setset in…amak si ti au law.

Comments

%d bloggers like this: