Nupa Nei Aw Thar Kapthat

January 27, 2009.
By-Khuan Lian Sum
 
Maoist Tapung Pawl In Motor Nawk Kang
 
Tih ni zanah India ram Chhatigarh ih Bastar bialah Maoist Tapung pawl’n thilri phur Motor  20 an nawkkang ih. Police pawl’n an simnakah Tapung pawlin Republic Day hmang theilo dingih tibuai an tumnak asi tiah an sim.  CPI Maoist Tapung pawlhi  minung 250 lai an siih . Dantewada Dist, ih Kiramdul khua ah an lutih. An Motor nawhkang mipawl lakah Motor tumpi ziangmaw zat a tel. Himi hnuah Petrol pump nawhkang an tumleh salih   asinan Police pawl an thlen man ruangah Tapung pawlhi hramlak rulsungah an tlanhlo thluhsal ih  anlak ah hin Nunau ziang mawzat an tel tiah Police pawlcun an sim.  Tapung pawlcun mipi pawlcu  Republic Day ih lengsuak lodingin an hro ih  Cu ruangah  mipi pawlih nun a ralmuanglo zet tiah police pawlcun an sim.
 
Nupa Nei Aw Thar Kapthat
 
India ram Punjab State ih  Amritsar ah  Nupa nei aw thar Mopa, Balkar Singh, leh Monu Ravinder Pal Kaur, cu  tihni sunah kahthat an si.  Himi tei nupa hi a nunau lam sungkhat ih remtilo cingih nei aw an si ruangah,Monu ih pa,   Kabul Singh, leh a fapa Rajbir Singh, leh an sungkhat nai pahnih   Jatinder Singh, leh  Sarmial Singh, cun  an makpa  Balkar Singh cu Bazar ih mipi hmuhlai ah an kapthat ih  an fanu, Ravinder Pal Kaur, cu a tlanih a sinan an dawiih a dunglam in an kapthat thotho.  Himi tei pahnih hi tuithla ni 1 ah khan nunau lam sungkhat lungkim nak umlo in nei aw an si ih. An neih awk ihsin an dinhmunhi a himlo nasa ih. Punjab and Haryana court ah humhim nak an rakdil rerozo ih. Court cun  Amritsar leh Tarn Police pawl hnenah himi te nupa  kilhim dingah thu a pezo nan  kilhim naklam zianghman pek a um cuanglo tiah an sim.
 
Thomas Lubanga Court Ah Hruai Ding.
 
 Congo ramih Tapung  Union of Congolese Patriots UPC pawlleh an hnuaiih ralkap ralthuam neipawl  Hruaitu hlun Thomas Lubanga cu   nauhak kumkimlo ralkap ttuanter  thubuaiah International Criminal Court (ICC) hmai ah hruai asi cing ding. Thomas Lubanga hi  kum 2005 March thla ah khan  kaih asi ih  Kum 2003 hrawngih Congo ram nasazet ih a buai laiah khan. Nauhak kum 15 hnuailam mi minung 30,000 lai ralkap a ttuamter tiah puh asiih . Hi thu ah Thomas Lubanga hin thubuai ritzet 6 a awrh dingih. A thubuai relnak ah hin thuthei fiangtu minung 34 kawh an si ding. Hi mi pawl lakah kumkimlo nauhak ralkap a rakttuan termi pawlleh a mailam pawl ziangmaw zat an tel ding.  Hi thu ah hin Thomas Lubanga cun thiamthu a relve zum asiih  miphun leh miphun karlakih buainak cu rualrem tei umter a duhthu a simdingah zum asi.  Thomas Lubanga hi Hema miphun asi ih  an miphun lakah dungthluntu neitam bik asi.  Court in thiamlo a coter asi ah cun thih nak tianghman tuarthei asi.

Comments

comments

Comments

%d bloggers like this: