NUP Party Ihsin Pu Sui Al le Chinland Today Media Suhtonnak

Pu Sui Al le Chinland Today Media Suhtonnak

  • Hmin                                        : Pu Sui Al

  • Suahnak                                   : Rallawn khua

  • Nu le Pa                                    : U San Tlung & Daw Tial Hlim

  • Unau suahpi                             : 4

  • Fate                                            : 9

  • Fimthiamnak                           : B.A, B.R.E

  • Ahlan hnatuanmi : Pengpi kaung-si, Tlawng saya, Falam peng fimzirnak zung sangtu(ATEO-Assistance Township Education Officer)

  • MP cuhtumnak : Ramkulh mee hmun No.(2) nitlaknak lam Ramkulh Hluttaw palai in

  • Party                         : National Unity Party (NUP) တိုင္းရင္းသားစည္းလံုးညီညႊတ္ေရးပါတီ(တ.စ.ည)

Pu Sui Al

Pu Sui Al

2008 daanhrampi hi mit hmuh ahcun remtul ciamco ti’n ka thei lo titu Pu Sui Al le CT Media suhtonnak

CT Media = Chinland Today Media, SA = Pu Sai Al

Thusutnak tawlreltu = Salai Lal Nun Uk

CT MEDIA: Ziangah ramkulh hluttaw mee hmun No. (2) ah MP cuh ding na hril?

SA: Ka suahnak khua cu nisuahnak lam a si nan ka khua ah inn le lo ka nei nawn lo. Ka nupi hi Baila khua mi a si ih inn (12) te an si. Cumi kha ka dinnak ah ka hmang tum. Ni suahnak ih ka din lonak san cu pehtlaihawknaknak a har. Saihmun lam, Khawdar area lam hi kannih lam ih pehtlaih theih an si lo. Ni tlaknak lam cu Rihkhaw dar tiang a si ih cycle a feh thei ruah ro.

CT MEDIA: Ram hrang hna kan tuan ding ti ahcun a thangso lonak ah tuan sawn ding khi a si sawn lo maw? Ziangah tu nang lamzin that zonak hmun na hril?

SA: Ka no lai si sehla cu khui khal khui khal a ngah. Tucu lamzin an tuah cia depdep. Ngawn ram cu a hla deuh. Keimah hi nisuahnak le nitlaknak lam thenawknak ih um ka si. Cun Zo Dihai lam pawl tla a thangso caung lo.

CT MEDIA: Ziangruangah MP na cuh tumnak san?

SA: MP hi ka interest hrimhrim. Ka nauhak te lai ihsin veng, pengpi kaung-si tivek ah ka rak tuan. A tu hi a lak in ka um ih khawte lam ka rak hal ringring. Tlawnginn tla cu Kanpalet ah tla di inn te thuam hman nei lo an si nan canphio ka pek ih cuti’n canphio tlawnginn an sak theh. 2000 kum ah Falam ka ra thleng ih cunah cun hi tawk cu thangso cia an si zo. Hramthok luan tlawng pawl ka pek theh hai.

CT MEDIA: MP pakhat ih tuanvo hi ziang an si ti’n na hmu?

SA: MP pakhat timi cu vuanzi chuk in tuanvo a pek pei ih a tuanvo pekmi parah  tha te’n tuan ka tum. Vuanzi chuk ih tuanvo pek lomi ka si khal len ka bial ka hal thotho ding. Cun an harsatnak pawl thangso ko in ka tuah ding. Thilti theinak cu ka nei lo ding nan. Vaunzi pakhat si lo cun thilti theinak a mal. Tu No Sun te pawl tla ziang hman an tuah lo, dawr an to ringring men. Kei cu cuvek ka si lo ding.

CT MEDIA: Tu hi kum (65) na ti zo si khawh, MP hung si bangta aw la khawte lam feh thei ding in ka cakvak lai ti’n na ruat aw maw?

SA: Tu tiang ahcun aamah ka khan aw ngam lai ko. Nan neta thu cu ka rel thei lo. Tu tla Hriang Hnar lam motor cycle thawn ka feh thei.

CT MEDIA: 2015 hrilawknak ah ka neh ding ti’n na zum aw maw?

SA: Ka ngah ding le ngah lo ding cu Pathian thu si. Pathian khawkhan hi rak thei cia sehla ka ding lo ding nan. Pathian remruatmi ka si pangah ka luhnak si.

CT MEDIA: Ziangah Ramkulh hluttaw cuh ding ih na hrilnak san?

SA: Pyithuh le Amyotha hluttaw hrangah cun ka rinsan aw lo. Hi pawl ahcun keimah ai a thiam deuhdeuh pawl an tam. Cu pawl ka rinsan hai. MP si le ka duh fawn tikah ramkulh te tal siseh ka tinak si. Ngah ding maw ngah lo ding ti tla theih a si hrih lo tikah in hril le ka lungawi pei ih in hril lo khal le ka riahsia lo ding.

CT MEDIA: Kawl ram ih zung sung kan hmanmi le Kawl tong si tikah Kawl tong ah nangmah le nangmah na rinsan aw maw?

SA: Kawl tong ka tong lonak kum (5) lai a si zo. Inn hman ah ka fa le pawl hi Khualsim tong lawng in ka biak theu. Cutikah ka ေလ့က်င့္ sal pei ih hmakhat te ah ka tong thei ko ding. Tu khal thiam lo ngaingai cu kan si lo nan kan tong a har.

CT MEDIA: 2010 hrilawknak lai ah nan party nan rak luh nan ziangah na rak tel ve lo?

SA: Ka tel lonak cu in duh lo. MP cuhtu ding mi (5) an um cia. Cu hnu ah nang teh na ra thei pei maw ti’n in ko cop. An rak ding cia thepthepmi va cuh cu ka duh lo. Pakhat hman kan rak ngah lonak cu Sia cu Sia pek uh an rak ti ciamco. Mee then ding le then lo ding khal mipi in an thei thiam lo.

CT MEDIA: 1990 kum hrilawknak lai ah nan party hi ralkap in NLD donak hrang a somdawlmi party a rak si. Cutikah kan dung 2010 le tui’ 2015 hrilawknak ah ralkap thawn ziangvek in nan pehpar aw?

SA: 2010 hrilawknak ihsin ralkap thawn zianghman kan pehpar aw nawn lo. Ralkap cu USDP ah an thawn zo. Party sungtel khal kan um nawn lo. A cazin sungah cun an um nan an thi maw an nung maw ti kan thei lo. 2009 sehvel ahcun minung 200 hrawng an um. Tu khal ah NLD ah an tlan, CPP ah an tlan, CNDP khal ah an tlan.

Cerhmun le Zathlir karlak lamzin phahmi

Cerhmun le Zathlir karlak lamzin phahmi zuktu/ Salai Lal Nun Uk

CT MEDIA: 2010 lai ah nan party in MP cuhtu ding minung (5) nan ding thei nan tui’ 2015 hrilawknak ding ah hmuah ziangah nangmah pakhat lawng na ding?

SA: Midang pawl cu an rim theh. Party pahnih si sehla cu kan ding ding nan. Kan president pa U Than Kim tla cu a fapa party CNDP ah a tlan. Tu cu keimah pakhat te ka ATEO sinak kha mi in in thei pam timi ring aw in ka dinnak a si.

CT MEDIA: Nan party in ziang ti’n fund nan hawl, khuitawk in sumpai nan ngah?

SA: Fund tla kan hawl lo, minung tla kan hawl lo an to men. Sign bord lawng kan party a um tinak ah kan tar men. Zungto tla zarh khat vei khat zung to ding kan tinan an to cuang lo. Tui’ kan sign bord tarnak cu hlan ih party unit zung a si ih Huat Er in thla khat ting khat in in hlang. Kum cem len sii-ti le fang tivek kan lei ih kan party sungtel minung (13) kan zem aw. Himi hi Fulltime hnatuan kan si ih khawte lam ah tla an um nan zo an si ti kan thei lo. Culak ah kei hi Kha-zeng-hmu ka si.

CT MEDIA: Chin ramkulh hi fimzirnak a niam tikah mino tam sawn cu tlawng thehsuak lo in an suak ih hnatuan fumfe nei lo in an khawsa. Cu pawl cu anmah le phu tawk ziangmi hnatuan sersak sehla a tha ding ti’n na ruat?

SA: Kan ram hi Sia a tam zet. A phaw kha zianghman ah tuah lo in an hlonlak men. Thenkhat cu Kalaymyo lamah an phur ih an zuar. Kan khua kiang ah hmun tha zet a um cutawk ah cetzung tuah thei in kedam tuahnak cetzung tivek tuah sehla cunah khal ah an lut ding. Hnatuan kutkaih nei lo cu mal te lawng an tang thlang ding ti’n ka ruat. Cet lam kai thei ding in tla zir beh vivo kan tul.

CT MEDIA: Chin ramkulh fimthiamzirnak hi ziangti’n kan khaisang tul ti’n nahmu?

SA: Hramthok tlawng cu a tawk. Saya pawl parah a thum aw. Saya pawl hi phun (9) ong tete an zirh ter ih khi pawl khi training nasa te’n pek tul. A hrekkhat cu innzuat sumhnam hmin panga in ngan an ti ih an zirmi si lo a leng ih ramsa hmin pawl an ngan len corss an pek, khikhi kan rem tul. Lailak tlawng le suakthuan tlawng hi a lak rori ih zir thei ding in kan tuah tul.

CT MEDIA: Kan dunglam kum (2) kan zoh a silen Chin ramkulh ah tlawng pakhat ah zirhtu saya pakhat pahnih te lawng neimi tlawng a rak tam zet. Hi pawl hi nangmah cozah hna na rak tuan lai thawn an dengaw si khawh zirhtu lak luh ding in ziangvek harsatnak a rak um?

SA: Cozah hrimhrim in saya a lak lut lo. Tu lawngah cozah a hung thleng aw men na, cu hlan cu zo hman nih kan ti thei lo. Tlawngta sawmthum ah saya pakhat an ret. Hitawk ahcun tlawngta panga ah saya pahnih tivek si ih Laimi cu lamzin a harsat ruangah kan lo zaangfah lam in ti. Nan duh len nan tlawng kom uh in ti. Tlawng kan kom len khua kan kom tul ding ih kan vai theh ding kan ti. Ramkulh hluttaw lole ramkulh vuanzi tivek ka ngah asi ahcun tui’ sayamah umnak inn pawl hi ka rem hrimhrim tum.

Falam khua B.E.H.S No.(1) tlawng sayamah pawl umnak inn docop in a ding. Zuktu - Salai Lal Nun Uk

Falam khua B.E.H.S No.(1) tlawng sayamah pawl umnak inn docop in a ding.
Zuktu – Salai Lal Nun Uk

CT MEDIA: Hramthok tlawng ah saya pali um tengteng ding ti’n vuakrual ih policy an tuahmi hi a tha na ti maw?

SA: Tha ka ti lo. Tlawngta zakhat tlun an umnak tlawng ahcun a lamdang ding. Tlawng pakhat ah tlawngta pali panga a umnak ahcun a dang ding. Sinan tlawng pakhat ahcun zirhtu saya pali a um tengteng cu a tul. Poi hai tawk ah ai-rawltu an um tul.

CT MEDIA: Tlawnginn ah Laica kan zir hi a tha tawk na ti maw?

SA: Tlawng caan sungah zir rori ding si. Camibuai um lomi hi a tha ko. Phun hrek in phun li tiang hi siarca lawnglawng si ih phun li tiang lawngah zirca a si. Kanmah te’n federal state kan ngah ahcun phunsang tiang zir tlak a si. Sinan tu fang ahcun phun li tiang zir ding hi a tawk ko.

CT MEDIA: Federal State va vun ti tak ah 2008 daanhrampi sung article 8 nak sungah Kawl ramhi ramdinkhawm a si ti’n an ngan ih tui’ kan ukawkdan hi ramdinkhawm federal ukawkdan in in fehpi ti’n na hmu maw?

SA: A leng ih a phaw le a heng ah cun federal state a si. Nan mithmuh ah cun unitary a si. Sinan unitary a si ti lawng in tla ngah lo. တစ္ဝက္တစ္ပ်က္ ျပည္ေထာင္စု a si. Unitary kan si nak cu ba-ho lawnglawng in a kai. Ramdinkhawm si sehla cu ba-ho in a kaihmi a mal deuh ding. Ramdinkhawm a sinak cu hmunkhat te ah lai an rel khawm. Unitary a sinak cu kan duhmi kan ti thei lo.

CT MEDIA: Tulai fang Chin ramkulh cozah hi na di riam maw?

SA: Hlan ih kan umdan hnak ai cun ka diriam ko. Hlan ih kan umdan cu ka diriam hrimhrim lo. Keimah tla hi ATEO ka si nan farah ih ka umnak hi. Ramdang LDC hman kan bang lo. Tucu ting hnih in an thok thei. Thilri man pawl tla ramkulh in a control thei lo. Ramdang vek in cozah in thilri a phur pei ih Yangon thilri man le Falam thilri man a bangawk dingmi si. Cu lo dang ramkulh cozah thu fumfe in ka thei lo. Thilri man a kai cu ka lungkim lo.

CT MEDIA: 2008 daanhrampi hi a tha tawk na ti maw? Ziangmi pawl rem tul ti’n nahmu?

SA: Mit hmuh ciamco ahcun remtul ti’n ka thei lo. Sinan fimthiamzirnak lam le thilri man thu lam cu rem tul ti’n ka hmu. A dang cu tuan ih tuan hrih lo mi cu zianghman ka ruat lemlo. President tiangtiang hung tuan dingah cun ralkap a lut cai tengteng cu a tul lo sinan ralkah lam theihthiamnak a neih a tul ko lo pei maw.

CT MEDIA: Chinmi pawl hi ramdang ah hlawhfa in simaw, hnatuan sang tuan in si maw, thiamsang in si maw an va um ih hibang pawl ra tlung hai sehla Chin ramkulh hi ready a si hrih maw?

SA: Ready a si ko lo pei cu. An ra tlun len anmah le thiamnak zawnah thlahlawh kan pek thei len cozah hnatuan an lut pei. Kan policy cun a pek hrih lo. Kan rem tulmi cu ramdang ra lut pawl kha bikhiah lo te’n. Cun hi tawk ahcun permanent cun an um paih zik lo. An va kir sal thotho ding. A lang te lawng an ra paih ding.

CT MEDIA: Chin ram harsat ruangah siseh, thuhla a phunphun ruangih ramleng feh in ramdangmi an si ruangah maw, sakhua ruangah maw, hnuaihnung hnatuan an si ruangah namneh a tongtu pawl hrang ziangvek in thla kung zonnak awkam na fah duh?

SA: Ramdang a va fehtu pawl hmuahhmuah milai covo ngah hai sehla cu, tucu milai covo an sungral sisi. Kawl ram ihsin a fehtu pawl hrang a hrante’n milai covo tuah sak hai sehla. MP hung si bang ta sehla thu cu kan bur rero ko ding nan a hlensuaktu ding cu rampi cozah a si tikah anmah thuthu si thotho.

CT MEDIA: MP pakhat hrangah thuhla theih ringring hi a thupi tikah computer, E.mail, facebook tivek pawl na hmang thiam maw?

SA: Keimah cun ka hmang thiam lo. Ka kum tla upa thlang ih a zir tla ka harsat. Sinan ka fa le pawl in an thiam ih cu pawl cu ka rinsan hai.

CT MEDIA: Lailun lungkua kiangih lungto an lak thu thawn pehpar aw in ziang ti’n na hmu?

SA: Zapi hlawknak hrangah a lak mi sisehla cu a zia um deuh lai. Tucu bulpak hlawknak a si tikah a mawi lo zet ti’n ka hmu.

Comments

comments

Comments

%d bloggers like this: