Nunui’ Kut

kut
Kei khal hnat’uan ve thlang dingin Company pakhat ah hnat’uan dil nak ca ka rak thun ve. Company ih director pa cun ka hnat’uan dil nak ca cu a zoh ih a lungkim zet. Fimzirnak lam ah hlawhtling le thiam hleice ka si kha a hmu.

Hmai ton thusuhnk in nei ih Director pa cun
“A dangah hnat’uan na dil dah lo maw si”
“Aw… ka dil dah lo . Tu hi veikhatnak a si”
“Cucu na tlawngkai nak ah na pa cu paisa a cem tam tak ding ka zum”
“Si lo, ka pa cun ka nauhak lai te’n in thih san ih ka tlawngkai nak hrangih t’ul mi hmuahhmuah cu ka nu in in tawlrel sak thluh”
“Cu ti si le cu, na nu cu ziang mi hna a t’uan”
keimah zoh lem lo in thu in sut ih thunuam rel phah vekin in biak rero.
“Ka nu cu a umum a t’uan. Mi dang thilsop, Lothlawh le a t’uan thei mi thil tinkim a t’uan”

Ka nui’ hnat’uan mi ka sim cu director pa in in zoh lohli ih
“Na kut in zoh ter thei pei maw?” in ti . Kei khal cun zamrang in ka kut cu a hmaiah ka suah lohli. Ka kut a zoh thul keimah in zoh thul ti’n a um rero. Thu pakhatkhat cu ruat rero a bang .
” Um… Na nui’ thilsop na bawm dah maw?”
“Bawm dah lo. Ka nu cun ca lawng in zoh ter. Ziang hman in t’uan ter dah lo. Cun kei hnakin ka nu cu thilsop a rang rang sawn ih” ka si nak pawl cu dik zet in a zat’en ka sim t’heh. Director cun thu ruat phah in in zoh ih
” Cu ti si le tui’ zaan inn na tlun ve te’n na nui’ kut na kholh sak thei pei maw. Cun thaisun ah kan tongawk sal ding” in ti hnu ah in suak ter.

Hnatuan ka ngah nak dingah ka nui’ kut kholh sak ding cu a va har lo ve ti phah in lungawi takin inn ah cun ka tlung. Inn ka thlen cu zaanlam rawlsuan cu hrawng a si. Ka nu cun “ka fa, ziang na bang na hnat’uan dil cu” ti phah in Ka nu cun mithmai pan te’n in hmuak. Ziang dang biak lo in ” Ka nu, zangfah te’n na kut ka lo kholh sak pei” . Ka nu cun mangbang takin in zoh ih a mithmai ah lungawi nak sim thiam lo a um ti cu theih awk fahran in a lang .

Ka nui’ kut cu tidai’ ka toih ih fiang takin ka zoh. Nuam tete’n ka nui’ kut cu ka zut phah rero ih ka mitthli cu tikhuat sungah an for phah rero. Ka nui’ kut cu lo a thlawh nak ah an durh, an kuar, an khing t’heh cu cingin thil a sop nak ah a thip daan ding cu ka zoh men hin ka theithiam. Hmasi khal tampi an um. Ka nui’ kut ka zoh cu ka taksa le ka sunglam tiangin i hngawr thluh thei.

Cui’ kut cun tlawng ka kai nakih a t’ul mi le ka ni ti’n rawlei mi pawl. Rualpi lakah ningzak lo dingin , ka hmailam hrang , nuam takin ka um thei nak ding hrangah ti’n a pek mi kut kha a si. Cui’ zaan cu ka nui’ thilsop ding pawl ka sop t’heh ih zaan var duhdawt lainatnak mithmai thawn kan nufa te’n…

A thai sun cu Director room ah ka lut ih tohkham ih in to ter hnu ah ” Mi zaan cu ziang na tuah, ziang mi na zir ngah ti in sim thei pei maw?”
Ziang hman sim thei cih lo in ka mitthli tlak lo dingin ka kham rero malte a rei hnu ah
“Director, a tu cun ziang mi kha a thupi ih ziangvek minung pawl t’ihzah upat ding ti tla ka theithiam zo. Ka nu um lo seh la kei khal ka um lo ding . Thil pakhat hlawhtling dingah ziang tluk harsatnak tuar a t’ul ti tla ka theithiam zo. Duhdawtnak tla ka nui’ kut ka kholh phah in ka theithiam zo ih inn sungsang hi ziang tluk a thupi ti tla ka hmufiang . Hi pawl hmuahhmuah hi nangmah ruangah an si . Ka lungawi”

Ka t’ong mi pawl in ngaisak hnu ah fiang takin in zoh ih ” Cu vek thinlung put nei minung hi ka duh mi a si, kan company khalih a t’ul mi a si tu ih sin hih company ah hnat’uan tu pakhat na si zo. Mi dang harsatnak theithiam ih mi harsa bawm duh nak thinlung put neitu . Paisa hi minung pawl kan nunnak bulhram bik asilo ti a theifiangtu . Cuvek minung rinsantlak thawn hnat’uan tlang dingin ” in ti hnu ah ka kut in kai ih ” Va tlung awla na nu hnen ah lungawi thu va sim aw” . Director pai’ hnen ah lungawi thu ka sim hnu ah zamrang takin inn lam ah cun ka tlung.

Inn ka thlen vete’n “Nunu, nunu ” ti’n ka ko. Ka nu cun mithmai pan te’n ka fa na ra tlung thlang maw ” ti phah in in ra hmuak.
“Nunu, nangmah hi ka ziangkim na si. Ka lungawi tuk maw nunu ” ti phah in ka nui’ kut cu ka kai ih ka nu cun in pom .Cu ti’n kan nufa te’n…

# The Real Dingapore ih Mother’s Hands Story ta zoht’him phah in ngan mi a si.

Salai Phenthlam

Comments

comments

Comments

%d bloggers like this: