Nunu timi Mikhual

12439557_1016491378408146_5852364542957131168_n

Šianglianuk Ķianghrol

Hnattuannak ih ka um lai ah ka ni (ka pasal ih nu) hnen ihsin telephone a ra lut. “Inn ah mikhual kan nei ih, inn ah suncaw na ra zawh thei pei maw?” tiah in sut.

Hnattuan tam laifang a si ruangah hnattuan tansan ding a ol lo, mikhual rawl do lo cun inntek ttuanvo neh lo si ding ka phang lala fawn. Curuangah ka ni cu rawl dawr ah rawl rak cah ih in rak hngak ding in ka sim ih, suncaw ei a cut vete’n ka rat vurvo ding thu khal ka sim.

Telephone ka thlak hnu rei lo te ah a ra awn lala. Ka ni cun, “Kan mikhual in inn ah a remcan dandan ih ei a ngah tuk ko. Na hnattuan a tam tuk ahcun ra tlun lo khal ah a ngah a ti,” tiah i rak sim.

A rem dandan ih ei men ding cun a ngah lo ding.

Asinan ka ni in kan mikhual ih hmin a run sal vete’n ka thin a hahdam sualso. Kan mikhual cu Nunu a rak si. Cuti a si ahcun va sawngbawl hran ciamco khal a ttul nawn lo. A rem dandan ih um a ngah ko si.

Cutin cumi ni ih suncaw cu ka ni le ka nu lawng an rak ei tlang. Rawl hmeh khal zaran te men an si. Kei cu ka hnattuanpi thawn kan ei tlang.

Siimlam hnattuan ban hnu ih inn ka thlen tikah Nunu cu a rak tlung zo. Nunu ih in rak sum mi thilripawl cu mileng pindan ah tampi an um liailiai. Ei theih le hruh theih a phunphun an si.

Cumi thilripawl zoh in kan inn ih Nunu in a ei mi suncaw famkim lo zet ka vun mangsuak ih ka thin a nuam lo.

Cumi thuhla ka rualnu pakhat ka sim tikah ka rualnu ih hlanlai thuhla ka va tokthai ngah pang.

Ka rualnu cu innsang hnattuan paihlotu a si. Inn ih a um ahcun amai tidai innak ding no hman lak paihlotu a si. Asinan an inn ih mikhual an um ahcun a linglet ah a cang. Mikhual hrangah tisa a tuahsak, ei-in a tuahsak ih mikhual in ‘a ttul lo’ an ti hman ah inntek ttuanvo cu fel zet ih ttuantu ah a cang. Mai’ inn ih ra tlawngtu mikhual kan zoh tthat lo ahcun lehhnu ah an ra tlawng duh nawn lo ding tiah a ruat.

Mikhual an tlun tikah mileng pindan phiat, zial rawt, tisa no khawlh le ret pawl cu paih lo cingte’n a ttuan. Mikhual a dar tthat ruangih mikhual an lung a awi cun anih khal a thindi a riam ve.

Vei khat cu a Nunu a ra tlawng. A nu inn sungih a lut vete’n inn sung ih bun mi kedam a bunter. A nu cu thingthei a rak do nan mileng pindan a borhbah a phan thu ralrinnak a pe leuhleuh.

“Nunu, ralringte’n maw. A ti pawl zial parih an bung cun a borhbah ding.”

Rawl ei can khal ah rawlfang fuanter lo ding in, cabuai parih tihang forter lo ding in cop le cop ah a sim.

Cumi tuah hlah, khatin ei hlah ti ih ralrinnak a pek leuhleuh ruangah a nu cu a fanu ih inn rori si cing in a um a nuam lo. An inn zial a balhlonak ding le a hnoklonak ding ah rei khal cam lo in a tlung sal.

A nu a tlun hnu ah amah kel ih thiangfai verver mi an inn a zoh ih a fanu cu amah le mah a mawhthluk aw.

Ka rualnu nel um pakhat khal in a thuhla in sim. Inn ih mikhual an neih tikah, ziangtluk in a hnattuan a tam khalle, a hnattuan cawlh san in mikhual a kom, hmun tinkim ah a lenpi, ei-in a do. Mikhual zoh tthalotu si a phang.

Cumi ka rualnu cu nel a um ruangah rualpi le ngainatu a ngah zet. A hnenih ra tlawngtu pohpoh cu phunzai lo te’n hmun dangdang ah a lenpi ih, tthate’n a mikhual hai.

Vei khat cu a hnenah a Nunu a ra tlawng. Vanduai thlak zet in, cumi ni cu a hnattuan a rak tam tuk.

A nu khal in, “Cawlh la aw hlah. Hnattuan a thupi. Ka kum a upa zo ih a leng vahsuah khal ka paih lo. Hnattuannak ihsi na ra tlun hnu ah kan titi tlang cun a tawk zo,” a ti.

A hnenih a nu zarh khat pum a um sungah khuitawk hman ah a lenpi lo. Khawpi sungih hmun mawi pawl ah a fehpi lo. A nui’ hrangah a ttul lo ding tiah a ruat.

Inn ih a nu a tlun hnu, an innlam a hei phone tikah a naupa in, “Khuitawk hmunpawl Nunu na rak fanpi? Nunu in, tui ttum ka fanu hnen ka tlawn ahcun hmun tinkim ih thlirmual pawl ka va zoh thluh ding, a ti sokhaw” tiah a rak sim.

A naupa ih ttong a theih cun a mitthli an for kohko.

Nupawl ih an feh duhnakbik le an um duhnakbik cu fanupawl ih inn a si ka zum. Cutawk hmun ah ngainatawknak thlumbik le hlumbik, sihcihawknak hriphang pawl an um ruangah a si. Innteknu a si mi fanupawl cun inn ih ra thlengtu mikhualpawl cu an tlintawk ih tuamhlawm ttha ding in an zuam. Mikhualpawl ih umtlandan an hahdamter. An aipuangter. An ngaihsak.

Asinan Nunu timi mikhual a ra thlen tikah, thin nuam le aipuang ih umter ding, hahdamtei’ umter ding, ngaihsak ding, tivek in vei khat hman kan rak ruat dah lo. Nupawl khal in anmah le anmah kha mikhual ah an ret aw lo ih, rak mikhual tthat lo can khal ah anmahtei’ thinharnak tuar in, inntek kha an hnoksak duh lo.

Fanu ih inn ah Nunu hi mikhual dang hnakih thinlung dik, ruahnak dik neitu a si. Asinan mikhual dang tluk in ngaihsak a hlawh lo. Cumipawl ka vun ruat tikah ka mitthlipawl cu kham theih lo in ka biang parah an rung luang.

Ngantu: Tang Yuan Lin
Lehnak: Nine Nine Sanay in Kawl ttong ih a leh mi ihsin.

(Visited 280 times, 5 visits today)

Comments

comments

Comments

%d bloggers like this: