Nunthuleng Lalnu Ih Tlawn Ram Thlirsalnak

CT        : Singapore le Malaysia na tlawnnak lamzin tluanah harsatnak na rak ton mi a um pang maw?

MSHP  : Cuti  harsatnak rel ding ciamco cu ka rak tong lo hokhaw. Yangon ihsin Singapore, Singapore ihsin Malaysia fehnak ah A Thawng tei arrangement hi a fel thuptho tukih ka tluang zet.  A zaten Pathian lamhruainak lawnglawng a si.

CT        : Malaysia le Singapore na fehnak san or tumtah mi?
MSHP  : Chin refugee pawlih dinhmun nunthuleng ngan ding a si bik.

CT        :’Thang Sung Va’ nunthuleng sungih tel mi hmun le hma pawl teh na va zohsal thei maw?

MSHP  : Aw, ka va zoh nasa. Ahleicein Biakinn pawl, Chin food dawr, Bukit Bintang, Alore, Imbi Plaza, Segambut tipawl kha ka va zuk ciamco. Hmu lopi ih ka rak ngan mi, a takih ka vun hmu cu a manhlatdan a dang ngaingai.

CT        : ‘Thang Sung Va’ ih actor ‘Uk Lian’ kha a ngaingaiah a um an ti vek? Cumi teh  na va tong maw?

MSHP  : Haaa.. sorry bak si! Ka actor pai hmin, a umnak hmun le a thuanthu tlangpi pawl a rak bangawk  ngelcel ruangah Segambut ih Uk Lian hnenah ngaidam ka dil. Ti pang mi a si. Amah tla Segambut ka tlawn laiah ka va tong ih ngaidam ka va dil ta. An nupa in hni siamsiten in rak biak hnu lawngah ka thawpi ka suah thei lai!

FCC Calai Committe pawl thawn

CT        : Malaysia ih refugee pawl dinhmun na hmuh dan?

MSHP  : Lukhawng nei lo (manmual nei lo) in an um. Kaihkhih tong ringring thei dinhmunih an um tikah mi hrekkhat cu tihnak (fear) in an khat. Milai le milai tihzahawktonnak tel riai loih zoh an tuar ruangah an identity an hloh; confidence an nei thei nawn lo. Asinan cumipawl in Pathian a naihter ih ram le miphun duhdawtnak khal a pungter! Cumi cu a tlangpithuih ka hmuhdan a si. Rel tam le thin a na..!!

CT        : Na Facebook ihsin mi tampi na va interview ngah ti kan thei. Cumi lakih na thinlung lo labik mi tongkampawl in hlawm aw.

MSHP  : Falammi si lo pakhat in, “Nannih Falampawl cu nan thangso thei dah lo ding. Ziangahtile Team Work hnatuandan nan thiam lo. Cule pawlkom din tivek tla nan paih tuk; ziktluakin le nan tuan paih taktak fawn lo. Dintu hmin put le sinak neih duh men fangih din nan hmang,” in ti!

Cule Dr. Yoong (Director, Crisis Relief Services & Training) in, “Chinram thansohnak hrangah tuanvo a neibiktu cu nanmah Chinmi nan si. Midang zohman nan rinsan thei lo ding,” tin in ti.

FCF pastors, FPM/FRO hruaitupawl le rualpipawl thawn

Cun, Salai Kawl Hre ih tongkam tla ka cing ringring, “Kannih cu ramdang kan rat zik ihsin hna picang ra tuan dingin kan ra lo. Curuangah ramdang kan thlen tik khalah kan rak tumtah cia mi kha kan ra tuan a si ko,” a ti.

CT       : Kan ram le ramdang dinhmun na khaikhin dan tlangpi?

MSHP : Singapore ah si seh, Malaysia khalah si seh, rammipawl in an ram kha ta neih in an neih theh. Kannih cu kan ram ah mikhual bangin kan um! Inn nei ve lo kan bang!

CT        : Kan miphun kan thansoh theinak dingah ziang kan tulbik tin na hmu?

MSHP  : Rinsantlak sinak. Pakhat le pakhat kan rinsanawk thei lo sungah cun thil thupi tuahsuak ding hi a har zet ding tin ka ruat. Curuangah bulpak ciarin rinsantlak minung si zuam ding; cutheh le midang rinsandan tla zir ding. Building Trust kan poimawhbik tin ka hmu.

CT        : Ram leng um mipi hnenih theihter na duh mi tete..?

MSHP  : Ka rak theih zatah, ram thumnak thleng zopawl lakih a tamsawn in an rak zawh mi lilawn kha an hngilh; dunglet hoisal an mal tuk. An rak pal mi karbak kha a ra lai ding mipawl zawn ruat in run rem ngil hai sehla..

Cule ram hnihnak (Malay) ih um laipawl hnenah cun hihi ka cah duh: Malay hi refugee pawl hrangah ‘Transit’ a si an ti. Hitawkih um sungah hrekkhat cun an nun thansohnak hrangah thei tawp an suah nan hrekkhat cun, “Ram thumnak ka thlen hnu lawngah tan ka la mai ding” tin luala in an um. Cupawl kha ram hnihnak ahhin rak tat hriamaw cia hai sehla ka duhsak. Ziangahtile ram hnihnak ih rak tathriamaw ciapawl cu ram thumnak an va thlen tikah hman theih dinhmunah an va ding cih tin ka rak thei.

CT        :  Nangmah bulpak hrangih ruahnak thar le duh dan thar lo neihtertu hmuhton mi?

MSHP  : Chinram ah ramdang mipawl ra hlawhaw ve celcel hai sehla..

CT        :  Calai lamah teh hlawmawknak na va neihpi thei maw?

MSHP  : Aw, FCC Calai Committee pawl thawn calai thuhla titinak kan rak nei. Himi program tawlreltu Rev. D. Hrang Peng Ling hnenah ahleicein lungawi thu ka sim duh. Amah vek mi cawisan thiam, thazang pek thiam le mi sunsak thiam ka rak tong ngah hi ka lungawi tuk. Zanriah ropi zet in kilpi mi par khalah FCC hnenah lungawi thu ka sim. Anmai zarah calai hrangah zuam sinsin duhnak thinlung ka neih phah. Ka lungawi ngaingai.

CT        :  Zovek pawl si na va ton (interview) tlangpi?

MSHP  : A cang theibik in dinhmun kim tei ton ka rak zuam. . general workers khal ka tong, UN hnatuan, FPM/FRO, CRC le CDAC vek community hruaitupawl khal ka tong thotho. Can pe ih thuhla in hlawmtu zate parah ka lungawi tuk lawmmam.

CT        Malay mipipawl in teh na beisei tlukin an rak lo cangcawi hai maw? Nangmai lamih harsatnak teh?

MSHP  : Ka rak beiseinak hnakih tamin in rak cangcawi ih ka lungawi tuk. Annih cu hnatuan nei an si tlangpi thluh tikah duh vekin can awl hi an nei thei lo. Cuticing cun an man remcang can te    ah kan tongaw theu. A cancan le ka hnenih an ra riah tawk, a cancan le keimah in ka va riah hnawh tawk.. haaa. Ka harsatnak maw? Zan tampi mi interview in ka mengsuak; vei tampi rawl ka ngawl. Ka thluak le thahri pawl tla an hit memmem thluh vekin ka theiaw. Ka khualtlawn ni 31 sungah pound 8 ka tla man.. haaa..

CT        :  Tui research na tuah mi nunthuleng hi a siar kan hngakhlap tuk. Ziangtikah na ngan thok thei ding?

MSHP  : A rei lai ding ka zum. Thu ka thei tam deuhdeuh, ka duhham deuhdeuh. Ram hnihnak thuhla lawng siloin ram thumnak thuhla tiang telh thei sehla tiah saduh ka that. Curuangah nunthuleng ka ngansuah thei ding can cu a rei lai men ding.

CT        :  Tlangval tuak taktak tla na va tawng ding sikhawh, na mit lo la deuh teh na hmu maw?

MSHP  : Hey.. thungai thu rel laiah cu lamlam! CT pawl nan luar deuh.

(Visited 102 times, 1 visits today)

Comments

comments

14 Comments

  1. Zodai Zilthli says:

    Ram le miphun duhdawttu le ziangkim ih kan rinsanmi U Parte, na tlawnnak thuhla, na cangvaihnak na sulhnu le na lungput pawl ka hmuh in, ka lo upat tuk. Zoht’him tlak na sinak pawl kilhim zelin, kan ram le miphun hrangah Pathian in lo cawisang sinsin hramseh.

  2. Anka thiam Bezai lalnu a sun mang leh a ttuanrah Bawmpi thawn a phurhnak ding hrang duhdaknak kan hlan a si.

  3. Hello Mai Sawi Hlei Par

    Nunthulengah kan hma in hruai vivo hram dingin PT in ruahnak tha le Cangan thiamnak thlawsuah na parah lo vur in MIPI In lo cawisang vivo hramseh,,…

    Na UNAU
    Salai MUPI

  4. CT : Ram leng um mipi hnenih theihter na duh mi tete..?

    MSHP : Ka rak theih zatah, ram thumnak thleng zopawl lakih a tamsawn in an rak zawh mi lilawn kha an hngilh; dunglet hoisal an mal tuk. An rak pal mi karbak kha a ra lai ding mipawl zawn ruat in run rem ngil hai sehla..

    Atlun ih rem ngil ter a duhmi hi ziang si pei.
    A dang cu siar manhlah roh.
    Ramhnuai buuk pawl tla tu ahcun a um nawn lo ih, buuk ihsin ramhnuai taktak ih tlanlun ciamco khal a um nawn lo ding ka zum.

  5. Mai Zilthli Lal Nei Thluai says:

    U Par, Bawipa’n lam a lo hruai zo bang in lam.lo hruai sin vivo hramseh. Na canganmi ihsin mi tampi’n hlawknak kan ngah. Cangantu ding hrimhrim ih Pathian ih ruahmani na rak si ko ee. Na canganmi le na zuam man, na bang man hi mipi in kan sawr in kan hlawkpi cio nasa ho khaw.

    with love
    Mai Zilthli LNT

  6. SHP, Malaysia umdan mallai na rel mi hmanah siar a nuam man men si maw?
    Na hmu dik pam, na rel dik pam ko ih na nunthuleng cu a siar nuam leh nasa ding.
    Ram thum nak thuhla ngan telh cih na duh ih a tha, kan um nak lam ra thleng thei tum aw la tam pi ka lo sim ve thei ding. Nang vekin cangan thiam si sehla ka hmuh ton zo mi pawl hi ngan ding a tam tuk ih na pamhmai ve men ding.
    I ra ngan sak aw… he he he…. ( Van member )

  7. Mamang,

    Mai Sokhlei Par ring rero tul lo in ngan ve mai awla.
    Na canganmi siar nuam tuk ve si. Na theihhngilh aw mawsi?

  8. Hi interview cu siar a manhla nasa, Chinram le calai duhdawt tu, chinmi pawl-ih harnak pawl tla a tak i hmuh duhnak thinlung nei i a tlawngsuak i interview tivek nei i a um hi a ropi ka ti bulpak takin ka upat nasa.

    To Dear Mai Soklei Par

    Ram thumnak na ti mi ziang ram ha si ding, theih a va cak um ve

  9. Mai Sokhlei Par says:

    @ Zodai Zilthli, James Pek, Salai Mupi le Mai Zithli Lal Nei Thluai,

    Comment nan ngan mi ka rak siar; ka lungawi tuk. Duhsaknak in hlan mi parah siseh, a thazawngih in hmuhnak parah siseh, ka lungawi ngaingai. Thazang thar tampi ka rak ngah.

    @ Thomas Pathuam,

    “Lilawn le karbak” ti mi tongfang ka rak hmannak san cu, mi pakhat le pakhat hi an rak zawh/pal mi an bangaw cio lo: khua, kawhhran le sungkhat/unau/rualpi a si thei vekin, puaisa le agent khal a si thei (Puaisa le agent pawlih sumpai thawn Malay an rak thleng nan leiba samsal duh nawn lo tivek).

    Cun Malay ih FRO khal a si thei hrih thotho.
    Ziangahtile FRO paltlangih ram thumnak feh an si tlangpi. Ka theih zatah FRO hrangah ti ih rak zohsaltu ram thumnak thleng zopawl hi an mal zet (an um lo lawlaw hman a si thei.!.!). FRO khi, kan theih cio vekin, Malay thleng Falammipawl in kan rinsanbik mi umsun a si. UN apply-nak hrangah lawng siloin, kan misapawl kaihkhih le thubuai phunkim kan ton mi ah in tawlrelsaktubik a si. Curuangah FRO a cak a tul.

    Miphun dangpawl cun ram thumnak ihsin an rak zawh mi lilawn an run tuah tha, an rak pal mi karbak an rem tha. Curuangah mi tampin olsam deuh in an run zawh vivo thei. Kannih tla cuvek si thei ve sehla tiah ka ti mi a si.

    Ziangkhal asile, mai rak zawh mi lilawn/karbak cu mah in a theiawbik ko ding.

    Aww.. ram hnuai buuk tivek kha cu a um nawn lo hokhaw:-)
    Hlanlai hnak cun tu cu an ziaum deuh thlang ngaingai.

    @ Ma Mang (Van Member),

    Nangmah cu ka lo thei lo nan na ca pahnih-khat cu mekazin hlunah ka rak hmu phahphah.
    Christina ih rel vekin nangmah tla cangan thiam pakhat na si ih, nangmah in ngan awla a thasawn ding nan si..
    Sinan na ngan huam lo asile cu.. hee.. na theih mi zaten in sim tengteng aw tiah ka lo ngen:-)
    Zangfahten chinlandrose@gmail.com; Facebook: Mai Sokhlei Par ah in rak contact hram aw. Khavek thu kha ka theih tul tuk mi thuhla a si.

    @ Andrew,

    Comment in rak pek mi parah ka lungawi ngaingai.
    ‘Ram thumnak’ ka ti mi cu Chin refugee-pawl an feh tlangpinak ram a si mi: USA, Australia, Norway le Denmark tvp kha ka sim duh mi a si.
    Mah rori va tlawn thei cu saduhthat a si, cumi a cang thei lo asile online talin theih bet ka zuam tum.
    Thla ka cam rero.
    Lungawi.

  10. Dear Mai Sokhlei Par,

    Maymyo lam in kan lo ngaizet.
    Thil in rak suum maw?

  11. Mai SHP,

    Um! na timi a dik lawlaw.
    Kan lilawn zawh dammi cio kan theihhngilh lo kei uh.
    Amahlawngte kan zawhmi cio a bangaw lo kha aw.

    Malte lo sim duhmi ka nei ve…Tulai Malaysia laimi dinhmun cu a nuamtuk zo ah kei tla cun ka ruat. Hlanlai ahmaw..

    Kan rualpi inn le buk ih a thi tivek an um le maw, palik hmuh dingah kan va ret ih palik in an rak la maw la lo titla ka zoh ringring. Cumi hnu ah sizungah kan hawl sal. Thlamual ah ruak kan vui khal le kan tlunlam ah palik in kaih dingin in bawh. Harpam….

  12. Nunthuleng lalnu Parte,
    Na tluangtlawnnak CT ih tonsuhnak an lo neih mi ka rak siar ih thil hi hmu ve ciocio, thei ve ciocio khalah calai mit ih thlirtu, a hleicein Nunthuleng mit ih thlirtu ih thlir dan hi a fumfe in a felfai cuang a si hi tiah na thu thiamzia, na thlua fimte na hman tangkai thiamzia le na hmuh le na theih mi calai ih na canter thiamzia ka hmuh hin Pathian in kan calai le kan nunthuleng phosuaktu, pucawitu le cawimawitu dingah a rak lo khaukhih a si hi ka ti ih ka lung a awi zet.

    A luan cia mi ih na tuar mi harsatnak pawl cu na nun lamhruaitu le na thazang laknak, Pathian hmelmawi na hmuhnak le kan ram le miphun hrangih tankhawhnak lo petu ah cang vivo hram seh.

  13. Salai Vanruah says:

    Tam ka rel lo ding…
    Mai Sokhlei Par vek pahnih um lo… si ko!

  14. Pi Nunthuleng…

    Na kutzungpawl kha mi meimei kutzung vek a sive ko nain tiaw…? Chin calai hrang tathriam in Vai namsau bang hmual nei zetin hmang vivo hram tiah…

    Dam le tluang tein,
    Salai DL Senling
    &&&&&&&&&&&&
    http://www.ccyinews.blogspot.com
    MIPI RIAN LOIN PATHIAN KAN RIAN THEILO

Comments

%d bloggers like this: