Nunsung Singlawm Thih ah Kung Tlung

Nunsung Singlawm Thih ah Kung Tlung

Zuun Hlei Thang

‘Fuan ding ciocio mai’ zal sungih fuan cu a zia’ timi tongthim a rak um. Kan Laimi hin kan pawh lo nasa lai in a lang. Mi cu mah le mah duhsakawknak cang an thiamih an mi si khal nuam an ti. Kannih teh Laimi si teh thil nuam maw zonzaihthlak lehlam? Mah le mah duhsakawk hi midang huat le dodal a si loih, tlaitluangtei’ unau thinlung ken khi a si sawn. Ka u le ka nau ka duhsak le ka don ruangah miin in hua a si ahcun in huatu cu a hawizawnglo sawn tinak. Miin an unau le vuavang an duhsak tik khalah kan hua lo pei.

Kan rualpa pakhatih relmi hi ka thinlungah a caam ringring lai. An hnam puaipi an tuah zikih zulvo an tukaw cio. Anih kha rinsanmi tiah thawngsawmnga an tuk. “Nang hi kan lo rinsan ih, kan phunhnam hrang na rak tan loah,” tiah an va khonih a rak pe. Kanmai’ phunhnam hrang a siih in rinsan cu ka lungawi. Kan tan loah zosi ra tang cuang ding ti’n tlawmngai a rak suah. A thaitip hrawngah Kalay ah ka rualpa cu a vung leng. Sum ra khontu pawlkom hminin sunlawihnak capi tam hnenhnen an rak tuahter mi a va hmu. An tuahternak dawr cu hnam dang pi an si. Annih khal a rak hminsin ve ih, a sumthawhmi voucher an ra pek zawngah a rak rai nek ta. “Theitawp suahin neihsin lote kan rak thawh ve vialvo hai. Sunlawihnak capi tuahnak le thildang dang ah nan hmangih a tha tuk. Sinan, hnamdang pi hnenah nan va tuah ka hmu. Ziangah kan hnampipawlin khavek tuahnak dawr kan ong ve hnuaihni si, midang ruaro hnenih nan va tuah. Sumpai khon le tawhtu ah cun in mang nan, duhsakawk a cut taktak cun mah le mah nan ti nawn lo. Rak tang uh, hnakum puai tuah tik ding cu khami hnamdang tei’ kha va khon thlang au. Ziangzat tak rak lo pe hai kei maw?” tiah a rak rit neknek hai.

Thil terek lei ihsi thokin thupi hlapi tiangah ‘kanmah’ ti hna kan thiam ve thlang lawmmam kei uh. Kan phun pi hnen ihsi’ thil ngah ding beisei vial si loin bomawk ton thinlung kan put thiam a cu ve thlang lo maw? Kan thiam hlansung cu thildang ah tang tengteng khal nungna Laimi si a manhla hrih lo ding. Tahan khawsung ih kan rinsan zetmi kan rualpa pakhat hin suntuahnak hna pakhat a tuah. (A hna cu rellang a nuam ka ti ciah loih pehhelin ka rel hrih men ding.) Kan lammi tamzet cun a dawr hna an thiam lo. Midang hnenah an tlan sawn. Tan rak na zettu pakhat cun a mawhthluk hai tikah, “Kan va dawr   ve nan si, a voikhatnak ah kan tluang loih..” tiah a pakhatin a rak sim. “Sile cumi hnu voiziat na dawr sal?” tiah a sut bet. “Aa.. kan tluang lo tikah, ka dawr nawn lo,” a ti. “Sile, tuih na dawr lainak tei’ teh tum tinte nan tluang cuang maw? Lamlam, hnatuan umtudan hrimhrim a si kha,” tiah a kawk deuh nawn ta.

Ngaingai cun mah le mah kan duhsakawk ve khal hi beisei kan nei cia ih, midang hnakih uak le hlawk deuhih in rak ti kan beisei cih. Kan beisei vek a rak si lo cun, ‘mah le mah tiin kan va dawr ve ih ziangtinak khal a si cuang lo’ kan ti cih. Cucu tha kan va pe ngaingai si loin phutmi kan nei cia sawn a rak si. Mah le mah cu, siat caan le that caan, tluan caan le tluan lo caan, hlawk deuh caan le thanat deuh caan khalah kan duhsakaw hrimhrim ding a si lo sawm? Ziangah? Siat ni that ni le phunpi thilthu ngaingai ah mi cun kan sa in ei leh duh theu. Cui caan khalah mah le mah cu thih ngamin kan humaw leh theu a si kha. Mithmaitha le tongkamtha dawi menih mi kan va dawr sawn theu kha, kan ruat hnik pei. Mithmaitha ih in rak tlon demdonak san cu mikhual le mipi zohin in rak zoh tinak- mah le mah cu a cia ih ngaiawk tuklam ah in rak betha ciamco lo tla a rak si pang thei. Tongkamtha maw mi le sa?

‘Midang len hnakin mah len a thasawn’ an rak tinak san khal hi umzia a nei. Mi cu an neihnun khalle kan sorbawk leh thei ngaingai lo. In palbehnak ah maw in eltainak ah maw an hmang sawn riangri tla a si thei. Asilo hmanah, anmah le vuavang, pawlkom, phunhnam an rak neih ve tikah, cunah an hmanawk a rak tul theu. Kanni’ phunhnam le pawlkom cangvaihnak ah sumpai le neihsiah thawhter kan va phut thei nawn lo. Phut ding khal an si lo hrimhrim. Mi tete, mah le mah ti hna an rak thiam thup ziar silawm. Tongkam thiam suah mengmangin va pan dekdo hnik uh sila kan thei mai ding. Kan tongkam hnakih tha hmangin in rak khir lohli ding ti a fiang. Kan mi le sa in mawtaw an neih, dawr pi an neih, sumpai an neih hi kan sorbawk sawn thotho. Kan sorbawk kher lo hmanah mi an kamih kan phunhnam zah a kaiter.

Fim ding kan si ahcun fim a cu taktak thlang. Tongkam cu thatter diahdo siin, thinlung thup kan neithiam ve thlang kei uh. Cu lawnglawngah mi kan bang ve thok fang ding hi a rak si. In mol theitu khin anmahte an umkhawm caan ahcun in hnihsan thup rero simaw an mi le sa hamthatnak vial an tawlrel simaw a rak si thotho. Sungkaw thu le mipi thu cu a dang tuk. Na va thlen le vetei’ an titi ki an thleng vukvi theu nak hmun cu na mi le sa an si ngaingai lo ti thei ve thlang aw. An lo mol thei nawn lo tik ahcun an lo hnong cih ringring ding. Hihi midang huatnak dingih rel si loin sungkaw umtudan sim duhnak sawn a si.

Mangbang aanhai le poipeng ton nikhua ngaingai ahcun mah cu mah cingcing simaw! Mangbang caanih theihsuahawk vial hnakcun that lai ihsi theihawknak cang thiam hi a sunglawi. Kan lammi’ dawrih thil pakhatte na va lei men khan phunhnam hrang hna na tuan rero tiah ruataw awla na phur a zaang ding. An bulpak na va bawm tiih na ruah cun na phur a rit pang dah kei. Mi kan dawr luihlo cun an khawng cak. An khong cak cun man-ol deuhin an pe thei. Man-ol deuhin an pek thei cun an khawng sinsin. Kan pan deuhdeuh, an lian deuhdeuh. Kan lammi cu an rak farah ziar ti kha hngilh lo kei uh. Mi’ cangvaidan tla hi thlithlai thup thiam uhsi. ‘Kan mi le kan sa’ an ti hnuhnu cun an siatnak tampi khal an hupaw. Famkim zet vekah an relsak thiam. Cucun kannih cu in mol ngah lala theu. Mi kan dawr le kan pan luihlo vek khan kan lammi pan luihlo ve nungna, a thok ancun in rak thum thei tuk lo hmanah, khua a rei cun an hlep a tha dingih an khawngcak ding. Cucun in thum thei ve mai ding.

Kan lammi cu dawr ton hmaisaksak ah thil lei lokmai kan hmang. Culo khalle, kan lammi’ dawr le mipi dawr ih thil man zohton tahratin fang hnih-khat dawi ah kan mi le sa kan phatsan luailo theu. Cu hnakin, “Khinah cuzat khazat in in pe thei si, nan dawrih lei ka duh sawn fawn si in thum ve mai uh la,” ti nungna in thum thei ve ko ding. An thinlung sungte ah an pai ringring dingih that an suah ve ding. In rak thum thei lo tawp hmanah kan lammi dawr thotho ah tlan ding. Kan lammi dawr ih um lo thil vial kha mipi dawrah kan lei kei cu. ‘Kan lammi si hi miin nuam ti hai seu. Laimi si cu a nuam e, a hlawk si,’ an ti theinak ding cun pakhat cio hin lungput hngethngai kan neih a tul. A dawrtu si ringring dingah ruat aw pang hlah. Dawrmi na si leh tik a um ding. Cu tikah kam lammi si hi nuam na ti kem?

Mah lammi duhsaknak cang hman thiam lo cun kan phunhnam a tlakniam tikah phunzai duh hlah seh- a mawhphurtu a siruangah. Kan phunhnam a thansoh tikah kan lammi duhsak thiamtu cu a hmai hngal seh- a tungnungtu a si ruangah.

Miphun huapih cangvaihnak simaw mai’ mi le sa humnak hrang simaw ih sumpai khon lawngah kan mi neinungpawl kan mangih, duhsak cut ah hmuah kan hngilh a si cun sum khon ding kan tong lo cing mai ding. Cu hman cu sumkhon thu vial a si lai. “Hih, kan lammi ahcun kan lo rinsan mi nan siih, nan rak tan loah……” ti tongkam cu theih ding a tam zet. Kan lammi nan siih duhakin kan lo pan ta rori. Tha kan lo pe ve ta hrimhrim ti tongkam cu a mal lai nasa. Khua a rei cun kan mi neinungpawl an tel a tet thluh lai ding. Duhsak ti hmuah um loi’ khon le khon lawnglawng cu a ngaihnak a um ve lo. Duhsakawk hna thiam nungna cu, mipum kan mal lo lawlaw. Kan lammi hin ziang hna khal kan tuan ngam thluh mai ding.

Mah le mah duhsakawk hi midang huat le phiar a si lo. Thianghlimtei’ sungkaw thinlung neih thiam le fim a si men.

Comments

comments

Comments

%d bloggers like this: