Nunnak Upat

January 17

Nipi Ni

Nunnak Upat

Siar:

Saam 139:13-16

Ttih-umzet le lamdangzet ih in tuah ruangah, ka lo thangtthat. Na tuahmi hmuahhmuah hi mangbangza le khuaruahhar an si. Cumi cu ka thinlung zate in ka thei.    – Saam 139:14

Kumkhat Sung Baibal:

–     Seemtirnak 41-42

–     Matthai 12:1-23

David in Saam 139 sungah Pathian in a nu pum sungih a sersiam daan thu a ngan. A suah hlan ihsin David cu Pathian in a duhdawt.

Pathian in David cang dingmi mi pakhat ruang a zing ih a tumtah cia vekin mi pakhat a ra suahter. Himi Saam sungah David in theih duhnak a suahtertu sullam phun dang a sawhmi ttongfang a hmang. “Ka suah hlan ihsin i hmu zo. Ka hrangih na tuahmi kum le caan pawl cu, na cabu sungah khum cia an rak si zo, nikhat hman a thok hlan ihsin,” (Saam 139:16) tiah a ti.

Vancung a Pa ih duhdawtnak in David cu danglam in a sersiam. Thil thar tuah theitu Pathian ih thinlung le kut in a ra suak. Nang khal David a sersiam vekin sersiammi na si. Leitlun ih midang hmuahhmuah hnakin mi hleice na si.

A suak zomi le nu pum sungih a umlaimi, mihiip thei zoh mawi nauhak pawl le  thazaang a derdaimi putar le pitar pawl, milian le mifarah, mi hmuahmuah upat ding le lungawiter ding kan si. Mi hmuahhmuah cu Sersiamtu Pathian in danglam hleice in a tuah mi an si. David vekin, “Ttih-umzet le mangbangza ih tuah mi ka si ruangah ka lo thangtthat ding,” (Saam 139:14) ti ve cio uhsih!

Pathian ih a fimkhurmi ruangzing vekin,

Mangbangza ih sersiammi kan si;

Taksa tthen zate in um lo cang lomi an si,

Famkimzet in cuai an tlai cio.

Nunnak zate hi Pathian ih sersiammi an si ih A hmin an phur.

(Visited 28 times, 1 visits today)

Comments

comments

Comments

%d bloggers like this: