Nunnak Lamzin

February 14
Tlawngkai Nihnih

Nehnak Lamzin

Khawvel a nehtu cu zo so an si? Jesuh cu Pathian Fapa a si ti a zumtu pohpoh cu khawvel nehtu an si.
– 1 John 5:5

Bible Siar Ding: 1 John 5

Leilungtlun ih a nasabikmi ttonttaihnak cu zumlonak (unbelief) hi a si. A nasabikmi huham cu duhdawtnak ih hnattuanmi zumnak (faith) hi a si. Duhdawtnak, lainatnak le zaangfahnak pawl cu zumnak sungah a kumkhua in an umkop ringring a si. Ttihnak hi zumnak ih raalsantu a si. Asinan “duhdawtnak sung ahcun ttihnak zianghman a um lo” (1John 4:18). An thinlung sungah vanlam zumnak le vanlam duhdawtnak thawn a khat ringringtu pawl cun Jesuh a rat saal tikah laakso ka si pei maw si lo ding? timi thusuhnak cu an thinlung sungah a um hrimhrim lo ding.

Leitlun cu hmuntin ah ttihphaannak hlir in a khat, retheihnak, riahsiatnak le thinlung kekkuainak thawn a khat. Asinan zumnak le duhdawtnak cun cumi pawl cu a neh theituk. Pathian in hih leilungpi le minung pawl cu zumnak thawn pehzom aw thei dingin ruat cia ih a sersiammi a si. Zumnak timi lamzin thawn na pehzom aw ngah asile ttihphaannak cu a hlo dingih Pathian Thu in na sunglam nun ah hna a ttuan ding, tthum awknak ding lungphah na hmu ding. Thutiamkam zate cu a zumtu hrangah “A si” le “Amen” ti a si (2 Korin 1:20).

Khrih sungih rinnak na neih tikah Pathian duhdawtnak cu atak in a lang dingih Jesuh hrangah ziangkhal tuah thei ding vekin na thinlung sungah phurnak na nei ding. Zumtu hmuahhmuah cun duhdawtnak kan nei. “Amah kan duhdawt, in duhdawt hmaisa ruangah a si” (1John 4:19). Ziangtik in in duhdawt? Sualnak cirhduup pi sungih kan taanlai ah. Ziang si a simmi? “Na sualnak cu ngaidam a si zo” (Luka 5:20). Ziangruangah cuti’n a sim thei? Ziangahtile in duhdawttuk ruangah a si. Ziangmi hrangah? “A sunlawinak sungah mi tampi hruailut dingah” (Hebru 2:10). Ziangmi si a tumtah? Amah thawn kumkhua um tlang ding.

Kan nunnak lamzin tluan a zate cu hih a saangzetmi sinak le kawhnak hrangaih fimzirnak a si. Hih thuhmi duhdawtnak thuthup cu ziangtluk ih sunglawi so a si? Kan sualnak pawl ai ah thluasuah thuahhnih a si. “Pathian fa a simi poh cun khawvel kan neh. Khawvel kan neh theinak cu zumnak a si” (1 John 5:4). Zumnak cu nehnak a si.

Kei cu roco dingih thu in tiamkammi pawl cotu ka si, ziangahtile ka zum ruangah. Kei cu nehtu ka si, ziangahtile thutak zumtu ka si ruangah. “Thutak nan thei dingih cuih thutak cun luatnak a lo pe ding,” (John 8:32). Jesuh Khrih kan zumnak ih a hrampi a si. Ziangahtile Amah cu kan zummi a si. Vaivuannak zianghman a um lo. Himi hi thuhrampi a si: a zumtu cun felfaizet in a zummi a theifiang ding. Zumnak felfai in tontehmi felfai a neihter ih aupimi felfai a neihter.

Zumtu pawl cu nehtu lakah nehtusin kan si.

@ Smith Wigglesworth

(Visited 44 times, 1 visits today)

Comments

comments

One Comment

  1. kaa in rel le sim cu a ol deuh lai nan zumnak lawng in vanram kai tiah zirhtu an mah an si lo sawm?tihnungza ka ti.Tulai minung pawl hi Pharisee pawl hnakin kan sual sawn .Bible ih zirhbang tuk in thu kan lung ngaingai lo ti lang.Math 21:13 siar hnikuh .Thu suh nah le a tlunih Id ah suh theih

Comments

%d bloggers like this: