Nung ding maw Nung lo ding?

March 13

Tlawngkai Ninga

Nung ding maw Nung lo ding?

 Siar: 2Korin 1:3-11

Kan parih suanmi thilrit cu a tum ngaingai ih tlun ah a ritzet fawn ih nung ding hman ah kan ruat aw nawn lo.       -2 Korin. 1:8

Kumkhat Sung Baibal:          Daan 20-22         Marka 13:21-37

 Nauhak ka silai ah leknak bualrawn sungih a lekmi nauhak pawl in Shakespear ih ttongkam hminthang, “nung ding maw nung lo ding, cumi cu thusuhnak a si” timi an saal ttheu. Asinan a ti duhnak kan thei cuang lo. Ka hun thei leh saalmi cu hih ttongkam hi Shakesper ih thuanthu sungah Hamlet ih ttongmi a si. Hamlet cu a paseu in a pa a that ih a nu a tthit ti a theih tikah riasiazet mi siangpahrang fapa a si. Amah le amah that aw ding tiang a ruat tikah a sut awkmi ttongkam a si. 

A caancaan ah tuarnak cu a tumtuk ih ruahsan ding a um lo. Paul in Asia ram ih hremnak a tuarmi a tumtuk ih nung ding hman a ruat aw nawn lo (2Kor 1:8). Asinan Pathian lam a thlir tikah tuar theinak a nei saal ih, “Kanmah le kanmah rinsan aw loin Pathian kan rinsannak ding a rak si sawn”(c. 9) a ti.

Hniksak tuarnak in nunnak hi man nei lo vek a bangter. Kanmah lam kan zoh awk tikah beidongza a si thei men. Asinan kan rinnak Pathian hnenih kan ret tikah hmuh daan a danglam. Leitlun ih kan nun sung hmuahhmuah Pathian in khopkham in in cawm tengteng ding. Amah thluntu kan si bangin Pathian ih tumtahnak a simi “Nung dingah” tumtahnak nei ringring ding kan si.

                                                                      Nangmah zum dingin in zaangfah hram aw,

Bawipa, nunnak ih thil a rit caan ah;

Thimnak cu ruahsannak thar thawn dawi hlo in,

Beidongnak tlunah hung kai dingin in bawm hram aw.

 

Harsatnak in thu in ruatter, Thuruahnak in in fimter;

Fimnak in nunnak a tthathnemter.

(Visited 21 times, 1 visits today)

Comments

comments

Comments

%d bloggers like this: