Nunau; a thuanthu le a biazai pawl

By- Cengte
A. FCFS khawmnak ah hi tin lungawithu ka sim(14.12.2008)
Kan dung November thla ah Singapore ih hna ka tuan nak kum 6 a kim. Khawmnak ah Pathian hnen lungawithu sim ding ka ruah rero lai ah kan dung zarh sung hmaihuu in ka na. A that nak cu tu sun ih ka lungawinak a nasa deuh cuang. Kawlram ah kum 2 sung ngor ih ka damttua ah hi tawk hnatuan ding ka ra pok. Innlam nu le pa, rualpi, khrihfabu ih thla in cam sak nak Pathian in a ngai ih kum 6 sung tluang ten hna ka ttuan thei. Pathian hnen lungawithu sim lo in ka um thei lo.

Ka thlen pek te ih Pa Ro(Salai Ro Lian) ih lungawithu sim mi ka mang na sa. “Thlen pek cu a har ka ti tuk ih ka ratnak leiba ka kuan theh ve ten ka tlung ding ka ti. Ka kuan theh in paisa mal lai tal nei lo ih tlun lawm mam cu tin ka tang bet, ka tang bet ih neih ti ni le umlo. Cu tin tlung thiam nawn lawn ka taar ngah” a ti. Kei tla cu ciah ka si.

Mi’ ram ih hnenum ra tuan cu a har fualfo ko. A hlei ce in hnatuan thok pek cu a luar cuang. Cuih tuarnak in tthatnak a suah pi mi cu Pathian hnen thinlungtak ih thlacam ih ka pan hi a si. Isaiah 30:20 hmang in Pathian in i leh mi cu hi har tuar nak hmun ah Pathian ka hnenah a um ih i zirh tu a si.

Tu nai te ah Henry in rin lo pi in “Ziang degree na ngah zik thlang?” tin i sut. Ka awloksong in “Ziang mi maw?” ka ti. “S. Korea ah cun kum 4 hnatuan le BA, kum 6 kim le master, kum 10 kim le PhD ngah kan ti” a ti.Opps! Si le cu kei master degree ka ngah!!
Nan theih vek in master degree ngah ding ah cun thesis ngan a ttul. Kum 6 sung ih ka zir ngah mi pawl ka ngan nak ka thesis cu tuisun nan hnen ah ka lo thlen – nunau; a thuanthu le a biazai pawl.

B. Ziangtin Cauk ah a cang suak?

Tumtahnak thawn tuah suak mi si lo in a mah ten a hung seem suak mi sawn a si.

TOEFL mah ten zir phah ding tumtahnak in 2006 kum cem hnen ah computer ka lei. Ka uu Lily pa in type zirnak i than sak, a hman daan tla i zirh phah. Ka inntek teih thatnak in internet manpek ttul lo in zaantin ka zoh thei. Email ka hman thiam in group mail pawl ah ka tel ve. Um haar caan ih Zilthli ih biazai ka kuat mi, a tha tin ngan bet ding tha in pek tik ah ka tha a tho ih ka ngan peh. Saya Thawng(Rev. A. Thawng HLei) in a hmaisabik cauk suah ding ih ruahnak i pek. Cu lai ah cun ka hnih a suak. Ka suah le zo nih in lei ding? Zunphir in ruahnak i pek bet tik ah cun ‘a tha ngai men ding’ ka ti phah.

A hmaisabik Rev. Run Cung Mang ka ron tik ah “Lo bom thei mi a um a si ah cun lo bawm ding ah ka ralring” i ti. A awkam in thazang ka ngah zet. Nhge pi ka ron tik ah “Phang hlah. Biazai pawl le paisa i rak kuat aw la a tul mi dang pawl tuanvo ka lo lak sak ttheh ding” i ti cun ka thawpi ka suah. “Ka suah len ka paisa a hrek teh ka ngah sal thei pei maw?” tin ka thinhar thu ka ruah tik ah Liante(Salai Lal Ram Lian) in cauk hrek khat cu a miat mal lai kan ngah theu ho khaw. Cauk suah mi za ten kan sung thluh lo. Sung ding cu ralring cia aw. Nan na tha sia hlah. A lo zuar bawm tu ding na neih thei a thupi zet.” tin ruahnak i pek. Suahding ka tawlrel thu ka simsal tik ah Zuunphir in “A phaw ka lo suai sak ding” i ti. Ram dang dang ih rualpi pawl in zuar bawm thei pei maw ti zangfah ka dil tik ah tha tho ten kan lo ttan pi ding in ti cio. Cu tin rualpi pawl ih tha pek nak le bomnak thawn hnatuan kan peh.

TOEFL zirnak ding ih computer ka lei nak kum hnih a kim hnenah TOEFL phi ding ka ralring thei hrih lo. Cu ai ah ziang tik hman ih ka rak ruah dah ngelcel lo mi biazai cauk pakhat a suak. Ka nunnak hrang ih tumtahnak ka neih mi le Pathian in ka hrang ih tumtahnak a neih mi a rak dang ziar a si pei maw ti ka ruat phah…

C. A sung thu mal lai

Hmai April thla ih kum 35 ka kim ding hminsin nak ah kei mai ngan mi biazai 35, Siangpahrang ih ngan mi 1 le Lai Zuun ih ngan mi 1 thawn a zaten 37 a si. Tthen 7 ah ka tthen.
1. an fanu ih inn ngai zuun: Ram dang ka suah hnu inn lam, nu le pa pawl ka ngai nak ih ka ngan mi pawl.
2. fala le duhdawtnak: Fala ih duhdawtnak ti mi cu…
3. nunau le zaleennak:A siar tu in ziang tin nan ruat cio pei maw thei hlah. Kei cun “tualsuak feminism” ti theih awm ka ti.
4. soul searching: Lai in ttongfang remcang ka thei lo ih Miraang ka hlaang. Harsatnak ton caan thuruahnak ih rahsuak mi, kei mah le mah ka theih awk ngah mi.
5. a miphun (soul searching): Kum 12 hrawng ka si lai ah Mandalay Phunsang Tlawngta pawl ih suah mi magazine ah Men Ri Hai ih nganmi “Laimi thu Laimi in ngan thlang uh si” ka rak siar nak in ka upat le Laimi thu ka ngan leh ding ti saduh ka that. Lai mi ka hmuhawk daan pawl. A poi mi cu kha lai ih ka rak ngan duh mi le tu ka ngan ngaingai mi an dang aw zet.
6.nauhniang hrangah: Ka hnak ih kum no deuh nau le pawl hrangah duhsak mi (keimah tla ka tel thotho).
7.thunet: Thlavangzaan. Padinpoh kiang ih ret mi cabuai kiang ah to in khedan kai awi ka man mi sunmang in a net.

D. Kum 35 ka naih tik ah

A liam zo mi kum 5 lai ah radio FM 107 in Pathian thusim mi ka rak ngai ngah.Thusimtu in “Christian nun ih nehnak thuthup cu a sungkhan(surrender) a si” a ti. Vancungmi hnen ah “na sim vek in si ko seh” a ti tu Mary le Gethsmani hmuan ih Jesuh khrih thu tahthimnak ah a hmang. Kaa ih a sungkhan cu a awl te nan nunnak ih a sungkhan cu a har zet. Hi thu ih ka buai rero lai ah cangan mi pakhat ka rak siar ngah bet. To surrender is not to give up, but to give back to God what are not ours.

Tawk fang a rei ah Lily pa in group mail ah “Broken Dreams” ti mi biazai pakhat in hun kuat. Hi biazai in ka dinhmun i theih fiang ter. A lehnak toy a siat ruangah Pathian ih remsak ding ah a va pe tu nauhakte ih thu a si. Mal te a hngak ih Pathian a mawhthluk. “Na khulfung tuk. Ziang ah tu tiang na theh thlang lo?” Pathian in a let sal. “Ka fa na thlah siang ual lo. Ziang tin so ka lo rem sak thei ding?” Kei khal cuih naunakte bang in thlah siang lo ih kaih fetfi mi ka nei ve. A kuai theh zo mi ka sunmang. A siat ttheh zo ti ka thei ko nan ka duhtuk mi a si ruang ah thlah ka siang hrimhrim lo.

Kum 20 leh ti ka si hrawng ah Kawl canganthiam Ju ih “Ti Fen Rah”(yimyioti) ti mi nunthuleng tawite ka rak siar dah. Tiva kap ah to in ti ih fen mi thingrah a zoh cuahco tu nu ih thu a si. Hi lai ah ka mang a rak bang. Ziang ah si pei hi nu in thingrah a vun sar/dawi lo? A si nan tu ah cun “ziangah?” ti ka thei ding a bang. Ziangah ti le tivakap ih a to rero tu nu cu keimah ka si hmang.

Mi pakhat in a naunu thawn an danawknak hi tin a ngan. I try to make things happen but my sister lets things happen. Kei khal ka no deuh lai ah cun thil cansuak ter thei ka rak tum. A si nan tu ah cun hi cangan tu ih naunu vek in thil a mah te cang ding in daiteih um ka zir ngah. A hlaan ah cun tiva raal thleng ding ah tiva so leuh ih hun leuh tu ka bang. Tu ah cun ka baang zo ih ti luan thlun in suk lam ih leuh ka tim. A hmaisa ih ka tumnak hmun ciah cu ka thleng lo men ding nan Pathian tthatnak ring in ka thlen duh nak tiva ih khat lam cu ka thleng ko ding ka zum.

E. Casiartu hnenah

Ca ka siar mi ih sin kan nun ah thutha tampi ka zir ngah. Tahthimnak ah Zaw Gyi ih “Pangpar ka ton lai”(Pan pan hliat baa) biazai in harsatnak ruang ih ka beidong zik caan ah a sungkhan lo ding thazang cahnak i pek. Cu vek thotho in ka cauk a lei ih a siar tu ih nun ah tthathnemnak pakhat te tal suahpi thei ve hram seh ti hi ka thlacamnak a si.

F. Thunet

UDE, Mandalay in BA ka ngah hnu tlawng ka kai peh thei lo ding ti ka rak theih tik ah kum 4 sung camibuai ka hmat ngah mi pawl zoh in ka rak ttap dah. A si nan tu ah cun kum rei pi ka kaih ttentten mi, a kuai ttheh zo mi ka sunmang pawl ka thlah thei zo.
Saam 131 ngan tu cun “Ka hrang ih thil tumpi zetzet pawl le ka tuah thei lomi thil har zetzet pawl cu thil poimawh ah ka ruat nawn lo a si. Cu ai ah thin nuam le lung dai in ka um zo. Naute cu a nui’ ttang sung ih a hna a ngam vek in, ka thinlung cu hnangamnak in a khat”a ti. Kei khal cuih hnangamnak ka co ngah ve. Thil tum pipi tuah thei hlah hman ning la thil fa te tuah thei mi ka nei ti ka thei zo. Ka derdaainak ka thei aw ih ka cahnak khal ka hmu aw ngah ve. Hlan ah ‘hngah’ ti mi ka rak hua zet nan tu ah cun a caancaan ah dai te ih hngah a ttul ti khal ka zir ngah zo. Ziangah ka riah a siat nawn ding?

Comments

comments

Comments

%d bloggers like this: