NUN THLENGH THEITU

NUN THLENGH THEITU

Ka hnenah Na ttong ih Na ttong kam khat khal ka thei ttheh a si. Maw Cungnungbik Bawipa Na hmin ih kawh mi ka si; Na minung ka si ih Na ttongkam in ka thinlung cu lungawinak le thinnomnak in a khahter. – Jeremiah 15:16

Thuhmaihruai
Bible ah “thlengh” le “thlengh awknak (change)” timi ttongfang hi vei tampi a lang. America president Obama ih ttongfang: “thlengh” in mipi a ciahneh (influence) nasatuk. Mi pakhat nunnak ihsin miphun tthansonak dingah “thlengh awknak” hi lo theih lo ih um ttulmi a si. Misual kumkhua hremhmun thleng dingmi kha kumkhua nunnak cotu dinhmun ah a thlengh theitu; buainak ih khat innsang le khua cu hnangamnak le tthansonak thawn a khatmi khua pakhat dinhmun ih a thlengh theitu, le a ttumsuk cuahcomi ram le miphun kha a tthangsomi vingvomi ram le miphun dinhmun ih a thlengh theitu cu a nungmi le huham thawn a khatmi Pathian Ttongkam a si.
Ca Thianghlim in Pathian Ttongkam (Word of God) timi hi phun (3) in a langter: Awkaa ih simmi Ttongkam (the Spoken Word of God); Ca ih nganmi Ttongkam (Written Word of God); le Minung pianhmang kengtu Ttongkam (Incarnated Word of God- Jesuh: John 1:1, 14; Thup 19:13) pawl an si. Mi pakhat, Innsang pakhat, Khua pakhat le Miphun pakhat ih sinak le dinhun a thlengh theitu cahnak umsun cu huham le thiltitheinak thawn a khatmi Pathian Ttongkam lawng a si zia kan zoh pei.

1) Minung bulpak nun thlengh theitu
A) Rundamnak: Timothy ih nunnak thlenghtu cu Bible a si ti ti kan fiang thei. Paul in, “Ca Thianghlim cu Khrih Jesuh na zumnak sungin rundamnak ah a lo thlenhtu, fimnak a lo petu a si” a ti (2 Tim. 3:15). Nang le kei teh Pathian Ttongkam ih nun thlengh sakmi kan si ve zo maw? Zakia ih nun a thlengh theitu kha Jesuh ih Ttongkam a si. Kawlram ih ra missionary maksak Adoniram Judson ih nun thlenghtu tla Pathian Ttongkam a si. Kawlmi zumtu hmaisabik U Naw ih nun thlengh theitu, Laimi lakih zumtu hmaisa Pau Suan le Thuam Hang teih nun thlengh theitu, Falam mi zumtu hmaisa Thang Cin le Cong Kham teih nun thlengh theitu khal Pathian Ttongkam thotho a si. Ka nunnak i thlengh saktu khal hih Pathian Ttongkam hi a si.

B) Lungawinak le thinnomnak: Jeremiah in, “Na Ttongkam in ka thinlung cu lungawinak le thinnomnak in khahter” a ti (Jer. 15:16). Thinharnak le beidongnak sung ihsin thinnomnak le ruahsannak mi pe theitu, minung nunram a thlengh theitu cu Pathian Ttongkam lawng a si. Zumtu unau, tuni ahhin thinharnak le beidongnak in na khat pang maw? Pathian Thu sungah na thinlung le na ruahnak zate phim awla khawvel buainak le hnaihnoknak in a lo siatsuah thei baan lo dingih lungawinak le hnangamnak in na khat ding.

C) Nun thianghlimnak: “Ziangtinso mino in ziaza thiang a neih thei ding? Na thupekmi thlunnak lawngin a nei thei ding. Ka thinlung sungah Na Daan cu ka ret zo, Na parih ka sual lonak dingah” (Saam 119:9, 11) ti’n Saam cangantu in a ti. Tuni ah zumtu tampi Pathian hmai le mipi hmai ah mit-hmai ttha kan ngah lonak cu nun thianghlim kan neih lo ruangah a sibik. Pathian Ttongkam cu a nung ih huham a nei, na ngai tam, na siar tam, ih na sim tam asile nangmah le na thusimmi theitu pawl nunnak ah nun thlengh awknak taktak le nun thianghlimnak a lang thei ding. Ezra in, a tikcu hmuahhmuah cu Bawipa ih Daan zirnak le thlunnak ah, Israel mipi zirhnak ah a hman bangin, kannih tla Pathian Thu sungah ciah aw uhsi! (Ezra 7:10).

2) Innsungsang nun thlengh theitu (Tirh. 16:29-34)
Filipi thawnginn kiltu pa le a innsang nun thlengh theitu hi Pathian Thu a si. Himi pa hi Pathian nung thei lotu a si. A ttuanvo laak caan ah a kilmi thawnginn sungih thawngtla pawl an suak thluh zo si hmang ti’n a ruat ih, amah le amah thah awk a tumtu, mi beidong pa a si. Asinan duhdawtnak ih khat Pathian in amah in a innsang nun thlengh awknak ding lamzin a sial sak. Paul hmangin that aw lo dingin a kham. Cutikah, thawnginn kiltu pa cun Paul hnenah, “Ka bawipa le pawl rundamnak ngah dingah ziangzo ka tuah ding?” tiah a ti. Anih in, “Bawi Jesuh zum awla nangmah le na innsang in rundamnak nan ngah ding” a ti. Cule Pathian Thu cu amah le a innsang zate hnenah a sim ih cuih zaan rori ah amah le a innsang zate in baptism an laak. Pathian an zum ngah ruangah lungawinak in an khat (Tirh. 16:29-34).

Duhdawtmi unau, Pathian Ttongkam in na nunnak a lo thlengh thei zo maw? Nangmah le na innsang dinhmun thlenghtu ah na cosaang zo maw? Pathian hmin sunlawitertu innsang nuam le mawi kan si cio theinak dingah Pathian Ttongkam Bible hi kan innsang ah hmang ttangkai tum cio uhsi!

3) Khua pakhat ih nun thlengh theitu (Jonah 3:1-10)
Nineveh khua ih sinak le dinhmun thlengh theitu cu Pathian Ttongkam a si. Israel ih raal a simi Assyria khuapi Nineveh ah Profet Jonah cu thusim dingin Pathian in a thlah. Profet Jonah cu Nineveh khua ahcun Pathian Ttongkam hiti’n thu a sim: “Ni sawmli hnu ah Nineveh khuapi hi a cem ding” ti’n. Cutikah Nineveh khua mi pawl in Pathian an zum. An hotubik ihsin thokin upabik in nautabik tiang an sualnak an sir, buri hnipuan an hruk ih rawl ul in thla an cam. Cuti ih an tuahmi le an nun daan ttha lo pawl an tlansan kha Pathian in a hmuh tikah a thin a suup saal ih an parah thlenter dingih a tummi siatsuahnak cu a thlenter saal lo. Cuti’n tuni tiang leitlun santhuanthu ah a nasabikmi tthangphawknak tiih hminsinmi khua ah a rung cang ta.

Duhdawtmi zumtu unau, kan suahseemnak le kan laihri phumnak kan khua, kan rak umnak le kan tthanlennak khua, tuni ah ziangvek dinhmun ah a um? Pathian ttihzah le thulung nun nei in a tthangphawkmi khua a si maw? Pathian Ttongkam simzirhnak in piangtharnak a leengmi; a tthangharhmi le mission hna a ttuanmi khua a si maw? Pathian hmin sunlawitertu khua le ram si dingin thlacamnak le peknak in Pathian Thu simphuannak tawlrel aw. Cuti’n nan khua cu Nineveh khua bangin a sinak a thlengh aw ding a si.

4) Miphun dinhmun thlengh theitu (Neh. 8:1-12)
Israel miphun ih sinak a thlengh theitu umsun cu Pathian Ttongkam hi a si. Nehemiah in a siat thluh zomi Jerusalem khua kulhnak hauhruang a din saal thluh hnu ah miseenpi ih thlarau nun le thinlungput thlengh dingin a tum. Puithiam Ezra kha Daan cabu a laakter ih miseenpi hna theih ah a siarter. Ezra in Daan cabu cu zinglam khawfingcah in sun tiang ringzet in a siar ih miseenpi pawl cun tthazet in an ngai. Miseenpi ih an theih theinak dingah cuih Pathian Daan an siarmi cu ttong an let copcop. Pathian Daan ih tican ngaingai an theih tikah an lung a zuur ih an ttap. Daan ih tican an theihfiang ruangah aipuangzet in an um (cc. 8, 9, 12), ti’n kan hmu.

Zumtu unau, Pathian Thu in kan miphun dinhmun in thlengh thei zo maw? Kan miphun sungah Pathian ttihzahnak nun a lang thei maw? Pakhat le pakhat lakkar ah duhdawtnak le zawnruahnak teh hmuh ding a um zo maw? Mi bulpak nun ihsin innsungsang, khuatlang le kawhhran, cuihsin kan rampi le kan miphun sungah remdaihnak le a kilkip ih tthansonak a um theinak dingah kan ttulbikmi umsun cu Pathian Ttongkam lawng hi a si. Bible siar le zirzoi, simzirh awk taima cio uhsila kan ram le kan miphun dinhmun cu atu hnakin a thlengh aw ding, a dam dingih a tthangso ve ding a si.

Thunetnak
Leitlun ih huham cakbik le thiltitheibik cu Pathian Ttongkam a si. Mi hmuahhmuah ih kan ttulmi tthansonak le hlawhtlinnak cu “nun thlengh awknak” a si ih cumi cu Pathian Ttongkam in a ra a si. Rundam kan si theinak cu Pathian Thu kan theihnak in a si (Rom 10:17). Ninghan riahsiatnak ihsin lungawi thinnomnak ih in thlenh theitu umsun cu Pathian Ttongkam lawng a si. Siatralnak sung ihsin in ruunsuak theitu le nehnak le hlawhtlinnak in pe theitu cu Pathian Thu lawnglawng hi a si (Joshua 1:8).

Curuangah hlawhtling nun neih theinak thuhrampi a simi “Nun Thlengh awknak” kan neih theinak dingah Bible SIAR uhsi; kan rundamnak humhim a si theinak dingah Bible ZUM fek uhsila, nun thianghlimnak neitu kan si theinak dingah Bible hi NUNPI uhsi! Aw a sunglawibik nun thlengh theitu Pathian Ttongkam sunglai hi!

rcmang@gmail.com

(Visited 60 times, 1 visits today)

Comments

comments

Comments

%d bloggers like this: