Nun Lungawinak Khuiah A Um?

14322727_1179014148822534_7796440513540772850_nŠianglianuk Ķianghrol‎

Nunau mawi zet le neinung zet pakhat a rak um. Hnipuan tthattha in a thuam aw, ceiawknak tthattha a hmang thei. Asinan a nun cu a kawlawng riahriah ih, sullam nei lo vekih a theih thu thinlunglam sibawi hnenah a sim.

Curuangah sibawi cun thuron petu hnenah a fehter. Cu nu khal cu lungawinak hawl ding in thuron petu hnenah a va feh.

Nunau in a nun umtudan a sim thluh tikah thuron petu cun an zung thenfaitu a ko. Cule, nunau hnen ahcun, “Zung thenfaitu Mary hi ziangtin lungawinak a hawl hmu timi ka sut ding ih, rak ngai aw,” tiah a sim.

Curuangah zung thenfaitu pitar Mary cu tohkham ah a ra to ih a thuhla cu hitin a rel:

“Ka pasal in sikserh nat in i thihsan ih, cumi hnu thla thum ah ka fapa neihsun cu mawttaw in a pah that. Zohman tlaihsan ding ka nei lo ih, neih mi khal zianghman ka nei lo. Ka itthat thei lo, rawl tla ka ei thei lo. Mithmai pante’n zohman ka zoh thei lo ih, keimah le keimah thahawk ding tiang hman ka rak ruat.
Asinan, vei khat cu, siimlam ah ka hnattuannak ihsi ka tlun tikah zawhte fatakte pakhat in i thlun. Ziangtin simaw cumi zawhte cu ka zang a fak. Inn lenglam cu a daih tuk ruangah, zawhte cu inn sung ah ka lutter. Kheng ah cawhnawi mallai ka thletsak ih, zawhte cun a kheng tiang fai ko in a liak thluh. Cu thluh ah a hung miau ih, ka ke ah a taksa a ra tat. Cutikah, thla tampi sung ah a vei khatnak ka hung hni siamsi thei.

Cu thluh ah thu ka vun ruat peh. Zawhte fatakte bom men hman in i hniter thei a si ahcun, minung hrangih thil pakhatkhat ka tuah ahcun ka lung a awiter thei ding, timi ka ruatsuak.

Curuangah a thaizing ah sang ka rawh ih, ihkhun ih bokbek ka venghnen mina ka va pe.

Ni tinte’n mi pakhatkhat hrangah a ttha mi pakhatkhat tuahsak ka zuam. An lungawi lai ka hmuh mi in ka lung a awiter zet.

Tuini ahcun, kei hnakih itthat thaw le rawl-ei kaa-thaw ka thei nawn lo. Midang hnenih lungawinak peksuahnak thawngin keimai lungawinak ka hawl hmu zo.”

Cumi a theih tikah nunau neinung cu a ttap. Sumpai ih a lei thei mi hmuahhmuah cu a rak nei nan, sumpai ih a lei thei lo mi pawl a rak sungral rero ti a thei.

Hringnun ih mawinak cu, ziangtluk na lung a awi, timi ah si lo in, nangmai ruangah midang pawl ziangtluk in an lung a awi, timi sawn ah a tthum aw.

Hram: The Living Treasure ih “Happiness.”

(Visited 144 times, 1 visits today)

Comments

comments

Comments

%d bloggers like this: