Nun Ei Siattu Nget-10

  1. 1.      Lungruh/Lunghaknak (Suah.12:30-31)

Faro ih lungruh/ lunghak tuk ruangah Egypt ramah fapa tir thihnak a thlengih ttah le aihramnak in an khat. Siangpahrang Asa cu Juda siangpahrang a tuannak kum 39 kumah a ke ah besia zetin hmasia a tuar. Asinan Pathian rinsan loin sibawi a rinsan sawn ruangah cumi hnu kum 3 a siangpahrang ttuannak 41 nakah a thi (2Sansiarnak 16:12-13). Pathian rinsan ding thei na cingih minung rinsan cu lungruh a si. Santawinak tla a siih ttah le ai-hramnak tla a si.

–         Sersiamtu thil maw Sersiammi kan rinsan deuh?
–         Petu maw pekmi kan rinsan deuh?
–         Pathian maw sumpai kan rinsan deuh?
–         Pathian maw lennak kan rinsan deuh?
–         Pathian maw sungkhat unau kan rinsan deuh?
–         Pathian maw leitlun Bawi kan rinsan deuh?

  1. 2.     Thuphanpernak (Saam 101:7)

Thuphanper timi cu a dik lomi dik tiih sim, a si mi kha a si lo tiih sim, a si lomi kha a si tiih sim.  Ananias le Safira tei nupa cu thuphan an per ruangah an nunnak an caan (Tirh. 5:1-11). Pathian lakih thuphanper a poi vekin minung lakih thuphanper khal a poi. Thuphanper pawl hi zohman in an rinsan in an upat thei taktak  lo. Thuphanper ih hlawhtlin hi camkhatte hrangah cun a poi tuk lemlo tla si men ding nan caan rei a daih thei lo. Thuphanper cop ih len hnak cun thuhman sim ih farah rei a khaan deuh. Thuphanper hi kan theih awk lo lai ih nget bangih kan nun ei siat rerotu a si ttheu.

Mirang pawlih Thufim:

–         Be careful of Thought, For your Thought become your Words,
–         Be careful of Words, For your Words become your Deeds,
–         Be careful of Deeds, For your Deeds become your Habits,
–         Be careful of Habits, For your Habits become your Character,
–         Be careful of Character, For your Character become your Destiny, an ti.

  1. 3.     Pathian dodal ( Isaiah 14:12-15)

Babilon siangpahrang pai thinlung sungah nget a lut. Pathian in a thinlung sungih nget a hmuhsak thluh. Himi bungcang sungah Pathian dodalnak ‘Ka’ (6) a lang. ‘Ka’ hi Pathian ih hmin a si. Suahlannak 3:14 ah Pathian in “KEIMAH CU KEIMAH KA SI” a tinak a lang. ‘Ka’ kan hman tam le vete’n Pathian ih sinak kan long ringring thawn a bangaw.   Saam cabu ngantu in, “Bawipa in milai ih thinlung cu a hmu ttheh, an ngaihtuahmi zianghman a si lozia khal a thei ttheh (Saam 94: 11) a ti. Pathian hmaiih kan thinlung thup ‘Ka’ hi thuh a theih lo. Thlacamnak le nun hlanawknak thawi kan dawi ringring a ttul. ‘Ka’ hi kan nun nget bangih eitu dingih Satan ih tirhfung a si.

–         A sersiammi pawl siatsuah tla amah Pathian dodal a si
–         Siatsuah kher loih tuah tthat duhlo, kilkhawi tthat duh lo khal Pt dodal a si
–         Mibanglo, mi aa, rualban lo, farah nautat tla hi Pt dodal tluk a si

–         Pathian ih mihman, hriakthih soisel le dodal tla hi Pt dodal tluk a si. “Ka hrilmi ka siahhlawh pawl dai hlah uh; Ka profet pawl tisiat hlah uh” tiah Bawipa in a ti (Saam 105:15).

pehlai ding…..

Bawi Ceu

(Visited 36 times, 1 visits today)

Comments

comments

Comments

%d bloggers like this: