Nun A Cem Hrih Lo

Bob thawn kan ngaiawk thok ah kum 16 ka si. A lehhnu kum hnih ah kan nei aw. Kan innsang cu a taktak ih thleng mi lasi thuanthu vek a si. Kan pahnih karlak ah duhdawtawknak thu sim aw lo in simaw, kan fa duhnung zet pathum hnenah duhdawtnak thu sim lo in simaw, ni khat hman kan hmang liam dah lo.

Zan tinte’n kan ihthah hlan cu hmailam can hrangih kan khawkhannak pawl kan rel tlang ttheu. Asinan tawkfang ah Bob cu thisen khensa in a na. A natnak cu thla 18 sung a sualbuai hnu ah, kum 42 mi si in a thi. Keimai’ nunnak rori khal a thi cih ve in ka thei.

Cumi zan ah in hnem ding in rualpi pawl an ra. Rawl ei ding ih taimak ka suah ttuntto lai ah, ka pasal ih rualpi ttha zet pakhat ih fanu kum ruk mi in, “Miss Alice, pasal dang na nei leh pei maw?” tiah i sut.

Mi pakhat in, “Hailey!” tiah a rak dawn. Asinan a mit bial lengli pawl ka zoh tikah, ka lung a awi sal ding lawng a duh timi ka hmu.

Curuangah thawpi thaw phah in, “Leitlun ih pasal ttha bik na neih hnu ahcun, a dang cu na hai nawn lo ding,” tiah ka sim.

Asinan a lehhnu kum thum ahcun, leitlun ah pasal ttha bik “pahnih” an um thu Hailey ka sim a ttul sal. Ziangahtile ka nun ih lungawinak thlensaltertu Hailey ih pa Mark thawn kan nei aw. Tu ahcun Hailey hi kum 15 a si ih, thinlung thiangtei’ i rak sut mi thuhla khan i hnih-noter (smile) ringring. Ziangahtile cumi thusuhnak cu, nun timi hin hman peh vivo ding mi lamzin sunglawi a nei timi kha kalhmang fim zet in i mansuahter sal.

Hram: Alice Cravens Moore ih “A Child’s Wisdom” – A Cup of Chicken Soup for the Soul by Jack Canfield, Mark Victor Hansen, Barry Spilchuk.

-Sianglianuk Kianghrol

Comments

comments

Comments

%d bloggers like this: