Nui’ Ni Sunglawi Bezai Khawlkhawm

Biazia Ngantu Pawl

  • Fahniang Zuun Ah Nu Nu – Laizuun
  • SUNGNGEN KA NU – Mai Daidim
  • Nu – Uk Lian
  • “DUHKIMNAK KA NU” – Amoschin Bk
  • NU NU – Caleb L Ciluai
  • Porh le lomtlak NuNu – Laisak Zilthli
  • NANU! – Paiperhte
  • A cui ka Nui’ dawtnak – Lal Sang Fan-ai
  • Nu – Albert Chin
  • Ka Nui’ Hrang Cakuat – January Van

21829_918616911535688_4422249663236984402_n

Fahniang Zuun Ah Nu Nu

Cutin ninu a liam vivo
A mawinak khal a ziam deuhdeuh
A cahnak khal a dor vivo

Santiluan a man lo vivo
A thiamnak in a daih lo deuhdeuh
A rosum khal a mal vivo

A thinlung khawruah a tam sinsin
A thlacamnak a luar deuhdeuh
A fahniang ngaih a zual sinsin

Vehvaitu a nei mal sinsin
A tuang timsaktu an har vivo
A thin muril in fahniang a hlam sinsin

Suun ni rei a ti, zaan khua tawi a ti
Fahniang aanka hlam in a hngak
A zuun ngai khal a luar sinsin

A rim a thlengaw vivo
Cule a vun pawl khal an dor sinsin
A thinlung khal a hlo vivo

Fahniang zuun a ti
Man neilo milai ah a ret aw
Lu suun silo in zuun khung a tuar

Tluang dang ah maw!! tiin a tap
Fahniang ih ‘NUNU’ ti kawh lai a ngai
Zaan reh riaklang va awn lawng a thei

Pialral ram lam a naih vivo
A hlam ‘NUNU’ tiih kotu fahniang
A lu dom sak ding hngak in

A rapcung ih a thil phreh mi an mawr
Fahniang hrang tiin a ui suum hrih
Tlunzai rello a duat fahniang cu!!

A siahrel ih Ro thilthuam pawl
A buk sung ih a hlawnthil tha tla
A seherhlo, A fahniang aanka a hlam

Thlapa thul zaan tam a siar
Riaklang va awn zaam tam a ngai
An thlim theilo a zuun khung nat

A semmawng te awih sal a duh
A fahniangte pom sal a ngai
Tlunlai rello a duat fahniangte cu

Kum tam liam ding a tih sinsin
Zaan tam kim ding a ruat ngam lo
A duat te kut ih dawm ta lo ding a phang

Cutin ninu a liam vivo!
Tlunlai tiimlo a fahniang aankhat hngakin
A zuun ngainak hlafing a peh vivo

Laizuun
10/5/15
2:57

++++++++++++++++++++++++++++++++++

SUNGNGEN KA NU

Semmawng laicaan i pom, i cawi
Thlaphan um lo a thlahnuai ah
Dawtnak mit thawn i zoh tlaitluan
Hawidang bang tuk’n mawi lo hmanning
A hrang cerlian ninu ka iang.

Par caan neimi ram tuu par bang
Ka nu khalin par caan a nei
Duhnung lengno a rak si dah
Zanhmui par bang a rak hmui dah
Par mawi lakih mawibik ka Nu.

Keimah nunnak pek ding hrangah
Thihnak khamtlang a rak zawhsuak
Sun le zan in a danglam lo
Ni tam a liam a hnget sinsin
A duhdawtnak a thuukzia cu!

Um awl nei lo’n hrinhniang ka hrang
A sur sa ah rianhrang a țuan
Mithmai pantei’ i hmuak țheutu
A thaw hleice ka nui’ suan rawl
A mawi hleice ka nui’ thiamțelh.

Khuanui’ hnenah thlaza ka cam,
Thlawsuah hmu in damsau hram seh!
A hmai vun sawng’n duh thla a la
Tar pawl mawinak lukhum a khum,
Mawinak tinkim kengtu ka nu.

By/ Mai Daidim

11233772_823898244364848_7972891996336994016_n

++++++++++++++++++++++++++++++++++

Nu

Nu timi cu ka Nu
Ka nu cu keimai’ Nu
Nu dang an um maw si
Ka nu cu nu ngaingai asi

Ka nu cu hmin dang a nei lo
A hmin cu “Ka Nu” a si
Asinan “Nu” tin ka ko
Nu hmuahhmuah ih Nu

Ka pa a neh ringring
Ka nu cu mi neh daan a thiam
Minung thinlung a thei
Ka nu cu dawithiam a si

Hram thiamnak thawn i ko
Seherhnak thawn i kawk
Nauhak ringring aw I ti
Na nu I thei lo I ti theu

Ka nu cu ka ngam
Ka kawk ve men
Cule thin naa thawn I zoh
Cule, ka biangah dai a for

Ka nu cu bank ah sum a khawl
Ka pa hrang a ret sak
Banhla a uam
Kan rapcung bankah ziangkim anei

Ka nu cu Pathian in a zoh theu
I bum thei lo ding in ti theu
Pol nei vek tla a si
Ka hrangah ziangkim a tuah thei

Ka nu hi Pathian a si maw ka ti
Asilole, ziangah hitin thazang a nei
A tuah thei lo mi ziang si um
Ka hrang ziangkim a nei

Phone ih biak le tap suur theu
Ka dam rei lo ding na ti theu
Na fa hrang ka Pathian na si kha
Na hrang ah ka zuam ve

Na caan ah kei ka nuam
Ka caan ah kei I hngak tuul
Kei cu na fa ka siih ka lo neh Lo
Ka upa thei lo na hnen ah

Nui’ ni lawngah ka lo duh asilo
Ka hrang kumkhua ka nu na si
I hmuh lo khalle i thei kha
Ziangah cutin ka um men ding

Uk Lian

++++++++++++++++++++++++++++++++++

“DUHKIMNAK KA NU”

Duhham zetin ka dil ttheu ka Nui’ hnehah,
Duhkhung zetin ka beisei ttheu ka Nui’ thilpek,
Duhtawk nei lo’n ka ngenhai ttheu ka Nui’ hlawnthil,
Ka Nu’h duhdawtnak le ankaa thlum in a daih lo.

Hmaisong le zawnruat khal thiam lo’n,
Ka duh caanah paisa, thil dangdang tla,
Ka nu cu bangzet in rethei hmansehla,
Ka duhthu kimter duhah duhthu ka sim.

Tahtthim ruallo duhdawtnak,
Ngaihthiamnak, duhsaknak le zangfahnak,
Ziangtal man dil lo le hlawh fial lo ten,
Siangnak lungthin thawn ka nu cun,
Ziang hmuahhmuah i pe siang ringring,
Ka Nu hnakih ropisawn minu um nawnpei maw,
Duhkimnak Ka Nu.

-Amoschin Bk

++++++++++++++++++++++++++++++++++

NU NU

Nu Nu,
Na pum sungah,
Thla kua sung in pai hnu,
Harnak le natnak tamzet thawn,
I hringtu Nu Nu ka lo duhdawt tuk.

Nu Nu,
Fate mi bang duhah,
Lamzin tinkim in sialsak ih,
Fate hrang uimi zianghman nei loin,
In cawmtu Nu Nu na sung hleice ka hrangah.

Nu Nu,
Leitlun ah Nu,
An tamzet ko nan ,
Ka hrang nang bang um lo,
Leitlun Nu zate ah mi hleice Nu Nu.

Nu Nu,
Nang le kei hi,
Nu le Fa si dingin,
Khua in khansaktu Cung Pathian,
Kan thangthat ringring ding aw Nu Nu.

Caleb L. Ciluai

++++++++++++++++++++++++++++++++++

Porh le lomtlak NuNu

Sun ni ling so saang lak
Thlanhri baksen tla in
Lo rih phah Cing
Kan thlam sungah in hlum.
Nunu’i hnawiti hlam in
Ka ṭah caan ah
Tawlu mang lo’n
A khul ṭhat suah in
Fahniang Ka hnen i pan.

NuNu in a ṭangah bom in
Hitin i awi…
“Ka naute hi ee mi’h mit hmuh ah
Zawngte hmaibaal bang ee an ti
Kei ka mit ah cun ee
Silkiringcin te si ta ee…”ti’n
Porh le lomnak thawn
In rak awi ṭheutu NuNu

Ṭim zan aw thawng reh caan
Mitin zau hngilh an rel
It duh loin Ka ṭap ka ṭap ṭheu
Sung hno NuNu a ann hai ko
It hmu khop lo cing in
Thlapa vaang tangah
I rak awih hla..

“Thlapi khi ee..
Suak tuunto pei khawh ee..
U Nei lo ee..nau nei lo ee..
A mah te lawng..
Khaw zaa ramkip tawi ee..
Hnianghno ngai in..hnianghno ngai ee…”ti’n i rak awi.

A cuih ka Nu’i aw neem te le
A aw tham diahdo te’n
I thlim ngah hnu cun
Dai khep Ka rak hngilh aw zo.

Na rak Si ve dah maw?

Laisak Zilthli

++++++++++++++++++++++++++++++++++

NANU!

Sunghno nanu zinghmuh tlang bang
A hnget khoh Na duhdawtnak !

Sunghno nanu Ka hrang na zaa na pharh
A kau zet mi tipi thuanthum bang
Na duhdawt nak!

A thlum zet mi khuai zuu pawl cun
Na duhdawtnak fungfek ih thawt nak
An bang si lo!

A kha zet mi thih nak khal in
Na duhdawtnak anka an siat bal thei si lo!

Na anka hrang pawl hi
Zilthli nem bang an sung lawi
Na fa kei ka hrangah!

Santlai lo na fa ka hrangah
A sunglawizet mi
Na thi, Na tha, Na thlan hri sen tla na zuam!

Na duhdawt zet mi Na fa hrangah cun
Sahrang phun kim, Harsatnak lam zin, Mang bang nak pawl cu
Na hnih san men!

Sunglawi Nanu
Leitlun na hmuh ter mi na fa le in
Duhdawtnak thawn
Kan lo sunlawih ding!

Ral tha Nanu!
Duhdawt tu Nanu!
Sunglawi hlei Nanu!

Nu hmuah² Duhdawtnak co hram uh tin

Duhdawt nak thawn

By/ Paiperhte

++++++++++++++++++++++++++++++++++

A cui ka Nui’ dawtnak

Sim thiam ing maw ka Nui’dawtnak
Fur tilian bang len cak zet in a luang
Lainatnak a pai tel ih zawnruah nak a luan pi..fahniang hrangah a tumtah

Fahnianghrang ruatin a thin a bang t’heu
Nan, a hni.. tuar nuam a ti ih a di a riam
Ziangah a mithmai cu a se dah lo?
Bang zet ih a t’uan canah a mithmi a pan thei?
A neih lo mi kha ziangtin in rak pe t’heu?

Ka huatzet t’heu lai ah,
a duhdawtnak in in khuh
Nitin ten ka pum te a puar
Ka t’ulmi a thei ih a zuamzet t’heu
A bang zet t’heu nan a bang dah kel lo
A duh bikmi cu ka ngam ding hi a si
A neih mi cu ka ta an si t’heh
A sian zet mi cu ka dil mi pawl an si

Duat zetin in pawm in cawi e…

Rihli pi kang in,
Run-va pi luang nawn lo’n
Tlang pawl tla t’hawn in,
Ninu tla zup ral thluh hmanseh
A cui ka Nui’ dawtnak cu
A danglam hlei cuang lo ding…

Lal Sang Fan-ai

++++++++++++++++++++++++++++++++++

Nu

Pasal hrang ih Nupi thathum
Innsung sang tulsam tawlrel thiam

Faale hrang ih zohthim tlak Nu
Pathian thu thawn nun mawi zirhtu

Pasal sung pawl ih Mo duh zet mi
Pa’i lam Mai lam zawi en thiam tu

Biaknak lam ih Rinsan mi Nu
Kawhhran hrang thlacam taimak tu

Nu.. Nanmah hi nan si
Kumkhua in Upat nan phu
Pa hmuahhmuah hring thluh tu

A thaw, a mawi, a tha zaten
Faa hrang nan ti

Albert Chin

++++++++++++++++++++++++++++++++++

Ka Nu’i Hrang Cakuat

Ka lo ngai ka Nu
Ngai reh ti um lo ka Nu
Na ttangsung i cawi lai caan ka ruah ah
Tuih ka khammi lukham tthattha in na ttanghlum bang hlah hai.

Tthanglian dingin hnawiti in i cawm ih rawl i rak fah
Cu lawng tawk lo’n Pathian thu thawn i zirh cawm hrih
Cutluk ih i duhdawttu ka Nu
Ka kaa in ka sim cawk lo na Duhdawtnak.

Cung Pathian hnen na hrang thlacam ka bang lo
Na duhdawtnak ka kaa in sim cawk lo hman ning
Cung Pathian hnen thlaza cam phah in
I duhdawt zia ka nunkhua ah alak in liam hlah seh tiin..

January Van

(Visited 364 times, 1 visits today)

Comments

comments

Comments

%d bloggers like this: