NUI’ CAKUAT

resized_heartNUI’ CAKUAT

Caleb L. Ciluai

Ka duhdawtmi Ka Fa,

Ka kum a upa ih ka ni neta lam ka thlen tik ah, thinsau ten in theithiam ko ding ka lo zum. Ka mit a mal ih pakan ka pahkuai pang maw, cabuai par ih tihang ka thaibung pang a si le, in hro lo hram dingin zangfah ka lo dil. Pitar ka si vekin mah le mah kan zangfahaw ringring ih, awlten thia theimi le thin na awl theimi ka si. Ka hna a set deuh ih na tongmi ka theifiang lo pang a si le, thinsau ten in nolhsak aw la, hnaset nu ti ih in ko lo dingin zangfah ka lo dil.

Aw, Ka Fa, ka tar vivo thlang ih, ka riah asia zet a si. Ka khuk pawl an thia ih ka fehcak thei lo a si le, na nauhak te lai ih feh na zir lai, kut ke kai in ka lo hruai bangin thinsau ten in hruai hram aw. Ka tongcia mi khal thei nawn lo in, tu le tu ka nolh rero ih ka lo sim a si khal le, ka ning in ti siang hram hlah aw. Na nauhak lai ah hmuk na duh ih, ka lo leih hlan lo in tu le tu i nolh ter rero kha ka mangsal theu. Ka tar vivo vekin rim khal ka nei men ding. Na rimsia tuk, ti va kholh leuhleuh aw in ti siang hram hlah aw maw. Pitar cu kan tha a mal ih dai kan ngah awl tuk.

Na nauhak lai ah tak na kholh duh lo ih, ka lo dawi rero mi kha ka hngilh thei lo. Ka fa, hnatuan na buai tuk ti ka lo thei ko. Asinan, can in pe hram dingin zangfah ka lo dil. Can in pe theu aw la in biak theu hram aw. Keimah lawng ka si, biak ding dang ka nei lo. Ka lo ngai tuk theu a si. Ka ni neta lam a thlen vivo ih, ihkun ihsin tho thei lo in, ihkhun lam ih ka um tik ah, tangphah pawl khal ka ciar ter men theu ding. Thinsau ten in tuamhlawm hram aw la, rei ka daih nawn lo ding a si.

Ka thih tikcu a thlen tikah, ka kut te in in kai awla, thihnak hmatong ngam dingin thazang in pe hram aw. Asinan, na riahsia tuk pang hlah. Ka ni neta hnu lam ih ka fehnak ding cu, in sersiamtu ka tong ding a si. In sersiamtu ka ton tik ah, a hna kiangte ah “Ka duhdawtmi ka fate khi in thlawsuah sak hram aw” tiin ka Bawipa cu ka dil ding. Ziangahtile, Nu duhdawttu na si ruangah asi. In zohkhennak parah ka lungawi tuk. Ka lo duhdawt a si Ka Fa.

Na Nu

Hminsin : Sayamah Deborah Mawi in, May 13, 2012 ih a sermon mi ta laksawngmi a si.

(Visited 155 times, 1 visits today)

Comments

comments

Comments

%d bloggers like this: