Nuclear Thu Ih Biak Awk Nak Ah North Korea Tel Tum Lo

Nuclear Thu Ih Biak Awk Nak Ah North Korea Tel Tum Lo
 
North Korea in tui thla April  ni 5 ih Rocket a kahsuak ruangah UN Security Council cun nasa zetin a sawiselih hremnak pekzo mi ih tlunah hremnak pekbet a tumthu mizan sunah thu suahnak a tuah. Himi ruangah North Korea cun Nuclear Programme thurel nakih a teltum lothu a suahve ih Nuclear khawlpi a cawlhter ciami khal ti nunsal a tumthu a puang.
 
Norh Korea Foreign Ministry thupuangtu cun  Nuclear ralthuam titawp dingih biakawk nakcun North Korea hrangah umzia a nei theilo ih UN thilti dancu North Korea mipi zalen nak pahbal leh  mipi hmuhsuam nak asi ati. North Korea cun US, China, Russia, Japan, South Korea, pawlthawi Nuclear Programme thu ih biakawk cu NOrth Korea hrangah thil ttulnak a umlo ih  hi rampawlih thurel cakmi in North Korea duhdan cu a ti danglam cuanglo dingih  North Korea kekar nak khal a ttembet thei cuanglo dingih North Korea cun Nuclear ralthuam lakih si humhim awknak lamzin a hawl ko ding asi ati.
 
UN Security Council cun North Korea in tuithla April 5 ih Rocket a kahsuak ruangah  hremnak khoh sinsin ih fehpi a tumih sumpai leh ralthuam lamih North Korea hremnak ding thu rakrel cat zomi cu a taktak ih hmang dingin  Council cun UN Sanction Committee thu a pe cihzo.
 
South Korea khawpi Seoul ih BBC Correspondent John Sudworth cun  North Korea Foreign Ministry ih thusuah micu a khoh zetih a liamcia kum 6 ih thurak relcat zomi pawlkhal a pahbalsal thluh asi ti. Asinan himi ruangah biakawk salnak ding lamzin a pit ticu a um cuanglo tiah BBC cun a sim.
 
Relzo vekin North Korea cun Rocket a kahsuak micu vansang biakawk nak dingih hman ding  Setellite Orbit ih hunret tu asi ati nan  South Korea, Japan leh US cun Missile kahsuak a tummi khuh phentu ih hman atum tiah an sawisel. North Korea hin Nuclear leh Missile a rakkap suak zo ih tu ah Rocket a kapsuak sal lala ih UN Securityn Council in khohkhah zetih hremnak pek dingin Japan, S, Korea, leh US cun an nawrnan China leh Russia in khohkhah tukih hremnak pelo dingih an ttan ciamco ruangah UN Security Council khalin US, Japan leh S, Korea duhdan vekin a fehpi theilo nak asi.
(Visited 50 times, 1 visits today)

Comments

comments

Comments

%d bloggers like this: