Nu Hrangah Innsang maw Hnattuan?

Šianglianuk Ķianghrol

Nu pawl umkhawmnak group pakhat ah fa nei pek nu pakhat in “nu a sinak ah a hlim thei lo thu, beidong vek ih a um thu, cuvek ih a um ruangah amah le mah khal sualnak nei vek ih a ruatawk thu” a ngan. “Fa a neih hlan ah sum lut ttha hnattuan a nei ih, a hnattuannak khal ah mi thupi le hlawhtling a si thu, fa a neih hnu cun amah le mah zianghman ttuan thei lo, mi thupi lo vekin a thei aw ih nuam a ti lo thu” a ngan mi ka hmuh ruangah, ka siar dah mi cahram pakhat ka vun mangsuak ih himi hi ka ngan.

Aussie ih Ramkulh Tlangbawi Hotu (Chief Minister) a hung si mi nunau pakhat hnenah an sut lohli mi cu fa a neih lo thu a si. Khuitawk hmun, zovek nunau khal si sehla, dinhmun a san vivo, hmun ttha an ngah vivo, an thiam vivo tikah mi zapi ih theih duh mi cu “fa a nei maw?” timi a si. Fa a neih lo ahcun “Hivek pawl a tuah ruangah fa neihnak ding can a nei lo”, fa a neih ahcun “Hivek a tuah rero cu a fa le pawl hrangah can a nei lo ding, nau umtu thawn a tanta ding” tivek in an ti ding. Minung pawl cun ci khatkhat in an rel thotho ding cu a si ko. Asinan an rel mi hi a dik vek a bang lala fawn.

Tui san ah nunau pawl khal fimthiamnak an nei ih, dinhmun ttha, hmun ttha an ngah ve thlang. Asinan hna a ttuantu nunau hmuahhmuah in rel lo khal ih an theih mi a um. Fa ka neih tikah dinhmun ttha ah ka um thei lai pei maw? Hnattuan a thupit can ah fa tansan in hnattuan ka ttheh thei pei maw? Hnattuan le fa note ah zo thupi sawn ah ka ret ding? Pakhatkhat cu ngaihsak sawn a ttul ko. Hnattuan ah dinhmun pakhat ngah ding in thazang le can heu ih zuam hnu ah, fa neih ruangih mai’ zuamnak hmuahhmuah a lak ih a can ding phannak cu, rel suak lo hman sehla, thinlung sungih ruat buaitu nu tampi an um.

Cuvek ih thinhartu nu pawl hrangah cui’ buainak cinfelnak cu kutkai ih innsang dinpi mi pasal hnenah a um ti a si.

Amerika ih canganthiam le ramkhel mithiam pakhat in hmun dangdang ih a hlawhtling mi nunau pawl a zingzoi vivonak ihsin a theihsuah mi a si.

Innsang nei nu pawl hrangah hnattuan hlawhtling neih ding cu pasal parah a tthum aw. Pasal in a hnattuan ziangtluk in a sunsak, ziangtluk in a bawm timi ah a tthum aw. Taktak ahcun neihawk hlan ihsin sut cia, relkhawm cia hi a ttha bik a si.

Sut ding ttha pawl cu:
Ka hnattuan ziangtluk in င somdawl ding?
Ka dinhmun kaisang in hmun tthawn ttul sehla i thlun pei maw?
Fanau kilkhawi ah ziangtin ttuanvo kan tthen aw ding?
Kum ziat an ti ah fanau Tualleng Tlawng thlah a tum?
Ka hrangah, nau hrangah a hnattuan a tthum thei pei maw?
Rawl suan a thiam maw, inn thenfai a thiam maw?
Fa kan neih tikah inn lam hnattuan ziangtluk bom i tum?
Mahte’n suncaw funawk a thiam maw, thil sop, thil ttaih a thiam maw?

A thupi mi dang pakhat cu nunau pawl hi nau um le rawl suan an thiam cuang ti ih ruatnak hi a si. A dik lo. Hivek pawl cu nunau hnattuan an si ti’n hlanlai pi ihsin an ruat, an rel ringring ruangah, nunau pawl ih ttuan ding tiah a cang mi men a si. Curuangah innsang pakhat ah nunau in innsang hnattuan cu keimai’ ttuanvo pakhat a si, keimah lawng in ka ttuan ding, timi ruahnak a thleng hlan lo cu amai’ nun khal a thleng aw dah lo ding. Himi khal hi thlengawk a harsa zet ding. Mipa pawl cu sim lo, nunau pawl lala in innsang hnattuan zate’n keimai’ ttuanvo tiah an hmuh ttheu ruangah a si. Nunau pawl hin innsang hnattuan lawng hman si lo in, nau um le buaipi ding hmuahhmuah khal mai’ hnattuan ah an ruat ttheu.

Asinan minung phunphun, ttulnak phunphun cu a um ko. Inn ah rak um, rawl suang, pasal le fanau ttulsam mi rak tuah ih diriamtu nunau hrangah cun buainak a um lo.

Asinan mah rori hnattuan ih suah ve lawng ah diriamtu hrang khal ah fa neih tikah mai’ hnattuan le innsang ah ziang ka ngaihsak sawn ding ti ih hril a ttul nawn lo. A remcan dan ding a um ko. Mai’ innlam hnattuan le nau um hnattuan kha pasal thawn ttuanvo tthenawk a theih. Mah in ttuan thluh ding, pasal in inn lam hnattuan le nau um hnattuan a thiam lo timi kha phiat hlo in, na pasal sutron aw, relkhawm uhla, anih khal ttuanvo tthen ve aw. A hleice in fanau ttuanvo kha!

Curuangah nunau pawl an hnattuan ah hlawhtlin theinak, zuam theinak timi cu mah ih pasal parah tampi a tthum aw a si.

Credit: IHeartZoe

Comments

comments

Comments

%d bloggers like this: