North Korea Thu Neta

Kaesong

SEOUL ( Reuters ) : North Korea le South Korea ramri nak ih um, Kaesong hmun ih hnatuan North Korea mi pawl cun, Tlawngkai Nihnih Ni ( 9.3.2013 ) ah hnatuannak hmun an panlo thu thuthang ah an tarlang. 2004 ihsin sumdawnnak hmunpi pakhat ih cang Kaesong hmun ih hnatuan lo ni a tum khatnak khal asi fawn.Ziangruangah hnatuan an fehlo ti cu theihfiang asi lo nan, thu um dan zingzoitu pawl cun, hi hmun ah hin North Korea in missile a bun leh tum asi ding tiih ruattu le, Nuclear ralthuam zohfiahnak hi hmun ah a nei tumsal asi ding tiin ruahnak an nei.

Hi hmun ah hin South Korea rammi hnatuantu  le hnatuannak ih tuanvo neitu 475 an um ih, Tlawngkai Nihnih Ni ah khan mi 77 pawl cu South Korea ah an kirsal ding asi tiin South Korea ram thuthang cun a tarlang. North Korea pawl hnatuannak ih an fehlo tik ah, an hnatuannak a tibuai ban viau ih, ziangtin an tuah ding manager pawl cun an theithei lo.  Kaesong ah hin company 100 tluk in hmunkhuar in hnatuannak an nei rero.

North Korea cun South Korea ramsung ih ramdang mi pawl hnen ah ralrinnak khal a pe zo ih, South Korea ihsin tlung theh dingin a sim hai. KNCA thupuangtu ih a puannak ah cun, a tlung duhlo le a tangmi pawl thil pakhat khat an cang asi ah cun a poi zet ding. Ziangahtile doawknak cu zangfahnak tello ih doawknak asi ding tiin North Korea lam cun an puang.

 

(Visited 93 times, 1 visits today)

Comments

comments

Comments

%d bloggers like this: