North Korea Rocket Kapthla Dingin Japan Ralring Zo

March 27th, 2009
North Korea Rocket Kapthla Dingin Japan Ralring Zo
Japan ram Cozah cun an ram tlunah North Korea in  Rocket, Missile, leh Settelite, leh thildang hrimhrim a kaplut pang asi ah cun a kahthlak sak dingthu a puangzo. Japan Cozah Defence Minister,  Yusukazu Hamada cun North Korea in Japan ram tlunih Rocket a kahlut ih rakkah thlaksak theicih maidingin an ram Missile Interceptor cu tinung cia dingih thu a pekzo thukhal a sim. Himi thu hi Japan Prime Minister Taro Aso leh Cabinet Minister pawlthawi ngun ngaih zetih zoh a tumthu khal asim.
Defence Minister Yusukazu Hamada cun  North Korea in a ram tlunih Rocket a kahlut pangih rakkap thla dingin Japan cu a ralring ringring a si ati. Relzo vekin North Korea cun Rocket kahsuak a tummi cu vansang ih biakpop awknak ding asi a ti nan US, Japan leh South Korea pawlcun Missile kahsuak a tummi phentu leh phua hlamih hman a duh ruangah asi tiah an sawisel. Russia khalin North Korea cu ziangvek Missile khal kapsuaklo dingin a simih, Himi laiah North Korea cun  thlathar ih Rocket kahsuak a tumcia mi thu cu a puangbet sal thotho ih North Korea cun a thiltum micu mihrek khatih sawisel mennak ruangah lamzin dangih herter a tumlo thu a sim.
Himi laiah US Secretary Of State Hillary Clinton cun North Korea cu thlathar ih Rocket kahsuak a tummi cu US leh Ramdang pawlin kapsuak lodingih an dil rero ih himi cing khalih a kapsuak thotho asi ah cun US cun UN ah zual a ko tengteng ding asi tiah a sim. Hillary Clinton cun North Korea in vansang biakpop awknak ding leh thildangih hmanding tiih a simmi Rocket kahsuak a tummi hi UN Security Council Resolution 1718 pahbal asiih   Cu ruangah  himi a kapsuak thotho ih US in UN ah zual a ko asi ah cun North Korea hrangah a sawhkawkmi a tumzet ding asi ati.
Pakistan Ah Bomb Puak
Tuizing ah Pakistan ram thlanglam Khyber Agency ih Jamrud ih Mosolman Biak Inn ih thlacam khawmnak an neihlai fangah thihcilh Bomb a puakih minung 48 an thizo ih midang 70 lenglo in hriamhma an tuar. Hi Bomb puakin Mosolman Biak Inn Mosque khal nasazet in a ti ciim thluh ih   runhsuah nak hna ttuantu pawlcun Inn ciim hnawklak ah mithi ruangleh hriamhma tuartu pawlcu lasuak dingin an buaipi rero lai asi. Khyber Agency bial kilkhawitu Tarig Hayat cun himi Bomb puakruangah minung 70 lenglo an thih a zumthu a sim. Pakistan ram thlanglam  ahhin Taleban pawlin Bomb tipuak hi an hmangzetih  Shia leh Sunni Muslim pawl karlak ah buainak a suak ringringih mipi vangtlang pawlcu ningttih leh thla phangin tikcu an hmang ringring asi.
Himi ih tlunah Mizan zing khalah  Pakistan North West Frontier Province (NWFP) ih Hotel ah thihcilh Bomb a puakih minung 11 an thiih midnag 20 lenglo in hriamhma na tuar. Pakistan TV News Channel in a a simnakah hi bomb paitu hin Dera Ismail Khan- Tank District ih Jandola Bazar ih Hotel pakhat ih Tapung pawlin rawl an i khawmnak hmunah a bomb pai mihi a ti puak tiah a sim. Pakistan ram sungah hin Tapung pawl Group dangdang tamzet an umih an mah le an mah khal an rem aw cuanglo ih an that aw ringring asi Himi Bomb puakih thi pawlkhalhi  Tapung minung pawl thotho an siih Taleban hotu Baitullah Mehsud dodal tupawl an si.
US In Afghanistan Ah Ralkap 4,000 Kuatbet Ding
Osama Bin Leden leh a kaih hruaimi Al-Qaida hotu pawlcun  US leh a thurualpi ramdang pawl hnenah buainak rapthlakzet tuah an tum laiih.  an thiti tumdanhi Pakistan ramsungih an relh nakhmun ah an tawlrel rero tiah US Cozah cun a theih zo thu a sim, President Barack Obama ih thilfeh danding lamzin thar a hawlnak ah Afghanistan leh Pakistan ih Misual Tapungpawl  zalenzet leh  duhtawkih an talpawl theinawnlo nakding cu thupi bikih ret asi dingih. Himi ruangah US Cozah cun tuikum June thla hrawngah ralkap 4,000 cu Afghanistan ah a kuatbet dingih US ralkap pawlhin Afghanistan ih ralkap leh Palik pawlcu raldo thiamnak Training thazet in an zirh dingasi. Tuah hin Afghanistan ramsungah US ralkap hi 34,000 hrawng an umzo ih cumi sungah 17,000 cu tui kandung thla ih kuatmi an si,
Afghanistan ramih US ralkap pawl hrangih US Cozah an sumpai a senso mihi  thlakhat ah dollar Billion 2 hrawng a cemih tui Obama ih ruahhman nakthar vek asileh tui an cemzat mi ih tlunah 60% hrawngin a pung ding asi. President Obama cun  Afghanistan ramih Taleban leh Al-Qaida pawlthawi do awknak cun tikcu can ziangmawzat a awh dingih  cu ruangah NATO  ram pawlkhal Afghanistan ah an ralkap kuatbet sal cio dingah ngen a tum.
Iraq Ah Bomb Puak
Mizanzing ah Iraq ram khawpi Baghdad saklam Shaab District ah Car Bomb a puakih minung 16 an thiih midang 30 lenglo in hriamhma an tuar. Cozah thupunagtu in a simnakah hi Bomb puahnak hmunhi Shia leh Sunni Muslim pawl um khawmnak hmun asiih Bus  Stop kiangte ah a puakih mithi leh hriamhma tuar lakah hin nunau leh nauhak ziangmawzat an tel a ti. Bomb tipuaktu hi zohman in an tipuah mi ah an rello ih a sinan Cozah lampawl cun Al-Qaida pawl an zumih asinan theih fiang nak ngaingai an neilo.
Chen Shui Bian Ih Thubuai Court Ah
Taiwan ram President hlun Chen Shui Bian kum 57 in sumpai a i ruknak thubuai cu  Taipei Court cun a relsak thlangdingih Chen Shui Bian hin President a tuanlaiah an ram Cozah paisa dollar Million 15 hrawngcu a nupi thawn an i ru tiah puh asi. Himi ih tlunah an rualpi midang 12 khal himi thubuai thawi pehpar awin thubuai tuahsak an si. Chen Shui Bian cun sumpai i ru ih an puhnak hi thudiklo asiih tui Cozah dinglai Upa pawlin a hmin an tisiat leh timual pho an duh ruangah asi thu a relve.
Nikum ih President ih a tlakih sin Chen Shui Bian cun a mahthlatu Cozah pawlcu  China thuhnuai ih kum ringring leh Taiwan Cozah cu mahte thu nei ngamlo ih China mithmai zoh ringring a si ruangah Taiwan ramin tthanso naklam zin a zawhdingcu a thim a si ati.  Taiwan ramhi kum 1949 ih China ram sung do awknak a thlen laiah China ihsin Independent
a la ih, Asinan tuisunni tiangah China inn Taiwan ramcu a ram pengte pakhat tlukah a ret ringringih  a ttul ahcun ralkap cah nak hmangih Taiwan ramsungih rorelnak neihsal dinghi China cun a rel lang ringring lai asi.
Indonesia Tili Dawlmi A Siat.
Indonesia ramih Tangerang District ih Tili an dawlmi Tilipi cun ruah a sur tamtuk ruangah a kiangih Situ Gintung tipi ihsin tidai a luanglut ciamco ih cu ruangah hi Tili Feet 32 ih sangih dawlmi tili tumzet hin a tuarlo ih a satih tidai a lian ciamco ruangah  Minung tamzet an thiih  mithi ruangh 50 hmuhsuak zo a si   Mithi ruang hawl leh tidai ih tar tahak pawl runsuah nakding hna khal nasazetin tuan rero lai asi.
Hi Tilian hin Cirendue khua a ciim ih  mitamzet an tar tahak lai asi. hi tidai lennak hmunhi khualtlawng veivak pawlih feh ringring nakhmun asiih a kiangkap ih minung pawlih ih that laifangih tidai hi lian asi ruangah mitampi a fenhlo thluh a si, Indonesia Vice President Yusuf Kalla leh Welfare Minister Aburizal Bakrie khalin Vanduai thlennak hmunhi an fehih  mipi bangbang pawlcu bawmnak pedingin an tiamkam. South Jakarta Palik hotu Makmur simbolon cun himi tili a sat naksan hi theih fiangnak a um hrihlo tiah asim nan  BBC Correspondent Katherine Demipoulos cun himi tili cu a reituk zoih thatei kilven leh tuahthat dahmi asilo ruangah tidai tampi cu a tuarlo asi a ti.
India Ram Politics Dinhmun Tawite
India ram Member Of Parliament Lok Sabha Seat 543 April 16 ihsi hrilawk nak neihdingmi ah Political Party leh an hruaitu Politician pawlcu Cozah tuahthei danding lamzin hawlin an buai rero laiih. India ramah hin Political party tamzet a um ruangah Party pakhat lawngih Parlianment Central Cozah tuahthei hi an um tukdahlo. Tui Cozah nak kailaitu Party dangdang kawmkhawm aw Congress ih hoha deuhbik mi UPA leh Opposition lam Party dangdang kawmkhawm awve mi BJP ih hoha deuhmi NDA hi dodal awbik leh cuh aw bik dingih ruahmi an ttheu.
Asinan tuittum ah  Third Front a hungding suakih himi hin tui hril awknakding India ram Politics dinhmun ziangmawzat cu a herdanglam terthei dingah zum asi. Hi Third Front hi Party dangdang kawmkhawm awi ih dinmi asi veih tuithla tirte ih dinmi asinan zumhnakin a tthangcakzetih Congress ih hohami UPA leh BJP ih hohami NDA hrangkhalah an zum hnakih Third Front hin a tibuai zet dingah zum asi. India ramhi Democracy ram ropi zet asinan Political party an tamtuk ruangah anram politics khi a buai zetnak asi.
Hi Lok Sabha Seat 543 hril awknak dingih Inida mipi zumdan leh ngaihdan an laknak Poll ih a lngdan ah cun  UPA seat 254, NDA seat 187, Third Front seat 96 tiah an tarlang asinan himi hi an zumnak men asi. ih Politics timi cu nihnih khat tesungah thil tampi a her awsuak ttheu ih Cu ruangah Cozah tuahtheitu dinghi tuidin hmunah cun zumthu relkhal thil harsazet asi

Comments

comments

Comments

%d bloggers like this: