North Korea in Rocket Kahsuak A Tum Sal Ta

Pu Sum

North Korea Cozah cun leitlun ram dangdang ih mawhthluk leh sawisel nak ngaithlak sak duhcuanglo in  tuithla ni 10 ihsi ni 22 karlak ah vansang hlapi kapban rocket kahsuak a tumsal thu a puangih, North Korea hi daanlo vekin Nuclear ralthuam tuahsuak ih puhmi a si ruangah ram dangdang in hremnak an pek laimi a si.

UN theihpi nakih thutiamkan a tuahmi vansang hlapi kapban  ralthuam test kapsuak nawnlo dingih thutiam kam a tuah hnu khalah North Korea hin tuikum April thla khalah vansang rocket a rak kapsuak zoih khakha a mahcun vansang pârih satellite hun rettu ding tiah a tinan  a kahsuak hnu reilo ta ah a tla salih, a thil tumtah mi hlawhtlinglo hman sehla a thil timi hi leitlun ram dangdang pawlcun an mawhthluk zet.

Tui thla ni 10 ihsi 22 karlak ih kahsuaksal a tum mi khalhi a ram In hnen leh ram dangdang  hremnak a pe laitu pawl hrinhro nakih zum a siih, a kapsuak sal taktak a si ah cun ram dangdangih mawhthluk nazet a tuar dingah zum a si.

China Cozah in An Ralkap Pawl Lawng Kappil Ding in Thu A Pe

China Cozah cun an ram In hnen pawlthawi an cuhawkmi tikulh South China Sea tipi kilhim tu dingih lawng ralkap a retmi pawlcu an ramih an salmicin tipi parih lawngdang vakvai an hmuh micu a sungih thilri leh an dimhmun zohfiang sakih cek dingih thu a pe ih, a ttul a si ah cun kappil mai dingih thu a pe.

Phillipines, Vietman, Brunei, Malaysia leh Taiwan pawl thawi an cuh awkmi South China Sea ah hin China Cozah cun ralthuam tha zetzet thawi thuammi lawng ralkap tamzet a retih, himi pawlin an ram cinih an salmi tipi parih mram danglawng an hmuhmi pawlcu thiarfihlim aw dingih an simdingih an duhlo a silen kahpil sak dingin Cozah in thu a suah, China Daily News in an tarlang nakah himi thuhi hnakum January ni 1 ihsi hmanthok a siding tiah an tarlang.

Phillipines Cozah cun China thusuak hi sawisel cihin  tipi parih khualtlanwg veivak pawl hringhro leh ti lungphang tertu a siih, ram In hnen pawl puartheu zetih palbet tumnak a si tiah an tive.

Comments

comments

Comments

%d bloggers like this: