North Korea in America A Hro

China in IMF Leh World Bank Proramme Ah Tel A Tum Lo

Japan ram Tokyo khawpi ih International Monetary Fund  leh World Bank Programme ih leitlun ram tinkim tonkhawm awknak an tuah miah China cun tel an tumlo thu an simih, hihi Japan thawi ramri thuhla ruangih an buainak ruangah an lungawilo nak langter nakih ruah a si.

Theihcia zovekin  China leh Japan hi an ramri awknak tikulh East China Sea an cuhawknak thu ruangah an karlak boruak hi a sezetih, kan dungthla ah khan Japan cun hi an cuh awkmi tikulh lakih tikulh fate 3 cu an ram ih sumdawng milian minung pakhat hnenah sumdawn nak hmunih hmangdingin saan siannak a pezo ih  Tokyo Governor, Shintaro Ishihara khalin tikulh fate pakhat cu mipi sumpai thawhkhawm mi in ceimawi that a tumih, hihi China cun a duhlo zet.

Japan Cozah thilti dan a duhlo zia langter nakah  Japan ram khawpi Tokyo ih  leitlun ram tinkim aiawhtu pawl sumpai dinhmun thuih tonkhawm awknak an tuah miah Chian ram ihsin sumpai dinhmun thuhla rel dingih an ruatmi China ramih Bank tumbik Peaple`s Bank of China Governor, Zhou Xiaochun leh Finance Minister, Xie Xuren cu himi thu relnak Tokyo ah fehlo dingin khamsal an si. himi ih hleiah China ramih Bank tumbik 4 pawlih aiawh ih an thlahmi fehtu ding pawl khal ttulhter sal an si.

China leh Japan ram ramri tikulh cuhawk nak thu ruangah an sumdawn nak khal tamzetin a thlakniam  phah ih, Japan ramih Motor tuahnak Toyata Company khalin a sumdawnnak  sumpai dinhmun a tlakniam phahzetih, kandung thla ah khan China ramih ihsi a sumdawn nakaih a sumpai hmuhzat za ih 49% in a tlakniam phah manih, Honda leh Nissan khalin za ih  40 leh 35% in an tlakniam phah ih, Mitsubishi leh Mazda Company khalin China ram ihsi an sumdawn nak an tlak niamthu an simve.

Himi ramti tikulh an cuh awknak ruangah  China leh Japan hin himi tipi tluanah lawng ralkap leh  lawngpi pawl an ret ciamco veve thlangih, himi ih hleiah himi ramri rakcuh buai vetu Taiwan khaln Japan ih ka ram a timi tipi sungah a lawng ralkap pawl a thlahlut ve ruangah himi kiangkap hrawng ah buainak sosang a suak pangding ti phan umzet dinhmun ih ding an si. US Secretary of State, Hillary Clinton cun  ramri tikulh cuhawk nak thuah  buainak sosang suaklo dingih himi kiangkap ih um ram pawlcun  neem cuhthei hram cio dingin a ngen hai.

North Korea in America A Hro

North Korea Cozah in mizan sunih thusuah an tuah nakah a hmelma hlun South Korea lamtang America cu a hro ih, North Korea Cozah cun America ram hrekkhat kapban Missile ralthuam an neih tthattawk thu an puang. hihi US cun letcih in North Korea Cozah cu hrosuang lo in leh a ralthuam uansuan pilo in  a ram mipi rethei zawnzai pawl ih eiding tirawl leh ram mipi ih ttulhai mamawh pek tumsawn sehla a duhthu an simve.

South Korea Foreign Minister hlun  tui UN Secretary General, Ban Ki-Moon khalin North Korea Cozah thusuah micu ngaithlak hreh um a tithu leh ralthuam Missile hminih mihrinhro hi ram in hnen thawi buainak suakter theitu a siih,  ram dangdang khalin zumlo nakah an hmanphah dingih, himi hnakin ram in hnen leh  ram dangdang thawi rualrem awknak lamzin  hawlsawn sehla a hrangah a ttha bik leh pawimawh bik sawn a si thu a sim.

UN in Iraq Cozah A Mawh Thluk

Theihcia zo vekin kandung zarh colhni sunih Iraq Cozah in minung 11 a khaithat ruangah UN  High Commissioner for Human Rights, Navi Pillay cun  nikhat sungih Iraq Cozah in minung 11 a khaithat cu pawi a tithu leh himi thuin a thinlung a thir terthu a simih, daan diktakih rorel nak hmangcuang silo ih minung khaithat awk rero hi nunrawn thlak leh suahsual hna a si a tiih, Iraq ramih thahawk nak daan an hman mihi tireh a duhthu khal a sim.

Relzo vekin kandung zarhpi ni ah khan Iraq Cozah cun  minung 11 a khaithat ih minung 10 cu Iraq ram mi an siih, pakhat cu  Algeria ram mi a si. Iraq ramih thah awknak daan an hman mihi leitlun ram tinkim in mawhthluk  leh sawisel a hlawhzet nan an hmang ringring thotho ih, tui ttumih an khaithat mi pawl thawn Iraq Cozah hin tuikum sungih minung 113 a khaithatih nikum ah khan minung 68 a khaithat. tui an khaithat mi pawlhi Cozah siatsuah tumtu leh ram mipi buainak suak dingih forhfialtu ih puhmi an siih, Iraq ramih nikhat ih minung an khaithat tambik ttumih ruah a si.

(Visited 133 times, 1 visits today)

Comments

comments

Comments

%d bloggers like this: