North Korea Ah China PM A Tlawng

North Korea Ah China PM A Tlawng
 
China Prime Minister, Wen Jiabao cu nithun sung caam dingin mizan sunah North Korea a thlengih, North Korea ram hruaitu Kim Jong il thawn an kawmaw cih. Wen Jiabao in North Korea a tlawn naksan hi ram in hnen thawi rualrem awknak leh pehtlaih awknak tha neih tumnak ruangah a si tiah China Cozah cun a puang.
 
Asinan  North Korea Nuclear ralthuam tuahthu pawlkhal a relpi dingah zum a siih, North Korea in a duhdan leh a ngaihdan cun China PM an ramih a caam sungah North Korea hin a puan zum a si. Hi ram 2 hruaitu hi mizan sunah an kawmaw zo ih tuisun ah an kawmawk nakhi an peh salih, China Cozah cun  ram pahnih hna ttuan tlang danding khal an relih thuthlung ziangmaw zat an tuah tlangzo tiah an puang.
 
Thailand Tlangleng A Let
 
Mizan ah Thailand ram Hua Hin District ihsi an khawpi Bangkok panding tlangleng cu a zin a zawhsual ruangah a letih minung 8 an thiih, midang 45 in hriamhma an tuar. Hi tlanglenghi ruahsur nasa zet hnuaiih feh a si ruangah a lamzin a zawhsual ih zum a siih, ziangruang bikah a let timi zingzoi fiang dingin Palik leh thu neitu pawl an buai rero lai.
 
Iran Nuclear Zoh Fiangding
 
International Atomic Energy Agency (IAEA) cun  Iran Nuclear thilri hmunpi cu tuithla ni 25 ah a zohfiang sakding. Hi thuhi IAEA hotu Mohammed Eibaradei cun mizan sunih Iran Atomic Energy Organisation hotu Ali Akbar Selehi thawi thuthangca latu pawl an kawmnak ah a puangih, Iran leh khawthlang ram pawl karlak boruak khal a ttha cakzet tiah a sim.
 
Tui ttumih IAEA pawlih zohfiang sak dingmi Qom khawkiangih Uranium Enrichment Plant cu IAEA pawlin  ram dangdang hrangah thil ttih nung a si maw tiah an zohsak ding. Iran ih Atomic Energy Organisation  hotu Ali Akbar Selehi khalin  tuithla ni 29 ah  Viena ih IAEA hmunpi a zoh veding.
 
Pakistan Bomb Puak
 
Mizan ah Pakistan khawpi Islamabad ih UN Office kiangah bomb a puakih minung 3 an thiih, Midang 6 in hriamhma an tuar. Hi bomb hi UN hnuaiih  World Food Programme Office kiangih tipuak a siih, Palik bawipa Tahir Alam in a sim nakah hi bomb hi thihcilh bomb a silo ih an kammi a si a ti, Islamabad khawpi ah hin a liamcia thla 3 hnu ah buainak a suak nawnlo ih tui ttumhi thla thum hnuih  buainak suahsal voikhat nak a si.
 
 
(Visited 107 times, 1 visits today)

Comments

comments

Comments

%d bloggers like this: