North Korea In US In Raldoawk An Phuang Hmaisa Tiin An Puh

North Korea Foreign minister Ri Yong-ho cun US rampiin kan ram pi thawn doawknak ding hi an phuang hmaisa a si tiin a puh. Culawng tawkloin North Korea ram phukpi in US bomb phuahtu vanzam pawl kahthlak theinak covo khal an nei a si titla in a ti bet.

Hi tiih an puh mi cu US rorel inn raangpi cun a diklomi asi tiin an el cihih anpuhnak thu khal cawlcih dingin a sim cih.

Ri cun ‘US ram piin kan ram thawn doawknak ding hi an phuang hmaisa a si tihi leitlun mipi hmaiah fiang zetin kan theihter duh a si’ tiin a ti. A simbet nak ahcun hitiih raldoawknak an phuan ruangah US raldo vanzam pawl kan ram sung ih zuanglo khal kahthlak theinak covo kan nei a si tiin a ti bet.

US president Mr Trump khalcun hitin a bulpak twitter ah a tar ‘North Korea Foreign Minister in UN ih a sim mi kan rak thei. Rocket Fate Pa ih au aw hmangih a relmi a si ahcun rei nan um nawn lo ding! tiin a tarlang. Trump hin North Korea laltawhrot Kim Jong-un hi Little Roket Man (Rocket Fate Pa) tiin a ko.

A catar mi ah ‘zo ram sawn rei a um nawn lo ding timi cu an mai ram in a thusuhmi lehnak an nei cih a si tiin North Korea rampi aiawh ih  UN palai Ri cun a rak khirh sal cih ve.

US ralthum kilhimnak hmun pibik Pentagon aiawh ih thusimtu Col Robert Manning cun hi thu ah ‘hi vek ih in puhnak an cawlhsan lo ahcun North Korea hrang ih kan khawnkhan cia nak felfai hi President hnenah kan tlen ding a si’ tiin a sim.

An tongkam ih an elawknak ruangah theithiam awk lonak tumpi suak in thihnak rapthlak zet tiang a thlen thei a si tiin UN Secretary General António Guterres khal cun a sim ve.

North Korea in leitlun ramtam huap pawlih nornak le nuclear thacaknak puakter nawn lo dingih an ngennak ziang siarloin kan dung thla iha puah sal thotho ruangah UN Security Council in an ram hremnak hi a tuah sal. Hi tiih hremnak a tuah lawng siloin US in a ram mipi zo poh khal an ramsung ih luh siang nawn lo dingin le sumtuahnak pawl khal cawl thluh dingin a rak tuah.#

– BBC

Comments

comments

Comments

%d bloggers like this: