Nonawn zuamawknak

Tuini December 20, 2008 nazi 2:00pm ah Delhi Lailun Foundation pawl ih hohanak in Advance Christmas cu BCRC Hall New Delhi ah hlunghlai zetih tuahsuak.

Himi ni hi Delhi thiltleng lakah danglam zetmi pakhat a sinak cu tik cucaan khiahmi a kim hlanah mipi cu Hall sungah an khat thepthep zo ih tonak tlenglo in inleng lam ah an ding theh zo.

Master of ceremony a kaitu Salai Uk Lian (Ukte) le Mai Siangte cun mipi 300 lenglo ra suak khawm pawl hnenah caan hman daan ding kimcangte sim phuannak an neih hnu ah Pu Hram Lian Bik in caan upnak a nei.

Thlacam theh ah mithmai soparten Steven Ral Kap Tluang in mipi nan zaten kan lo hmuak timi thu welcome speech a pe.

Laimi ih rinsantlak zetmi Pu Tial Khal hnen ihsin “Thu le hla in kan tang ding” timi nazi hrek a sim hnu ah Rev. Kap Thuah Thang in Lailun Foundation hrangah thlacamnak a nei.

Vatthat ah Laimi in hruaitu lakih pakhat Pu Ro Za Thang cun hi Advance Christmas a rak hmanpi ih “Calai thansonak tawhfung” timi thuthawn pehpar aw in thucah tawi a nei ve. Dr. Run Bik khal cun calai lam le hla khal ih kan thanso a tulzia pawl sim relnak a nei.

Delhi lam Lailun Foundation hotu Pa Ngin Za Pum cun Lailun Foundation thuhla kimcang zetin simfiang nak a neih hnu ah Falam Chin Women Development Society President Pi Hrang Tin Sung in mipi thucahnak a nei sal. Zo cio khalin a sunglawi in a ropi tin an rel celcel.

Ca nganzuamawknak cu hi himi 20 December thlen hlan zarhhnih ihsin zuamawknak neihthawk arak si ih zuamawkmi catlang cu “Ka hngilh theilomi Christmas” timi a si ih, a pakhtnak laksawng a ngahtu cu Mai Thian Ni Dim a si.

Pakhatnak laksawng ih a kentelmi cu India Rupee tawkfang nawn le sunlawinak capi a si. Himi ca ngan zuawmawknak a checktu hi Pastor Run Cung Mang (Malaysia) ihsin a si. Hi’ ni ih hlunghlai zetih a langnak sanbik ih an relmi cu hlasak zuamawknak ruangah a si.

Thangthar nonawn hlir pungkhawm in an mai hlahphuah mi cia, an nganmi hla cu ca phek in zohfeltu pawl hnen ah an pe. Thangthar nonawn pawl in hlasak zuamawknak an nei ding timi thuhla atheitu pitar le putar, nuhak te tiangin an pawk theh.

Hlasak zuawmawknak ih a teltu pawl hi mi 17 lenglo an si ih mi pathum in laksawng an sawng. Hlasak zuamawknak a zohfeltu pawl cu Saya Sui Nei Piang, Pu Hrin Kam, Rev. Dr Khaw Lian Uk pawl an si.

Hlasak zuamawnknak ih laksawng a dawgtu pawl

1st Laksawng a dawngtu : Tluang Cung Nung

(Khua-nu sersiammi kan lairam)

2nd Laksawng a dawngtu : Mai Khuah Hlei Par

(Sim le relthiamlomi lairam)

3rd Laksawng a dawngtu : Salai Lal Mal Sawm Tluang

(Ka duhmi lairam)

Hi hla zuawmawknak ih laksawng adawngtu pawl hin thiamzet in an zai hleiah lai thuamten hla an sak ih an hlasakmi khal an mai phuah a si ih hlei ah a sak tik khal ah feeling zet in an sak a si. Hi (3) pawl khal in sunlawinak capi le India rupee an dawng ve.

(Visited 44 times, 1 visits today)

Comments

comments

One Comment

  1. A tha tuk aw! Maw Pathian kan Chin mi te in hruai sinsin hram. Hla sak thu nan rel mi cu a zoh ka va hiar ve aw. Ca ih an ngan daan in an thiam zia cu malte a lang zo.A thiam tak tak ding tin khal ka zum. India lam in khal kan Chin hla thatha rak suak leh hram seh law tiah thlaza ka cam.
    Ka lungawi…

Comments

%d bloggers like this: