Nolai Caan Ihsin Hramthok

 

August 23

Tlawngkai Nikhat 

Nolai Caan Ihsin Hramthok 

Siar:

Thufim 2 

Ka fapa, ka lo simmi hi zir awla, tuah dingih ka lo simmi kha na thinlung ah ttha te’n khum aw. Cuti’n na tuah asile Bawipa ttihzah cu ziang a si ti na thei dingih, Pathian theihnak cu na hmu suak ding.  – Thufim 2:1, 5 

Kumkhat Sung Baibal:

–   Saam 113-115

–   I Korin. 6 

Nipi Ni zaanriah ei tlang dingin mi kan kim deuh hlan ah mi pakhat cun a rak ei man zo. Cuve te’n kum 3 mi, kan tunu te Addie in, “Thla kan cam hrih lopi,” a ti. Lungawi thusim thlacam kan hngilh pang ding a phaang.        

Addie ih helhkammi cu thil tthazet a si. Addie cu a nauhaklai ihsin a nu le pa in nun daan mawi an zirhnak ah tuah ding ttha an sim ttheu ti a lang. Hih a tuah ttheumi pawl hin a hmailam hrangah huham cahnak hrampi a simi Pathian hnenih lungawi thusimnak le thlacamnak ih man neihzia a theihter.        

Khristian zumnaklam thupiter lo san atu vek caan laifang ih nauhak pawl Khristian nun ih tthanlen pitlinter ding hi thil ol cu a si lo. Jesuh Khrih zumhnget ih rinsan le a duhzawng ih nung dingah ziangti’n kan faa le nau pawl kan zirh ding timi hi nu le pa tampi pawl an mang a bang. 

Thufim cabu ih in khihhmuhmi nauhak kaihhruai daan pawl cu nu le pa ih thusim tthate’n ngai ding (1:8), fimnak cu ziang a si ti thei ding (2:2), hmuhnak le theihnak dil (2:3), Bawipa ttihzah cu ziang a si ti theih (2:5), nu le pa ih thusimmi ciing ringring (3:1), theihthiamnak nei ding (4:1) pawl an si. Nu le pa in an zirh tikah faale pawl in an ciing ringring ih tuah ringringmi daan ah a ra cang (4:1-4).     

Tu le fa nun daan zirh dingah a tlaituk ti a um lo.    – Dave Branon 

Pathian in caan rei lote sung nauhak in pek,

Pathian duhdawt daan zirh dingah;

A felnak lamzin zirh dingah,

A thu awi le thlun dingah.   – Sper 

Na faale pawl thaisun ih an nuncan daan ding cu

Tuni an thinlung sungih na thunlutmi parah a tthum aw.

Comments

comments

Comments

%d bloggers like this: