NLD Party An Tthiat Bal

Burma ram  ralkap Cozah dodal tu Opposition Party tumbik  National League for Democracy (NLD) Party cu tuikum November ni 7 ih Burma ram hrilawk nak  tel dingih an hmin an peklut ve duhlo ruangah thiahbal a si tiah Burma ram State TV cun a tarlang.

Theihcia zo vekin  NLD Party hi kum 1990 kumih Burma rampi hrilawk nakah khan nehzet ih hriltlin a siih, Asinan ralkap pawlin Cozah nak an pe duhlo. Tuikum hrilawk nak dingah ralkap Cozah in rampi kaihhruai awknak ding dan a tuah micu NLD pawlhin an pawm theilo ih, hminpek nakding tikcucaan bi khiah sungih Register an tuah duhlo ruangah NLD cu tthiahbal an si tiah an sim.

NLD Party ih hleiah Party dang pali khal  hrilawk nak dingih cuhtu Candidate hmin an petam tawklo tiah ralkap Cozah cun an puh ih an Party thiahbal sakve an si.Curuangah tuikum November ni 7 ih Buram ram hrilawk nak dingah Partry 42 sung ihsin  Party 37 lawng hrilawk nakah an telding tinak a si. Hrilawk nak ih telding Party hi October ni 31 ihsin TV leh Radio ihsin Campaign siansak an siding.

Tuikum hrilawk nakah cun  ralkap hnuai ih dinmi Political Party Union for Social Devolopment Party hi cak tengteng dingih ruahcia an siih, hi Party lawngin Burma ram, sungih hrilawknak seat umzat an cuh kim theidingih,  hi Party hin Seat1.000 lenglo an cuh thei dingih Candidate  neithei umsun an si.  Tuikum hrilawk nakih cuhtum Candidate tucun mi pakhat hrangah  Registration fee dollar 500 ciar an pek a ttul ruangah  Party dang pawlcun paisa an neihlo ruangah Seat umzat hi an cuhkim theilo ding tinak a si.

Isreal Ralkap in Hamas Hruaitu An Kap That

Isreal ralkap thusuah miin a tarlang nakah West Bank Palestinian pawlih umnakih Hamas hnuaiih Group pakhat Ezzedine Al- Qassam Brigades hruaitu Iyad Shilbaya an kahthat thu an tarlang. Hamas pawlcun  kandung thla ih West Bank ih Isreal minung 4 that tu ah Iyad Shilbaya hi a tawlrel tubik a siih, Isreal ralkap pawlin Iyad Shibaya an thah theinak sancu a unaupa an kaiih Iyad Shilbaya ih umnak in khihhmuh dingin an hruai ih cumi hnuah Isreal ralkap pawlcun Iyad Shibaya cu a umnak ihkum parih a rak it laicu  meithal in voi 3 an kapih cumi hnuah a ruangan lasuak tiah an sim.

Asinan Isreal ralkap pawlcun Iyad Shilbaya hi kan hawlih  a mah in meithal in inrak kah hmaisak ruangah kankah letmi a si tiah an simve thung.

Japan Ram Cabinet Minister Pawl

Japan ram  Prime Minister, Naoto Kan cun an Party Democratic Party of Japan (DPJ) hruaitu ih an hriltlin hnuah a Cabinet Minister tharpawl a puangih,Yoshihiko Noda cu Japan ram  Finance Minister, ah retsal thotho a siih, an Party hotu hrilnakih  a mah cuhtu Ichiro Ozawa ih lamtang Banri Kaieda cu Ecinomic Minister tharah ret a si. Toshimi Kitazawa in Defence MInister a kai dingih Minister dang pawlkhal thlengkual awkter an siding.

Japan ram PM in hiti vekih a Cabinet Minister pawl a thengkual awkter nak sanhi  an ram mipi ih rinsan a zumsawn ruangah a si ding tiah zum a siih, Japan ram rorel nak In hnih ah hin Cozahnak tuah laitu DPJ Party hin Member a neihtam tawklo ruangah Cozah nak kai vivo dingah a phur a ritzet dingih nasa zetih tan a lak a ttul dingah ruah a si.

Comments

comments

Comments

%d bloggers like this: