NLD Hotu Aung San Suu Kyi Shanram Thlanglam A Tlawnnak Ah Taungkyi Myo Ah Mipi Thawn Tongaw

Suu Kyi @ Shan
Published on: January 27, 2014
NLD hotu Aung San Suu Kyi cu Shanram thlanglam a tlawnnak ah Taungkyi myo khawngkyi suh vengah Janury 26, 2014 zanlam 3:00 ihsin 5:00 tiang mipi thawn tonawknak a neih thu theih a si.

Cuih tonawknak ahcun 2008 daan hrampi thawih pehparin mipi thawn thureltlangnak le 2008 daan hrampi ih rem ttulmi pawl relkhawmnak an tuah. 2008 ih daan hrampi remsalnak ding simfiangnak le mipi duhdan relnak cu Taungkyi myo Kyaungkhi suh vengih meipung pian kulh dung thlanglam leiram 13 ih um Kyaut ttalung lamzin, bulram a simi number 184 hmai ah an tuah ih Shan ramkulh thlanglam ih myo a simi Hopung, Sisai,Lwekaw, Namhsan, Moethe, Lynkhe, Nguang Swe, Inle, Yetsaut, Aungpan, Heho, Kalaw, Pinlawng, Phekhung myone pawlin mipum a thawng leng an ra suak thei.

Taungkyi myo mipi thawih an tonawknak ah NLD Hotu Aung San Suu Kyi cun mipi pawl hnenah 2008 daanhrampi remsal ding thawih pehparmi thuhla le NLD party ih lungput pawl khal simfiangnak a nei. Cun mipi lam ihsi thusuhnak khal kimcangten a let thluh. Thusuhnak a lehnak ah Aung San Suu Kyi cun daanhrampi remtthatnak ding hrangah a thupimi party tumpi a simi Kyiankhaiye( ၾကံ့ခိုင္ေရး) le thansonak party( ဖြ႔ံၿဖိဳးေရးပါတီ) le Tatmadaw palai pawl ih lungkimnak in timtuah theih a si cu mi tampi ih theih zomi a si thu le timtuahnak an tuah lo a si cun ziang kan tuah ding timi hi mipi hnenah fiang takin kan hmuh dingih mipi tuar lo ding, nater lo dingin kan ttuan ding a si ti thu pawl khal a sim tel.

Culawng si loin 2008 daanhrampi parih mipi duhdan laknak pakhat an tuah ih a ra suaktu mipi ih 98% cun timtuahnak nei dingin an duh thu an pholang.

Comments

comments

Comments

%d bloggers like this: