Nitin Taimak Suahnak

November 16

Tlawngkai Nihnih

Nitin Taimak Suahnak

Siar:

2 Timote 2:3-16

A hnattuan a zahpi lotu le Pathian thutak thuthangttha dikzet ih a simfiangtu si dingah Pathian lungkimnak ngah dingin zuam aw.    – 2 Tim. 2:15

Kumkhat Sung Baibal:

–     Ezekiel 3-4

–     Hebru 11:20-40

Leitlun huap ttazaw tum thiam (violinist) Midori cun tumtahmi ih thinlung ret (focused) le taimazet ih timlam awk (diligent practice) hi thil tuah suak theinak dingih tawhfung a si ti’n a zum. Kum khat sungah hlasak puai vei 90 ah violin a tum na’n ni khat ah a tlangpi thu in nazi 5-6 sung cu nasatak in a practise ringring. Jane Ammeson in magazine sungih a cahram (article) sungah Midori ih ttongmi hitin a ngan: “Ka hnattuan hlawhtlin theinak dingah nitin nasazet in ka practice ringring a ttul. Nazi paziat sung timi quantity cu a thupi lo, thungai thlakin quality neizet ih timlam awknak neih dingsawn a thupi. Tlawngta pawl ka tong hngai, violin an tum kha kan zir an ti nain thungai thlakin taimak suah in an zir, an zoh dah lo. Na textbook na kau kha ca na zirzoi tinak a si cuang lo.”

Cuih thuhrampi (principle) cu zumnak ih kan nun daan khalah a dik ve thotho. Paul in, “A hnattuan a zahpi lotu le Pathian thudik thuthangttha cu dikzet ih a simfiangtu si dingah Pathian lungkimnak ngah dingin zuam aw,” (2 Tim. 2:15) a ti. Taimaknak cu tuah ringring, thungai thlak ih zuam, daithlang lo tinak a si. Pathian thawn kan pehtlaih awknak a kilkip a huap thluh.

Awnmawi tumtu in a tthabik si dingih a zuam vekin Pathian hnattuantu pawl tla rinsan awk ngamnak thawn Pathian rian ding, a lungkimnak hawl ding, le thiamzet in midang hnenah thuthangttha hmual neizet ih sim ding kan si.

Tuni ah kei hi taimazet in A Thu ka zirzoi maw? Thla ka cam maw? A simmi ka ngai maw? ti’n cek aw ringring ding kan si.   – David McCasland

Ruahsannak thawn kan nung tikah,

Khrih ih ratsaalnak kan hngakhlap;

Taimaknak thawn A thu kan ngainak cu,

Kan thupitbikmi ah a ra cang. – Sper

A Thu ngai dingih caan petu hnenah thu a sim ih,

Thlacamnak ih caan petu pawl cu an dilmi a ngai sak.

(Visited 33 times, 1 visits today)

Comments

comments

Comments

%d bloggers like this: