Nitin Minung 2,000 Thi

8th October, 2009 

Leitlun Ih University Tlawng Ah Asia Thang So 

Leitlunih fimthiam zirnak University tlawng tha hril nakah  America khawmual ram pawlcu nasa zetin an tla niamih, Europe ram pawlleh Asia ram pawlih University tlawngpawl an tthangso thung. Nikumih leitlun University tlawng ttha hril nakah North America ram pawlih University tlawngpawl cu zaa ah 42 an hmubanih, Tuikum ah cun 36 ah an tla niam. 
Himi laiahn Europe ram pawlih University tlawng pawlcu nikumah zaa ah 36 an telbanih tuikum ah cun 39 ah an kaisang.  Asia ram ih University cu nikum ah zaa ah 14 an hmuban ih tuikum ah cun 16 ah an kaisangve. 
Leitlunih University tlawng thabik ih hrilsuah miah Harvard University cu 1 nak a siih, Cambridge cu 2 nak a si. Oxford University cu 5 nakah a tla. Asia khawmual ramih sin  University Of Tokyo cu zaa ah 22 nakih hril banmi a siih, University Of Hongkong khal nikum ih 26 nak kha tuikum ah cun 24 nak a ngahban ve. 

Pakistan Bomb Puak 

Tuisunah Afghanistan ram khawpi ih Indian Embassy leh Pakistan Interior Ministry Office kiangah thihcilh bomb a puakih minung 12 an thiih, Midang 83 in hriamhma an tuar. Hi thihcilh Bomb hi Car ih phurhmi a siih a tipuak tuin Indian Embassy Compound kiangah a tipuak.
 
Afghanistan Foreign Secretary, Nirupama Rao cun  hi bomb puahtu cun Indian Embassy kulhnak hawi a pahbalih a bomb a tipuak ruangah Indian Embassy bomb siat an tumnak a si a ti. hriamhma tuartu lakah Indian Embassy kiltu ralkap 3 an tel. Afghanistan Interior Ministry thupuangtu cun hi bomb puakih mithi pawl 11 cu civil mi an siih, pakhat cu Palik bawi a si tiah a sim.
 
Taliban Tapung pawlcun himi bomb tipuak tucu an mah an si thu an simih, Indian Embassy cu bomb an puah tummi pawl lakih an ngai pawimawh mi  a si thu khal an sim. Kabul khawpi ah hin tuikum August thla ihsin bomb voi 4 a puak zoih, ram dangdang Office kiangkap ih puak an si tlangpi.
 
Kabul khawpi ih Indian Embassy hi kum 2008 July thla khalah Bomb ih puah asizo ih,khami ttum khalah minung 12 an thih ih midang 140 hrawngin hriamhma an rak tuarzo,Cumi hlante khalah himi Embassy hi Bomb ih rakpuah thotho a siih, minung 41 an thi ih midang 147 in hriamhma an raktuarzo.
 
Afghanistan ramih Cozah hnget khoh a um theinak dingah  India hin theihtawp suah in na ttanpi ve ih, sumpai bawmtam bik 5 nakih telban ve a  si, India hin Afghanistan ramih Tapung pawl donak dingah Afghanistan Cozah cu  dollar  Billion 1 leh Million 26 a bawmzo.
 

Nitin Minung 2,000 Thi 

Tui dinhmun ah leitlun ah thahrum suah ih buainak ruangah nitin minung 2,000 an thi ringring tlukih ruah a si tiah Oxfam cun a sim. Oxfam Excutive Director, Jeremy Hobbs cun  thahrum hmangih buainak suak titawp dingin leitlun ram hruaitu pawlin theihtawp suahih an ruahnak leh an thilti theinak an hman a ttul a si a ti.
 
Oxfam thusuah miin a tarlang nakah kum 2006 ihsin  ram dangdang hruaitun pawlcun thahrum suahih buainak timal dingih ttanlak an tumnak thu an simzo nan, Politics leh thil dangdang buainak ruangah  a reh thei cuanglo ih kum 2006 ihsin tutiangah  thahrum hmangih buainak suak ruangah minung Million 2 leh 1,00,000 an thitiah a tarlang.
 

Leitlun Ah Muslim Tam 

 Leitlunih biaknak sakhua zingzoi tu Pew Forum On Religion and Public Life cun  leitlunih biaknak sakhua thluntu neitambik cu Muslim an si tiah a tarlang. Leitlun pumpi ah Muslim biaknak sakhua thluntu minung Billion 1 leh Million 57 hrawng an umih, Himi sungah 60% cu Asia khawmual ih um an siih, 20% cu Middle East leh North Africa ramih um an si.
 
Pew Forum On Religion and Public Life cun hi an thusuah mihi ram 232 sungih sin kum 3 sung an zinzoi mi a siih, Lebanon hnakin German ramah Muslim an tamih, Jordan leh Libya hnakin  Russia ah Muslim an an tamsawn tiah a tarlang.
(Visited 55 times, 1 visits today)

Comments

comments

Comments

%d bloggers like this: