Nitin in le ei thuhla ih cin ringring tlak

Nitin in le ei thuhla ih cin ringring tlak

– Salai Biak Chawn

Cahnak in petubik pakhat ‘ei le in’ thuhla ahhin ‘a thupibik ih an ruahmi pakhat cu ‘fibre’ a si. Fibre timi hi ‘ei le in ding lakih ‘hri le fe’ neitu a si ih, cucu protein, carbohydrate le thau (fat) vek thotho in ‘thil tha tuahtu a si ih, thil tha lo thlentu khal a si ve.’ Ticun, ei le in ding pawl cu, ziangvek tikcu le ziangvek ih tuahmi hril a tha ding’ tiah a hnuaiah tawi famkim theibik ih ngan a si.

Banhla (banana): Leitlun sibawi hminthang le scientist pawl cun ‘nitin banhla eitu cu a ei ve lotu hnakin ril cancer a ngah theinak cu 40% in a mal tiah an ti. Cucu, banhla cun ril cancer kan ngahnak ding khalah 40% lai in rak kham sak thei tinak a si ding. Natnak tuar ih thihnak hmuahhmuah lakah Ril cancer hi leitlun ah mipa in an thihpi tambik natnak a si ih, nunau hrang ahcun thihpi tambik pathumnak a si. Tulai mithiam pawlin banhla sungah ‘Laccin’ timi si phunkhat an hmusuak sal. Cucu AIDS natnak neitu hrangah thil thazet a si thu an rel. Asinan, ralrin ding pakhat a um. Banhla cu ‘a hmin pek, a hmin fangfang, ei a cu thok’ timi hrawngah ‘ei’ ding a si. Cucu taksa hrangih a that lai fang can cu a si. Banhla cu a hmin tuk a si ahcun ‘fructose’ timi ‘thlumnak’ phunkhat a um ih, cucun ‘bacteria’ a rak pai thei. Banhla hi Alu (potato) vek thotho in a hawng (skin) ah ‘potassium’ tampi a um a si.

Raw tuai (bamboo shoot): Fibre nei tamzet a si vekin mithiam pawl cun ‘taksa sungih a rung suakmi ‘hma’ (tumour) tampi a kham thei tiah an zum.

Raw tuai hmuahhmuah hin ‘khatnak’ (bitterness) malte tal an nei ih, cucu phyto-chemical timi le Vitamin B-17 (amygdalins) a neih ruangah a si.

Amygdalins pawl hi hlanlai ahcun ‘thing hram (roots) and hrampi (grass) ihsin sii (medicine) an ngahnakbik a si.

Ahleice-in amygdalins hi Cancer natnak khamtu pkhat a si ve. Asinan, raw tuai cu ‘bur sungih retin thla tampi ret a si ahcun’ a sungih vitamin B-17 cu a ziamral thei. Cun, raw tuai rep (dried bamboo shoot) pawl khalin ‘amygdalins’ an nei malzet.

Cangkha (bitter gourd or bittermelon): Cangkha hin thisen sungih ‘thlumnak’ tampi cu a hlon thei ih, thisen thlum (zunthlum: diabetes) khal a kham thei. Culawng a si lo, nitin kan ei ringringmi ‘cooking oil’ pawl khalin kan taksa a siatsuah lonak dingah thisen a kilhim ti a si. Milai thisin ih ‘thlumnak’ tamtuk pawl rak zohkilbiktu ‘insulin’ pawl cu Cangkha  sungih um ‘protein’ phunkhat ‘charantin’ timi cun nasazet in a bawm. Asinan ‘protein charantin’ timi hi thisen sungih ‘insulin’ bawm dingin thilri dang thawn tuah thei a si ih, cumi hmang tam tuk pawl cu ‘lung natnak’ in an thi thei ti a si. Curuangah ‘protein charantin’ tuah cop hnakin ‘Cangkha ih um cia’ pawl hi olsamzet in ngah theimi an si. Asinan, amu (seed) cu ei tam tuk ding a si lo.

Tuluk kawpi (chinese cabbage): Kawpi phunkhat a sina’n malte a sau deuh. Malaysia ahcun rawl dawr tampi ah ei ding a um. Hmunkip ah lei ding a um. Taksa sungih ‘hliamhma’ um thei pawl rak khamtu a si. Taksa sunglam a daihter (cooling) ih, ril natnak (ril cancer) khal a kham thei. Hlanlai tuluk sibawi pawl cun ‘milai natnak phunkim hi sunglam a sat tuk (hot) ruangah a si’ tiah an zum ih, ‘chinese cabbage’ thawn daihter thei a si tiah an zum. Asina’n, a tawt deuh le a hnah eng tuk (yellow) cun pum a natter.

Fanghma (cucumber): Thlumnak (fructose) nei lo le olsamzet ih zupral thei ‘Fibre’ neitu a si. Taksa sunglam a daihter ruangah ‘natnak tampi’ a kilveng. Rawl tampi kan ei can ah siseh, siti (cooking oil) tamnak rawl hmeh kan ei can ah siseh, a thlum tampi kan ei can ah ‘fanghma’ ei tel ringring a tha. Ziangahtile ‘thisen thlumtertu hminsinnak pakhat ‘glycemic index’ (GI) timi lakah fanghma hi a niambik (lowest) a si ih, cucun kan ei mi thil tampi cu kan taksa hrangah rualrem zet in a umter thei ti a si. Glycemic index (GI) timi hi ‘kan ei mi thilri pawlin thlumnak an neihzat tahnak a si ih, GI ih dinhmun niambik lakah fanghma hi a tel ve. Asinan, fanghma cu ‘ei hlanah faizet ih kholh ta ding a si. Ahnai ruangah zun thawhnak lamzin a bal thei.’

Khasuan rang (garlic): Khasuan rang ih hram (root) ahhin ‘Allicin’ timi milai thisen feh suksohnak lamzin kholhfaitu a um. Milai taksa sungih um mi ‘cholesterol’ tha lo pawl cu khasuan rang hin a hlon thei. Sulphur Amino Acid timi ‘L-cysteine’ a neih ruangah taksa sungih ‘tur (toxin) a ra lutmi pawl cu thlan (sweat), zun le ek lamzin ihisn a hlon suak theu. Culawng a si lo, Amino Acid timi ‘L-Arginine’ timi a nei ih, cucun kan taksa ih tit (muscle) hnatuannak ah cahnak tampi a pe. Natnak pakhat khat kan tuar laiah it that thei loih kan um tikah ‘kan taksa cell sungih um cahnak pawl thangphawkter sal dingin ‘nitric oxide’ kan tul theu ih, cucu khasuan rang ih ‘L-arginine’ timi cun nasazet in a tuan. Asinan, khasuan rang cu ‘a hawng ei ngah lo dingin ralrin a tul. Pumpi le ril reipi a bet thei ruangah tidai lamzin a phitter thei.

Kawl thei (guava): Milai taksa in ‘Vitamin C’ a tlaksam ruangih natnak phunkim a tuarmi pawl cu Kawlthei in tampi a kham thei. Thing thei tampi (apple tivek) hnakin Kawlthei hin vitamin C a nei tam ih, bangnak le taksa thawpnak (stress), lung natnak, thisen niam tuk le sang tuk, vun zawr tuan tuknak pawl khal a kham thei. Kawlthei le a hnah (leaf) ahhin ‘quercetin’ timi sii phunkhat a um ih, cucu ei sual pang ruangih buainak le taksa in a huatmi pawl ei ngah ruangih natnak ‘damternak’ dingah hman a si. Asinan, Kawlthei cu amu (seed) ei lo a tha. Khawlthei mu nei lo (seedless guava) tuah rero a si ih, cu pawl khal a thatnak le that lonak thei dingin zir rero lai a si.

Thurban (pineapple): Thing thei hmuahhmuah lakah bromelain’ timi enzyme (fibre) a nei tambik ih, cucu taksa sunglam ih natnak (hma: inflammation) khamtubik khal a si. Asinan ‘bromelain enzyme’ um tamnakbik cu a rah (fruit) sungah si loin a hnah le a kuang (leaf and stem) ah a si ih, zohman in cucu an ei tuk lem lo. Thurban hin kan taksa sungih tidai um pawl cu ‘alkaline’ tidai ah a canter ih, cucun taksa sungih ‘hnawmhnok le bal’ (chemical stained) cu a kholhfaiter. Alkaline tidai in thei lo hrang ahcun thurban hi ei ringring a tha.

Kawlhra (sweet potato): Kawlhra cu phun hnih, a sen deuh (purple) le a rang deuh (yellow-orange) timi a um. An pahnih an thatnak a bang aw ding. Alpha-carotene timi le Beta-carotene timi a nei ih, cucun kan taksa sungih siti (oil) le thau (fat) pawl a zuk thei. Thin (liver) sungih ‘tur’ (toxin) um pawl khal a kholhfaia thei. Asinan kawlhra pawl hi taksa sungah vitamin dangdang vekin a tuah aw lo.

Sengkuang (white turnip): Kawlhra vekin a bulhram (root) lawng eimi a si ih, potassium neitambik thing rah/bul a si ding. Kan taksa sungih um Kaileng (kidney) siatsuahtu le bangnak (stress) in petu, ek bawm (pile) hrang hliamhma tuah theitu le thisen sang (high blood pressure) ih tuah saktubik ‘Sodium’ pawl siatsuahtu cu potassium hi a si.

Comments

comments

5 Comments

  1. U Biak Chawn,

    Na ca nganmi a ttha thei tuk. Ka lungawi tuk.
    Kan Laimi tampi in kan tthanso pi vekin
    Pathian in thlawsuahnak lo pek sin hram seh!!!
    Aman.

    Lungawi teen,
    Isaac.
    Malaysia.

  2. Lal Thawng Hum Sukte says:

    A tha kati zet.
    Run ngan vivo thei aw la kan that pi zet ding.

    A hleice in kan Laimi hrangah cun man-ol si taksa hrangtha si ei in kan thlan thiam a tul in ka thei.

  3. SENGKUANG( WHITE TURNIP) nan ngan mi hi theih thiam ahrzet. Afiang lem lo,lai ca kaldan hmang in,ka faing deuh lo ruangah fiangfai ten inrun sim thei kei maw.Blood pressure nei hrang ah ei atha maw,Maw ei tha lo sawn ha asi timi?

    Inrun sim thei hram.

  4. Dear Vaval,
    Sengkuang hi Lai tong in ka thei mai lo. Potassium a tam zet ih, cuih Potassium cu ‘Sodium’ ruangih kan taksa in harsatnak a tonmi pawl rak khamtu a si. Mizoram ah ziangruangah ‘Pile’ natnak (taksa sungih ek bawm thlangtabik ihsin thi a put) a um kan tile ‘Soda’ um tamnak ‘Sodium’ kan ei tam tuk a si. Mizo pawl cun ‘Bai’ an uarzet ih,.. cucu ‘Soda’ (chingal) thawn suan mi a si kha!
    Sengkuang hi Tuluk tong deuh a si hmang. Malaysia le Singapore ahcun ei ding a um ringring. ‘Water Chestnut’ khal an ti.

  5. Biaka & Siartu zate’n-

    Na ngan tha nasa. Mitampi hrangah theih tha zetmi a si e.
    “Turnip” hi Kawl pawlin “Mungla Uh” an ti thluh mai. Mungla tawba rang,
    a hlum le a sawl ti’n phunhnih a um.

Comments

%d bloggers like this: