Nipi Ni Dang

September 12
Nipi Ni

NIPI NI DANG

SIAR:
Tirhthlah 2:41-47

Dungthluntu pawl hnen ihsin an zir ih ti-rawl ei tlangnak le thlacam thlangnak thawn pawlkomnak an nei ringring. -Tirh. 2:42

KUMKHAT SUNG BAIBAL:
– Thufim 13-15
– 2 Korin. 5

Nikhua ttha Nipi Ni sunhnu khawm ttheh ah ka ke in innhnen vengpa kiangkap ah ka leengvak. Ka vahnak lamzin tluan ah mi pakhat cu hramhring a tan rero ih, “Hello, na dam maw?” tiah a daan kel vekin kan biak aw. Anih in, “Nipi Ni dang a si,” tiah i rak sawn. “Ka innsang hna ka ttuan, thungai thlak ih ttuan si loin ttuan awter,” a ti duhmi a si pei maw tiah nehhnu ah ka ruat saal.

A caancaan cu khawm khal hi a daan kel vekin khawm awkter a si ih Nipi Ni
dang a si ttheu. Kawhhran hmaisa ih zumtu pawl hrang ahcun zumtu dang pawl thawn pehzom awknak an neihmi cu an thathawhnak hrampi a si (Tirh. 2:41-47). Cumi cu kawhhran hmaisabik an thok ih an zate in zumtu thar an silai caan a si. Thungai thlak in an pawlkom aw ringring.

Pathian thawn ton awk ding hngakhlap aw. Pathian cun in tlaansan dah lo (Hebru 13:5). A hmin in kan pumkhawm tikah kan hnenah a um (Matt. 18:20). Nan phurrit thawn Pathian pan uhla Amah cu thangtthat uh (Jeim 4:8).

Pathian thu zir dingin feh aw. Zarh tinte thil thar kan zir ngah lo thei men, asinan Pathian Ttongkam thudik in thazaang pek ringring mi kan si (Saam 119:105). A hnen in thei ding ruahsan aw.

Zumtu dang pawl thawn pawlkomnak nei dingin feh aw. Khristian nun ah pakhat le pakhat kan ttul aw veve a si. Midang thazaang pek aw, an zumnak sawmngiar hngai awla an hrangah thlacam aw (Hebru 10:24-25).

Bawipa, hmante’n khawm dingah
Thungai thlak ih thinlung tharthawhnak in pek aw,
Nipi Ni dang a si lonak dingah. – Anne Cetas

Thlarau rawl ei na duh asile
Pathian Ttongkam hiarhalnak thawn Biakinn ah feh aw.

(Visited 22 times, 1 visits today)

Comments

comments

Comments

%d bloggers like this: