Nigeria Ram A Tlawngta 46 An That

Pu Khuang Lian Sum | Surbung Tlang Thuthang

Mizan zingah khan Nigeria ram Mubi khawpi ih Adamawa State University leh tlawng In dangih tlawngta pawlcu zoti theihlo  misual pawlin Hostel ah luhkhum in tlawngta 46 an thatih  midang tamzetih hriamhma an tuar. University hotu pawlin an sim nakah hi misual ralthuam keng leh ralkap hnipuan hruh pawlhin tlawngta pawlih umnak hostel sungah lutin tlawngta pawlcu an hmin leh an sinak a relterih a hrekkhat pawlcu zianghman tilo in an suahih a hrekkhat pawlcu an thatcih mai tiah an sim.

Hi misual pawlhi zo an si timi fiangtei theihnak cu a umlo nan  Nigeria ramih tlawng in leh zirnak lam Mulsim sakhua fehdan ih zirnak fehter duhtu Boko Haram Tapung pawl an si zum  a si. hi misual pawlhin tlawngta pawl thahnakah meithal leh namte an hmangih, Tlawngta mithi pawlhi Adamawa State University ih tlawngta 26 leh  khawpi sung tlawngdangih tlawngta 20 an si,  himi buainak ruangah Mubi khawpi sungah lengsuah kham a siih, Palik pawlin an sim nakah misual pawlhin Tlawngta pawl an thah hlanah biakawk nak mobile phone an tisiatsak thluh hmaisat ruangah misual pawlih thilti danhi zinzawi a harsat phah tiah an sim.

Hongkong Ah Lawng An Ttaih Aw

Hongkong kiangih tikulh pakhat Lamma kiangih tipi parah khualtlawngphur Lawng an ttaih aw ih minung 37 an thiih, midang 100 lenglo in hriamhma an tuar. himi lawngsungih to pawlhi China National Day hman nakding lawmnak tuahsungmi  zoh dingih feh an siih, Hongkong Cozah ih kilkhawimi lawng pakhat leh Electirc Company lawng an si. Electric Company lawng thu neitu pawlcun himi lawngsungah minung ziangzat an to timi fiangtei theihnak a umlo nan Electric Company lawngsungah cun minung 120 an to tiah an sim.

Hongkong Chief  Executive, CY Leung cun vanduainak thlengah hin minung nungdamih runsuah theimi an um lai kemaw tiah hnattuan rero lai a si tiah a simih, himi lawnghi ziangruangah an ttaihaw tikhal zinzawi rero  asiih, minung 37 ih ruangcu laksuah zo an si tiah a sim. Security Minister, Lai Tung Kwok, cun hi lawng ttaihawk nakih mawhphurtu ttuamvo neitu lawngmawngtu minung 6 pawlcu kaih an sizo tiah a sim.

Hongkong hi tipi kapte ih um a sinan a kiangkap tipi ah hin lawng caangsual leh vanduai nak hi a thleng dah tuklo ih, hi vanduainak thlen nak hmun Lamma khalhi Hongkong thlanglam Km 3 hranwgfangih hla a siih, lawng an ttaih awknakah hin lawnghi a pil ngaingailo nan meiro a tamtuk ruangah  lawnghi a pil maiding ti phangin a sungih to pawlhi tidai sungah an dawp ciamco ruangah mithi an tamphah tiah an sim.

(Visited 114 times, 1 visits today)

Comments

comments

Comments

%d bloggers like this: