Ni Hnih Sungah US President Hril Ding Mi ( Thuro Cazual )

1. Ni Hnih Chungah

Chan Hnin Thui

Kiptuh, Nov 4 zaan, ahcun Barack Obama silole John McCain cu US President asi cang ko lai. Tuni an dirhmun zoh tikah Obama nih a tei deuh hrimhrim ko. 2004 thimnak ah Bush nih arak laakmi ramtthen vialte McCain nih a laak tthan dih hmanhah a tling rih lo. Democrat Kerry nih arak laakmi ramtthen pakhat tal a laak chih lo ahcun thimtu vo 270 a tling lai lo. Cu Bush nih arak laakmi ramtthen pawl ahcun Obama nih a tei deuh lengah Republican nih an laak pengnak ramtthen zongah an itluk hoi cang, a biana ah Georgia cu “McCain lei kal ding” timi in “tlukbak ramtthen” (toss up) ah an chiah cang hoi. Cunak in khuaruahhar ngai awk asi rihmi cu John McCain a ramtthen, Arizona, hmanh ah tlukbak dengmang ah an si cang. Sihmanhsehlaw, McCain le Palin cu an lung a dong nemmam lo.

Vice President Dick Cheney nih McCain cu “ka ttanpi” a ti ve. Sihmanhsehlaw, hi tluk mipi nih an uar lomi pa nih a ttanpimi cu san a tlai lai lo. Cun, California Governor Arnold Schwarzenegger zong McCain nih aa sawm i tukhmun ramtthen, Ohio , ah an kal i bia an chim. McCain nih “Obama cu nan ngunkhuai (tax) an kaiter hna lai, nan ngeihchiah mi a phawtzamh lai” tiah nai hrawng khan a hon chim. Cucaahcun maw asi hnga zei dek, ramhuap kuangah McCain nih Obama a hon neih deuh. Sinain, tukhmun ramtthen (battle ground states) ahcun Obama hmanh a kai deuh. McCain le Palin caahcun teinak hmuhnak ding cu lam a hlat ngaingai ko. Sihmanhsehlaw, McCain nihcun “kan tei hrimhrim lai” tiah a ti peng ko rih.

Obama zong President Clinton he hmunkhat ah avoi khatnak campaign an tuah tti. Cun 2000 lio ah zapi vo tam deuh arak ngah nain thimtu vo (electoral vote) in a tlin lo caah US President asi lomi, Al Gore, zong Obama caah Florida ah bia a chim len. Obama tu cu a tlaihtleng te aa tlaih peng ko: McCain thim cu Bush thim he aa khat. A chel caan ahcun President Bush zong hi zaangfak asi. A van a chia. Amah te a um ko lioah McCain zong nih ipehtlaih a duh lo i Obama chinchin nihcun McCain teinak ah a hman. Obama cu ramhuap le tukhmun ramtthen kuang (poll) hna ah a sang deuh ko nain “a dih rih lo hi mu, philh hlah uh” tiah a ttanhtu pawl a ti peng hna. New Hampshire thimchungnak bantukin ichuahsual a duh ti lo.

Zei ruang ahdah, McCain hi mi tlawmdeuh nih an uar, tihi bia hal awk a tlak. Aruang cu Republican asi caah asi bik ko. Mipi tamdeuh mit ah atu bantuk chawkhelrian lei ah harnak kan tonmi hi Republican ruangah tiah ruah asi, ahlei in Bush ruangah. Cun, John McCain hi mi tam deuhpi nih uarmi le upatmi arak si. Sinain, Obama he an von izuam tikah a sung deuh peng. Cu tikah tei duh ahcun US politics ahcun “chiatnak” “negative” lei kal a hau peng. Cu ti a von tuah ve taktak tikah mipi nih a hlan tawn i an rak uarmi le an rak upatmi McCain asi ti lo kha an hmuh.

Cu lengah, a minung (staff) pawl hrimhrim an mak lo ngaingai. Tahchunhnak ah, Sarah Palin kha McCain rianttuantu (staff) pawl nih “diva” an ti (Diva ti cu a awngmin mi nu “successful woman” asi). Palin nih a duh ve lo i a thilpuan Republican National Committee nih $150,000 dih in an cawk piakmi zong kaa laak lai lo a ti. A tawinak in cun an ikhukkhak. President aa cuhtu pa minung le a Vice President ca thimmi an ikhukkhak ahcun mi mithmuh ah phun dangpi asi cang. Cu lengah, atulio ah McCain nih a chim pengmi “Joe the plumber” kha voi khat cu McCain campaign a tuahnak ah “Joe zong kan sin ah aa tel kho. Joe rak chuak tuah? Joe khui ka dah na um?” tiah an von kawl i Joe the plumber cu arak um celngel lo. Hi thil pawl hi McCain minung pawl santlaih lo hrimhrim an si.

Obama tu cu hi bantuk chuahsualnak cu a ngei rih lo. Mino asi nain a thil ti daan hi a tthiptthep kho tuk (very organized). Cu lengah American mipi tambik nih a biapi bikah an ruahmi cu economy asi. Hi kong ahcun McCain nak in Obama cu an zumh deuh suaumau. McCain le Obama cu thimchungnak an rak thawk kaa te khan naih tein ka zohmi hna an si i Obama cu a thluak a ttha deuh hrimhrim. McCain hi a pasal ve hrimrhim. Obama nih Sept ah $150 million a ngah. Cun nai te ah a um bal lem lomi 30 minute phozaar (commercial) a tuah, $4 million hrawng dih in. McCain nih “biakam letmi in tuahmi phozaar asi” a ti. A dik fawn. Ziah tiahcun, Obama nih zaapi phaisa (public finance) hmang in kaa cuh lai tiah ttha tein arak chim. McCain zong nih a ti ve. Zaapi phaisa hman an ithim ahcun $83 million leng an hmang kho lo. An party nih an tuahmi cu aa dang te asi ve ko. Obama nih zaapi phaisa tu hmang loin amah tein aa kawl tikah $83 M asung nain, cunak a let tam deuh in a hmuh.

Tuni tiangah minung 23 million leng nih vo an thlak cang. A thlami hna lakah Republican nakin Democrat an tam deuh ngaingai. Nain, “ho ca ahdah an vo an thlak” ti cu an hngal kho lo. Cu lengah tu kum cu Republican pawlnak in Democrat pawl hi an tha a chuak deuh hrimhrim. Zaanghleicawi (volunteer) pawl nih tukhmun ramtthen ahcun “vo thlak na duh ko nain kalnak na ngeih lo le na nau zohpiaktu na ngeih lo ahcun, kanmah nih a lak in kan in bawmh lai” tiah an bawmhmi hna caah an vo thla dingin a sawm chih hna. Mipi tamdeuh nih a sunglawi tukmi an vo cu ho caah dah an thlak ti cu ni hnih chungah a fiang cang ko lai.

Comments

comments

Comments

%d bloggers like this: