Ngapih lak ih kaikuang

By: Hniangsinpa

Mizoram mi pawlin kan hmin in phuah mi, kanmah cun kan duh tuk lemlo cu, ‘Ngapih’ tiih kawhawk hi a si. Tlangval le tlangval vun kawhawk ahcun tawhawk olte ding a si. Hmansehla, kei cun thaw ka tiih, kannih raltlan harsa fualfo  pawl hrang ahcun vanrah khi a bang.

 

Hi thu ka ruah ah, harsa ngaingai, eiin ding hman hamhaih tiang dinhmun ka thlen laiah, inn lam in ngapih in rak kuat ih, rawl hmeh thitha ei ding nei lo ti fam cu, ka duh er in ka vun sawk hluaihlo ih, ka mehtok ih kawp cu, duher in ka vun eiih (fala hnen ih ka rim siat ding khal ruat man lawn), cuhlei ah cui ngapih lak ihsin, kaikuang ka keu ngah cu “Aw…leitlun ah hi lo liam rawl hmeh thaw a um ding sawm?” tiin kei, laitlang um pawl an sim theu vek ih, kumkhat veikhat sa ei thei hrang ahcun sa thawbik ah a cang ta riai.

 

Mi zokhal in, kan hmailam can thlir in, ram nuam thlen thei kan zuam cio. Cumi karlak ah kan ram kan vun cuan kir sal theu ih, ningna in kan um theu. Kawl le vai pawl in kan parih an tongkam hmanmi pawl theithiam theh lo hmansehla, a tha zawngin an rel lo ti cu kan thei ko, innsungsang ih pacang tha cu, kawl le vaiin mi aa le fimthiamnak nei lo hmuh in in hmu ih,   kan ram ih degree kan hmuh mi cun hmual a nei thei lo ih, hna tha hmuhnak khalah mi a thlen lo ti khal a thei fiang tu kan si.

 

Kan Lainu pawl (A hleice in fala) nun kan zoh tikah, kan pamhmai, ziang ti sak thei le nei cuang ta hla   tuah thei mi nei cuang hlah.Kawl le vai tlangval in in thur sak cu naa kan tiin, kan duh lo nan…ziang ha maw, cu kawl le vai pawl kan thik ih, kanmah kan zohaw lo maw si? Nun simtu ding kan um cuang sawm? ‘Sualnak nei lo tu cun in deng seh’ ti tongkam in fala pawl in in rak sawn sehla, ziang ha kan sim thei ding? Ziang ha a hram tiin kan vun zoh ih, kan duhhamnak a si ko nan, kan Ram ruangah a si bik ko.

 

Ram harsa, a minung um khal harsa, kan fimthiamnak khal hrasatnak in thlentu men, kan hmuhmi pohpoh tuan ngam lo tu ih mi suah tu men an rak si. Cui harsatnak pawl hmuahhmuah cu, kan ram ruangah si hmansehla, ngapih lak ih kaikuang sar vek in, harsatnak lak ihsin Raltlan sinak kan nei thei ih, cumi cun ramnuam ah mi thlen in, fimthiamnak lam ih rak thangso cia pawl hnen ihsin kan zir thei phah. Cui kan fimthiamnak cun, kan ram sungih um, kan unau raltlan si ve lo pawl hnenah, “Ngapih lak ih kaikuang” sinak kan neih thei tikni hngahhlelh a va um so…….!

 

Comments

comments

Comments

%d bloggers like this: