Nga ihsin Zirnak

March 3
Zarhte Ni

Nga ihsin Zirnak

Asinain himi pawl thinhengter ka duh lo. Curuangah tili ah va feh awla sio va thlak aw. Na awh hmaisabikmi nga kaa sungah nangmah le keimah hrangah Biakinn ngunkhuai pek ding tawkin tangka na hmu ding. Cumi cu la awla va pe aw,” tiah a ti.
– Matthai 17:27

Bible Siar Ding: Matt. 17:24-27; Mark 11:22-24

Peter hi a nun sung tikcu caan hmuahhmuah ngaikai ih pumcawm awtu a si. Asinan a kaa sungah ngun tangka a ummi nga cu veikhatte hman a hmu dah ngelcel lo. Sikhalsehla Bawipa cun zumtu pawl in, “ziangti’n si pei?” ti ih kan ruah ding a duh lo, ziangahtile tisa daan ih khuaruahnak in zumlonak ah mi a hruai thei ruangah a si. A simmi vekin a thulun (obey) ding lawng in duhsakmi a si. “Himi cu thil harsa a si,” ti’n Peter cun a ngasio tidai sungih a vun thlak zawngah a ruat tengteng ko ding ti cu a fiang, “asinan na sim vekin si ko seh, ka zuam ding,” ti a ttul ko. Cuticun a sio cu tili sungah a vun thlak. Tifingriat sungah nga tampi an um, asinan nga hmuahhmuah in ngasio cu ei duh loin an lan ih a kaa sungih tangka hmawmtu nga pakhat lawngin sio cu a keu ngah.

Bawipa ih ttongkam pawl cu zumnak hrangih thuzirhnak an si ti’n na hmu ko lo maw? Jesuh ih simmi ziangkim cu a cang thei lo ti ziangtik hmanah a um dah lo. A thusimmi zate cu thlarau le nunnak an si (John 6:63). Amah sungih zumnak na neih ahcun Pathian ih pekmi thu hmuahhmuah cu nunnak an si ti na hmu ding. Pathian Thu cu na taksa, thinlung le thlarau hrangah nunnak petu a si ti na zum lo ahcun Amah thawn naihzet in na pawlkom thei lo dingih A Ttongkam khal na cosaang thei dah lo ding.

Minung kan tlaksamnak zawn a um. Kan nun ih zumnak a um lonak san cu Pathian Ttongkam thawn kan cawm awk lo ruangah a si. Nitinte’n Pathian Ttongkam na ttul. Zumnak ih nunnak sungah ziangti’n na lut thei ding? Pathian Ttongkam thawn a khatmi Jesuh thawn na thlarau nun cawm aw. A sunglawibikmi Pathian Thu na cohlan ih mangbangza a nungmi Khrih ih umpinak na co ngah asile na sungah zumnak a um ding. “Zumnak cu theihnak, Pathian Ttongkam theihnak in ra” a si (Rom 10:17).

“Zokhal Keimah i zumtu cu” (John 14:12) timi vanlam nunnak muril kan sungah a um. A zumtu hrang ahcun ziangkim a cang thei ding. Pathian huham ruangah huham nei thei kan si. Na zum ahcun na nunnak ah Satan cu a caang thei lo ding, ziangahtile Pathian Thu in a do. Kan zumnak a cak ih hmual a neih theinak dingah A Thu in pek. Na thinlung sungah na zumfek a si ahcun na duhmi na ttong thok dingih na sim ngammi an cang suak ding. Na thinlung takin na zumfek ahcun na simmi kim na co ngah ding.

Zum ngam in sim ngam aw, ziangahtile rinhlelhnak na neih lo ahcun na simmi poh na co ngah ding.

@ Smith Wigglesworth

(Visited 22 times, 1 visits today)

Comments

comments

Comments

%d bloggers like this: