New Delhi Ih Kawlram Raltlan Pawl Lamzawh Sal

India khawpi New Delhi ih raltlan pawlcun nasa zetin Kawlram Acozah an duhlonak an langter.

New Delhi ih Kawlram raltlan 700 lenglo cun Bus 13 to in New Delhi khawlilaibik nak hmun Janta Mantar ah lamzawhnak nasa zetin an nei. ‘Kawlram ralkap miuk kan duhlo, kan duhlo’ tiah nauhak bik in upabik tiang an au.

Tuitum ih lam an zawhnak sanbik cu Kawlram Democracy ngah nak ding, November 7, 2010 ih hrilawknak ding duhlo ruangah le Aung San Suu Kyi suahter lohli nak ding hrangah tin thu neitupawl cun New Delhi ih kan CT palai hnen ah an sim thei.

India ram sung thuthang lakkhawmtu ziangmawtizat le ram hruaitupawl in an telpi thu khal kan palai hnen ah an sim. An sim vivo nak ahcun India ram hruaitupawl in Kawlram thatnak ding hrangah an theitawk suah ih bawm an duh ringring thu khal an sim tel bet.

Mi 700 lenglo in lamzinpi an zawh tikah mawtaw le lirtheithil dangdang pawl feh nak ding um nawn lo in an kharh theh tiah a hmun rori ih fehtu kan palai cun CT hotupawl hnen ah a sim thei bet. Lamzawh hotupawl le ram dang ihsi lamzawh telpitupawl khalin nasazetin Kawlram an duhlo thu mipi hmai le India kawtthler ah an phuang darh.

November 7, 2010 rampi hrilawknak hin Kawlram mipi hrangah thathnemnak zianghman a suah pi lo ding tiah mipipawl cu an au ih hleiah mibumnak ih an tuahmi thantar puan thar khalcu mipi hmai ah an ur kaang bet. Hotu lam ihsin Dr. Tin Swe, Dr. Run Bik le midang dang pawl in thusimnak an nei.

New Dehli ih raltlanpawl hi nitin hnatuan ih khawsa an sinan tuini cu an hnatuan fehsan in lamzawhnak ah mi 700 lenglo an tel thu mipi lak ihsin kan palai an sim thei bet. Kawhhran hruaitu le politics lam hruaitupawl ziangmawtizat in hi lamzawhnak an telpi a si.

Comments

comments

Comments

%d bloggers like this: