New Delhi Ih CNCP Calai Seminar Report

Chinland Today
Special Report
Salai Snow

New Delhi khawlipi ah Chin Nonawn Calai Pawlkom ih hohanak in Chin Calai Seminar a vei (5) nak cu Living Faith Baptist Church (LFBC) biakinn ah tuni a ni 7 nak tiang nei rero a si. Cutawk ahcun Chin mi Upa Dr. Than Bil Luai le a innsang nu, Rev. Dr. Timothy Sui Lian Mang, Saya Paul Van Hre, Saya John That Luai, Saya Caleb Laltinhrem, Saya B.Lallianthang le Rev.Oral Siang Za Khup pawl cu an rathleng thei ih hleiah Chin mi upa Dr. Pu Sang Ci le Pu No Kap Thang le tla an ra telpi thei a si. Chin calai lamih zirsang le Chin Grammar tuahsaktu, Chin calai a kumkum ih zir ih hliakhlai ih Chin Writter’s Handbook le Teacher Guide nei thei dingih ṭan a laktu pahnih a simi, Dr. Connie Champeon le Dr. Dabbie King, le an rualpi pahnih, Elisha le Sarah letla an rathleng thei ih, cun Rev. Dr. Peter Tow le a rualpi pathum tla an tel ve. Curuangah Delhi um Chin mipi cun an lung a awi ngaingai ih an hlawkpi zet a si tiin thuthang kan ngah.

Thuthang famkim le cipciar

Himi seminar ah zirhtu dingin Saya Paul Van Hre cu Oct 26 ni sun ah vanzam in a ratleng ih, Saya Caleb Laltinhrem cu Oct 27 zinglam ah a ratleng ve. Rev. Dr. Timothy Sui Lian Mang cu Oct 27 thotho, zan ah a thleng. Cule Dr. Than Bil Luai le a innsang nu cu Oct 28 zan ah an rathleng ih, Saya John That Luai cu Oct 30 zanlam ah a rathleng. CNCP hruaitu le Chin mi upa pawl cun a cangtheibik in an hmuak.

Seminar nikhatnak (zankhawm zankhatnak) Seminar khawmnak cu Oct 28 zan ah nei thok a si. Cumi zan ah Rev. Dr. Timothy Sui Lian Mang in thuthangṭha simnak a nei ih inntek pastor Rev. Kap Thuan Thang in chairman a kai. Paakzai in Pathian thangṭhatnak hla cu Mai Esther Zo Par Iang le Mai Mary tei in an nei.

Mipi pawl ih hngah hlap zetmi a si vekin an hlawk pi zet thu le a manhla an ti zet thukhal an sim. Seminar nihnihnak (Sunzir nikhatnak le zankhawm zanhnihnak) Sunzir nikhatnak cu Oct 29 zinglam nazi 11 ihsin zanlam nazi 4 tiang nei in, mipi 80 rasuak in an zir. Sunzirnak zinglam ah Dr. Connie in Introduction of Basic Linguistic a zirh ih, Dr. Dabbie King in Introduction of Chin Grammar a zirh. Zirnak can cu ṭhenhnih in ṭhen a si. Ṭonglettu cu Dr. Than Bil Luai a si. Cumi karlak ah sunrawl, refreshment, einak nei in colh can lak a si. Zanlam ahcun Dr. Than Bil Luai in Paper Presentation peknak a nei sal. Cun a zanhnihnak khawm ah Saya B. Lallianthang in thuthangṭha simnak a nei ih, Rev. Kap Thuan Thang thotho in chairman a kai. PaakzaI thawn Pathian thangṭhatnak cu Mai Zo Par Iang in a nei. Hi zan hnih sung mi khual hmuah sukso le mipi hmuah ṭuanvo cu LBCF mino pawl in ṭuanvo an la.

Seminar nithumnak (Sunzir nihnihnak le zankhawm zanthumnak) Sun zirnak a nihnihnak cu Oct 30 ni ah nei a si ih, Dr. Connie in a zirhmi a peh ih, Dr. Dabbie King khalin a zirhmi a peh ve. An ni phanih in zinglam nazi 11 ihsin zanlam nazi 3:40 tiang an zirh. Mi 100 lenglo in himi ni ah zirnak an nei thei. A zanthumnak khawm ah Saya Caleb Laltinhrem in thuthangṭha simnak a nei ih, Rev. Nehamiah Sui Nei Piang in chairman a kai. Dr. Than Bil Luai in harhdamnaklam le thucahtawi simnak khal a nei bet. Hi mi tlai ah ah CNCP ih tawlrelnak in zanriah cu mikhual zate le CNCP upa pawl thawn hil tlangnak an nei. Mikhual hmuaktu ah DBCF mino in tuanvo an la. Mipi cu calai lam le Pathian thu ah hlawhtling zetin an um.

Seminar nilinak (Sunzir nithumnak le zankhawm zanlinak) Sun zirnak a nithumnak cu Oct 31 ah pehsal a si ih, Dr. Connie le Dr. Dabbie King te pahnih in can an lak ih, mipi mipum 90 in an ra zir a si. Chin calai ah Delhi um Chin mi saya le upa, nu le pa, fala tlangval tampi an rapok ih thusuhnak a phunphun le thulehnak a phunphun thawn zirnak cu thaw le nuam zetin ban cu rel loin zinglam nazi 11 ihsin zanlam nazi 4:30 tiang nei a si. Sunrawl einak khal an nei.

Thusuhnak a tam ih thulehnak pawl thawn cun a ngaitu hrangah hlawknak rel cawk lo a um. Ṭonglettu cu Dr. Than Bil Luai a si. Cumi zan ah Falam Refugee Organization (FRO) in Khuallian zate le FRO upa pawl, le pastor zate thawn komawknak le zanriah hiltlangnak cu LFBC ah nei a si. Zankhawmnak ah Saya John That Luai in thuthangṭha a sim ih, chairman cu Rev. David Mang Hrin Luai in a kai.

Dr. Than Bil Luai in harhdamnak lampang thusimnak le thucahtawi simnak, a innsang nu in thucahtawi simnak tla an nei ih, mipi cun an lungawi in an hlawkpi zet a si. Paakzai ah Mai Eng Nei Mawi, Mai Zo Par Iang le Saya John That Luai pawl tla an si. Mikhual hmuaktu ah ZCF mino pawl an a si.

Seminar ninganak (Sunzir nilinak le zankhawm zannganak) Seminar sunzir a nilinak Nov 1 ni cu zinglam nazi 11 ah thok in zanlam nazi 4:20 tiang pehsal a si ih, zinglam ah Saya Paul Van Hre in Chin Ca Luandan timi le Dr. Than Bil Luai tein Paper presentation an pek a si. Zanlam ah Dr. Connie Champeon le Dr. Dabbie King te thotho in Chin Phonology le Chin Grammar, Chin Morphology, Chin Orthography pawl cu an zirh ih mipi mipum 60 in rasuak in an zir.

Ṭonglettu ah Dr. Than Bil Luai thotho a si. Sunrawl einak an nei ih ning ti um loin zirpeh a si. Cumi zan ah Dr. Than Bil Luai le an innsang nu cu an tlung. Cun Dr. Run Bik cun khuallam ihsin a rathlengtu saya upa pawl cu a inn ah zanriah a dar. Zankhawmnak ah Rev. Dr. Peter Tow le a rualpi pali pawl an rakhawm ih Dr. Peter in thuthangṭha a sim. Saya John That Luai in tong a let. Chairman ah Rev. Kap Thuan Thang a si. Paakzai cu Mai Eng Nei Mawi, Mai Esther Zo Par Iang le Saya John That Luai pawlin an sak ih, Dr. Peter le a rualpi pawlin thumzai an sak. Mikhual hmuaktu cu GBC mino pawl an si.

Seminai niruknak (Sunzir ninganak le zankhawm zanruknak) Seminar sun zir a ninganak cu Nov 2 zinglam nazi 11 ihsin zanlam nazi 4 tiang neipeh a si ih, mipi mipum 45 in an zir. Cumi ah Dr. Connie Champeon in Chin Falam Primer nauhak pawl zirhsawng dan a zirh ih practice rori in leknak le zirhnak a nei  a si. Mipi cu hlim le lawmtak in an zir thei ih, himi zirnak ih a teltu hmuahhmuah hi Chin ca zirhdan ah certificate pek tlak an si tiin khal an rel ih an hlawkpi ngaingai a si. Sunrawl einak khal nei in zanlam khalah zirpeh sal a si. Dr. Connie cu himi zirhnak hi nithum sung zirh dingmi a si, asinan tikcu can a umlonak ruangah nazi malte sung ka zirh a si tiin a sim. A netnak ni a si vekin CNCP lamih hruaitu Salai Thang Lian Mung in chairman ṭuan in lungawithu simnak a nei ih, CNCP hruaitu Salai Ma Zawn khalin lungawithu simnak a nei.

Cun Dr. Connie, Dr. Dabbie, Elisha le Sarah pawlin thucahnak le lungawithu simnak nei in, Rev. Dr. Timothy Sui Lian Mang in lungawithu le hmailam Chin Falam Literature thawn a pehparmi seminar tuah dingih ruahsannak a neihmi (Aizawl, Autralia, Norway, Sweden le USA) pawl a sim ih sawmnak le thucahtawi simnak a nei bet. Cun CNCP cun Dr. Connie te  pali cu laksawng fate takte a pek ih, a pektu cu Dr. Run Bik a si. Ṭonglettu cu Saya John That Luai a si. A netnak ah Saya B.Lallianthang ih thlacamnak in sunzirnak cu lungawi aipuangten an ṭhehsuak a si. Zankhawmnak ah Saya Paul Van Hre in thuthangṭha simnak a nei ih, chairman ah Pu No Kap Thang a si. Paakzai in Pathian thangṭhatnak hla cu Saya John That Luai, Mai Zo Par Iang, Mai Eng Nei Mawi le A Lian nu (Nu Cangte) pawlin an sak. Mikhual hmuaktu cu ZCF mino pawl an si. Cun Seminar cu zankhawmnak thawn peh vivo hrih a si ih Nov 4 zankhawm tiang peh ding a si.

Himi Seminar ahhin cabu a phunphun zuar a si ih, Seminar laksawng tiin a man ol in tla zuar a si. Cumi cabu pawl lakih a larbik tiih reltheihmi cabu pawl cu Chin Writter’s Handbook a si. CNCP in Rs. 150 in a zuar. Cun khawng cakbik cabu tiih record a tlakmi cu Laizun, Dr. Than Bil Luai ih nganmi, a si. Dr. Than Bil Luai in CNCP kut ah a ap ih CNCP cun Rs. 100 in a zuar a si. Cumi cabu uk 15 cu zuar thok veten minute pa 5 sungah a cem a si. Mi tampi in Laizun, Laizun a um lai maw tiin, an hlam rero lai nan a cem thluh. Cun DVD le CD pawl tla zuar a si ih, Chin zuknungthar Khrih Riantu tla zuar a si. Mipi tampi in cabu tampi an lei ih, cabu phurtu Saya B.Lallianthang tlun khalah an lung a awi ngaingai. Cumi lakih cabu danglam zet pakhat cu Sia le Ṭha timi Bible zuksuai cabu hi a si. Nauhak pawl hrangah Bible an thinlung sungih olten a lut theinak dingah a poimawh zetmi cabu ṭha a si.

(Visited 122 times, 1 visits today)

Comments

comments

Comments

%d bloggers like this: