New Delhi Ah Burmese And Enthic Refugees Annual Sport 2012 Thok

Salai Snow
Chinland Today
19 November 2012

Tuzing Tlawngkai Nikhatni, 19.11.12, ah New Delhi ih Chin mi pawlih puaipi pakhat a simi, Winter Sport tiih theihlar zetmi, Burmese And Enthic Refugees Annual Sport 2012 cu zing lam nazi 9 ah neih thok a si. Tukum ih hi leknak puaipi cu Delhi Chin Community Fellowship ( DCCF ) in a hoha ih bawhlung team 11 in an tel. Vallay ball team cu thaisun ah an lek ding. FC (bawhlung team) 11 pawlih hmin pawl cu, Lailun, Buannel, Chin Dwin, Ngalsip (A), Ngalsip (B), Thaicoeng, Zomi (A), Zomi (B), Star, Cinrung le DBA pawl tla an si. Timtuahnak nasa zetin an nei cio ih, phur ngaingai hlir an si.

Zinglam nazi 9 ahcun DCCF upa pawl le a zuam-aw hmaisabiktu ding Lailun le Buannel, team dang le mipi tampi rakhawm in leknak cu thok a si. Cumi ah Pastor Kap Thuan Thang ih thlacam in, DCCF President Pu Tin Duh Thang in thucah a sim. A simmi a thucah cu, “Atu ih a rakhawmtu mipi kan zate in himi hi leknak a si vekin, zuamawknak phunkhat cu a si ko nan, neh duhtuk le mai team in neh rori duhnak thawn lek le zoh lo dingin zangfah ka lo dil. Cun Chin sungah unau pumkhat kan sinak hi hngilh loin lungrualnak suahpi ding hi kan tumtah a si. Mino pawlih duhnak DCCF cun a zawm vekin a lektu mino nan zate khalin, mawi le thianghlimten lek dingih a tumtahtu DCCF ih duhnak cu thlun in a net tiang lek zuam cio uh,” ti’n thu a cah.

A hmaisabik bawhlung lek zuamawknak cu Lailun le Buannel pawl an lek ih, Lailun in goal khat in nehnak a co. Hi teamhnih hi nikum ih champion cuh veve an si. Nikum final ah an zuamawknak ah Lailun pawl in an neh. Tukum puai bawhlung sitnak ih goal thun hmaisabiktu cu Lailun ihsin A Uk a si. Cun Lailun ih zirhtu coach cu Pu Thawng Nei Thang a si.

Hi lek zuamawknak kiangkap ah dawr fate ih thil an zuar. Hi dawr pawl cu DCCF upa pawlin dawrkhat ah 500 in an zuarih, dawrhnih kopcih cun 1000 in an zuar ve.

Kumtin ten hi leknak puai hi tuah ṭheu a siih Delhi um Chin pawl hrangah puaipi pakhat vekah a cang zo. Hi leknak zoh dingin hmunhlapi ih hna a tuantu pawl hmanin an tlung theu. Hnatuan pawl cawl in an zoh.

(Visited 65 times, 1 visits today)

Comments

comments

Comments

%d bloggers like this: