Neitu Taktak

December 27

Tlawngkai Nikhat

Neitu Taktak

Siar:

Saam 95:1-7

Pathian in van le leilung ziang hmuahhmuah Khrih sungin a tuah ih Khrih hrangah finkhawm ttheh dingin a tuah a si.   – Kolose 1:16

Kumkhat Sung Baibal:

–   Zekhariah 1-4

–   Thuphuan 18

Biakinn ah mawttaw cawlh lawknak hmun daih aw in a nei lomi kawhhran pakhat ih thu na thei dah maw? An Biakinn sir ih inn cu Nipi Ni tinte a phitmi dawr a si ngelcel ih kawhhran sungtel pakhat in a mawttaw cawlhnak dingah hman a ngah le ngah lo a sut. Dawr neitu in, “A poi lo. Kumkhat sung zarh 51 na hmang thei. Zarh 52 nak lawng na hmang lo pei,” a ti. A lungawizet nain theih fiang duhnak thawn, “Cuih zarh cu ziangah maw?” tiah a sut tikah, “Zianghman si lo. Nan taa a si lo ti nan theih ding ka duh men,” tiah hmaipan te’n a ti.

Pathian ih in pekmi leitlun thilri le thlaraulam thluasuah a zate hi thei lo vekin um a olte. Curuangah cawl tahrat in Baibal ih in simmi: kan neihmi zate a neitu taktak cu Pathian a si zia kha kan ruat saal a ttul (2 Sansiarnak 29:11). Kan taksa ruangpi hman hi kanmai’ taa a si lo. “Nan taksa ruangpi cu Pathian ih a lo pekmi le nan sungih a nungmi Thlarau Thianghlim ih biakinn a si. Man pek in leimi nan si,” in ti (1 Kor. 6:19-20).

Kan nomnak hrangah ziang hmuahhmuah siangzet in in petu cu Pathian a si (1Tim. 6:17). Thil ttha tampi thawn thluasuah pekmi kan si. Thei lo vekin umsan men loin fimkhurzet in hmangin in pekmi hrangah kan Pa Pathian hnenah lungawithu sim uhsi.    – Cindy Hess Kasper

Pathian ih thluasuah ah kan nom awk vekin,

Oh, hngilh hlah uhsi;

Kan Bawipa, A hnenin laksawng ttha pawl an ra,

Kan ttulmi hmuahhmuah Amah in a nei.   – Fitzhugh

Pathian in thluasuah in pek ruangah

A hnenah sunlawinak kan pek thei.

(Visited 26 times, 1 visits today)

Comments

comments

Comments

%d bloggers like this: