Nehnak Pathian

January 22

Tlawngkai Nili

 

Nehnak Pathian

 

Siar:

2 Korin. 2:14-17

 

Tthat lonak in lo neh hlah seh; tthat lonak kha tthatnak in neh sawn aw. –Rom 12:21

 

Kumkhat sung Baibal:

          Suahlannak 4-6

          Matthai 14:22-36

 

Greek thuanthu sungah Nike cu raalnehnak pathian nu a si. Nike cun Olympia pathian pawl lam ttang in mi cakzet Titan pawl a do ih a neh. Cutiin Nike cu nehnak hminsinnak ah a ra cang. Nike ih huham cu raaldo ih nehnak lawng si loin lehnak lam ih zuam aw mi pawl ih biakmi pathian nu (goddess) ah a ra cang. Leh zuamnak ah nehtu si an duh ruangah Rom pawl in biak dingah an laak ih Latin ttong in Victoria tiah hmin an pek.

 

Greco Roman sanlai ah Paul in thu a zirhnak ah raal nehnak thu hi a sunsakzet. Curuangah Christian zumnak thutak thu a simnak ah a ngaitu pawl ih theih thei ding ttongfang hmangin a sim. A cakuat sungah Khrih cu raaldo neh ding a feh reromi raalkap pawl hruaitu vekin a tarlang (2 Kor. 2:14-17) ih Christian nun cu khuahlanlai olympic leh zuam awknak tel dingin training neihnak thawn a tahtthim (1 Kor. 9:24-27).

 

Paul in hih ttongfang cu kan do reromi le in ti naatu raal nehnak dingah a hmang. “Tthat lonak kha tthatnak in neh sawn aw” (Rom 12:21). Tthat lonak ih an tuahmi cu tthatnak in lehrul ding ti a sim duhsannak a si thei. Ziang a va si khal le duhdawtnak lungput cu mahte in umter theimi a si lo. Asinan Khrih lawngah Pathian ih cahnak huham kan nei. Jesuh Khrih cu nehtu Pathian ngaingai a si.

 

Harsatnak ihsin nehnak a ra,

Krhih ihsin raal nehnak kan co;

A ke hram ah na phurrit pawl rak tthum aw,

A nuamzetmi sunglam daihnak hi co aw.

 

A lamttang in raal kan do tikah Pathian in nehnak in pe ding.

 

Comments

comments

Comments

%d bloggers like this: