NEHNAK AH AN BAWM

November 20
Tlawngkai Ninga

NEHNAK AH AN BAWM

SIAR:
1Peter 4:7-11

Pathian laksawng dangdang kengtu ttha nan si bangtuk in A hnen ihsin
nan ngahmi laksawng cu midang tthatnak hrangah hmang fingfing uh. –
1Peter 4:10

KUMKHAT SUNG BAIBAL:
– Ezkiel 14-15
– James 2

Westen Oregon University team ih softball timi bawhlung lektu Sara
Tucholsky cu Central Washington team thawn an lek tikah a veikhatnak
home run a leknak a si. Asinan lom a co lo zikte. A ttum khatnak ahcun
a thin a phaangtuk ih base a dai ngah lo. A tuah sualmi rem dingin a
nor saal tikah a khuk a tuahmawh aw. Ttap phah in base umnaklam ah rul
vekin bokvak in a feh. Home run lek daan ahcun base a pali tein dai
ngah ding a si. A team pawl in le an bawm thei lo.

Culai ah khatlam team ih base lek thiambik pa Mallory Holtman in, “Kan
phur le a ttha ko lo maw?,” tiah a ti. Ttuanvo neitu pawl an ron aw ih
an zate lungkim in an baan le baan kai aw in tokham an tuah ih Sara cu
an toter ih an phur. Maih zawn lawng ruat loin zaangfahnak thawn thil
an tuahmi parah mi tampi cu an mit-thli a tlak. Cutivek in Sara cu
home run ah laksawng a ngah.

Jesuh thluntu pawl ih zir dingmi thu cu a fiang. Kan Khristian rualpi
an bah ih an tluk tikah hih milek pawl ih tuahmi hi cawn ding a si. An
hnenah feh in cawi awla nunnak lam tluan ah fehpi aw. “Pathian
laksawng …. midang tthatnak hrangah hmang fingfing uh” (1Pet.4:10)
ti ih sim awknak hrangah caan tthazet a si .

Khristian rualpi a bah tikah,
Tho saal dingin bomnak a ttul;
Umsan men loin,
Na za saan aw.

Hih leitlun ah midang thilrit a zaangtertu
mi zo khal mi santlai lo an um lo.

(Visited 19 times, 1 visits today)

Comments

comments

Comments

%d bloggers like this: