Nauhakpawl Electronic Thilri Hmanter Thuhla Ah…

steve
Šianglianuk Ķianghrol
Apple company ih Steve Jobs hna a ttuan lai ahkhan a si. iPad hmaisabik an suah hnu rei lo te ah tonsuhnak ka va nei.

“Na fanaupawl in iPad an ngaina zet ding ti aw,” ti ih ka sut tikah,

“An hmang dah hrih lo. Ka fa le pawl hi inn ih IT thilri hman ding thuhla ah bikhiah ka tuah,” tiah i let.

Ka mang a bang nasa. Jobs ih inn cu IT atcilhtu ih inn a si ding tiah ka rak suangtuah dah. A inn phar pawl ah touch screen an um ding, rawl-ei cabuai khal iPad thawn tuah mi a si ding, kan inn ih ra lengtupawl kan lukham par ih kan ret ttheu mi chocolate pawl kan tthen ttheu vek in a inn va lengtu pawl iPad a tthen ding, tivek khal in ka rak suangtuah dah.

Jobs ih I sonsalnak cu ka rak suangtuah mi thawn a linglet verver. Cumi hnu ah IT company hruaitu le hohatu pawl siseh, le IT hnattuannak ih sumhram phumtu tam zet thawn siseh, kan tong aw. Annih ih in sonsalnak khal Jobs ih i sonsalnak thawn an danglam hran lo. An fanaupawl in electronic thilri an hman ding can ah bikhiah an tuah. A hleice in tlawng kai lai an si ahcun siimlam ih inn an ra thlen khal ah electronic thilri hman an siang lo lawlaw ih, tlawng pih hman ah can tthenkhat ahcun hmang lo ding in an bikhiah ti a si.

Hivek zirhhruaiawknak hin ka lung a hnokter. Nu le pa tampi in an fanaupawl a sunsun zanzan in iPad, smartphone le computer screen tleu sungah an ciahawkter. Asinan cumi IT company CEO pawl cun midang ih theih lo mi thuhla an rak thei.

3D Robotics Company ih CEO Chris Anderson cu fanau panga neitu a si. A fa le pawl cu kum 6 ihsin kum 17 karlak an si hai. An inn ih um mi electronic thilri pawl hmandan ding cu can bikhiah nei in nu le pa in an control.

“IT thiamnak ahhin ziangvek siatsuahawk theinak a um timi ka thei. Cumi pawl cu ka parah an thleng rero. Asinan ka fanau in an ton ve ka duh lo,” tiah Christ Anderson cun a sim. A rel mi siatsuahawk theinak lak ah nauhak pawl in thuhla ttha lo an ngah thei mi khal a tel. Tthimnak ah – zuk borhbah pawl, internet hmang ih bumawknak pawl, asilole cumi pawl hnak ih a siava mi pawl, IT thilri atcilhnak pawl, tivek khi an si.

OutCast Agency ih CEO Alex Constantinople cun a fapa nautabik kum (5) mi cu tlawng pih can lo ahcun ziangvek electronic thilri khal hman a siang lo. Kum (10) le kum (13) mi pahnih cu ni khat ah nazi hrek sung hman a siang. Electronic thilri aiawh ah an duh mi cabu siar sawn ding in cabu za lenglo a ret sak hai.

Steve Jobs ih fanaupawl in electronic thilri an hmang lo asile an hrang ah ziangvek lehnak thilri a um ding? Steve Jobs ih nunthuanthu ngantu canganthiam Walter Isaacson cun hitin i sim:

“Steve Jobs cu a innsang thawn zanriah an ei tlang ringring. Rawl ei phah ah cabu thuhla, sanphung (history) thuhla le thuhla dangdang an relkhawm ttheu. Zo hman in iPad, smartphone tivek an phorh lo. A fanaupawl in electronic thilri an atcilh lo lawlaw a si hmang.”

IT khawvel ih tlangleng dah lo nu le pa pawl cun an fanau pawl kum riat an kim in smartphone an kaiter. IT khawvel ih tlanglengtu nu le pa pawl cun an fanau pawl kum (14) an kim hnu, anmahtei’ mi an phone thiam hnu, message an kuat thiam hnu lawng ah phone an leih. Asinan kum (16) an kim lawng ah Dataflow an hmangter.

Ngantu: Nick Bilton
Link: http://www.85nian.net/shiye/9706.html
Lehnak: Nine Nine Sanay ih Facebook Wall ihta

http://calaideirel.blogspot.com/…/nauhakpawl-electronic-thi…

Comments

comments

Comments

%d bloggers like this: