NATO Ram Foreign Minister, Pawl Tong Khawmaw

US Ram Minung Pali That
Mizan sunah khan  Pakistan ramih North Wazirisatn ih Mir Ali khua ah America ram minung 4 ruangsar a siih, an lakih minung pakhat cu a lu tansak a siih, a dang pali cu an hngawng ah nante ih zai an si.
Himi ih hleiah North Waziristan Province ih Datta Khel khaw kiangah Taliban Tapung pawlin Pakistan ralkap 7 an kapthat ih midang 16 in hriamhma an tuar. Pakistan ralkap thupuangtu in a sim nakah Pakistan ralkap pawlhin nidang ih an ti ttheu dan vekin  Miran Shah khua ihsin Convoy in an suakih,  Datta Khel khaw kiangah Taliban Tapung pawlin lamzin sak ihsin an rak bawhih an rakkap ciamco ih Ralkap pawl khalin theihtawp suahin an kaplet venan, Taliban pawlih um hmunkhuar nak hmunhi a that tuk ruangah ralkap pawlhi duhvek in an cangvai theilo,tiah a  sim.
US Ram Palai Isreal A Feh
Isreal leh Palestinian karlak ih rualrem awknak a um thei nakdingah US ram Palai George Michell cu Isreal ram ah a fehih, Jerusalem khawpi ah Isreal Defence Minister, Ahud Barak a kawmih,  George Michell hin Isreal Prime Minister, Benjamin Natanyahu leh Palestinian  Authority President, Mahmoud Abbas khal a hran te veve in a kawm.
US Department Thupuangtu, Philip Growley in a sim nakah US in  Isreal ramih Palai a thlah nak sanhi Isreal leh Palestinian karlak ah buainak sosang a um thar ruangah silo in US in ruahman nak a rak tuahcia mi a si ruangah a si a ti.
US palai George Michell in Isreal a thlen hnu ah Isreal Prime Minister, Benjamin Natanyahu cun  rualrem awknak hawlih Palestinian pawl thawi biak awknak neih a tumlo thu leh  East Jerusalem ih Juda mi pawlih umnak ding Inn sak an tummi bansan an tumlo thu a rak puang betsal.
Isreal Prime Minister, Benjamin Natanyahu cun a liamcia kum 46 ihsi Isreal Prime Minister, rak ttuan zotu pawl hmuahmuah in  East Jerusalem ih Juda mi pawlih umnak ding Inn sak nakding thu ah ram dang duhdan an rak thlun ringringih, Asinan kathu neihnak hnuaiih Isreal a um sungah cun himi thu ah ramdang duhdan kan thlun thei lo ding a ti.
Bangkok Bomb Puak
Thailand ram Cozah nawrthlak tumtu Red Shirt pawlin buainak an tuah nakcu colh kar sarih hnu khalah a reh thei cuang hrihlo ih, Bangkok Media pawlin an tarlang nakah tihni zan nazi 9 hrawngah Bangkok khawpi Financial District pawimawh Silom ah Bomb 4 a puakih minung 5 an thiih, midang  100 lenglo in hriamhma an tuar tiah an sim. Asinan  Bangkok Erawan Emergency and Rescue Center cun  minung 1 a thiih, midang 87 in hriamhma an tuar tiah an sim vethung.
Media pawlcun  Bomb pakhatin  Thailand Commercial Bank tumbik Bank Headguarter a ngahih, himi kiangkap ih rak um minung 20 ih hriamhma an tuar tiah a sim. Bomb puakin Sala Daeng Skytrain Station sawng 3 nak Sky Walk leh Dusit Thani Hotel khal a ti siat,
Central for the Resolution of Emergency Situation (CRES) Thupuangtu, Sansern  Kaewkamnerd in a sim nakah Bomb puakhi M-79 Grenade a siih, hi Bomb hi Suanlum( Nigh Bazar) ih Opposition Red Shirt pawlih umnak hmun  Silom ihsi Km 1 ih hla ihsin densuah mi a si tiah a sim. Duputy PM, Suthup Thaugsuban khalin  Grenade bomb hiRed Shirt pawlih tipuah mi a si tiah a sim.
Himi thu ah Thailand Prime Minister, Abhisit Veijjajive cun  Urgent Meeting a ko cihih, Bomb puahnak hmun leh a kiangkap ih kilhim nak hna ttuan dingih ralkap pawl bawmtu dingah Palik leh Helicopter a thlahcih.
Hiti vekih Red Shirt pawlin buainak an tuah vivo ruangah Britain, US, leh Australia pawlcun an ram minung pawlcu Thailand ram tlawng hrihlo dingin an cahih, UN Secretary General, Ban Ki-Moon khalin Thailand ram buainakcu a ti rehdan  ngaihtuah zamrang a ttul a si  a ti.
Iraq Bomb Puak
Mizan sunah Iraq ram thlanglam Anbar Privince Khaldiya khua ah Bomb a puakih minung 7 an thi ih midang 7 in hriamhma an tuar. Bomb puahnak hmunhi Anbar Privince khawpi Rammadi ihsi Km 25 ih hla Khaldiya khua ah a si ih, Bomb tipuak tu misual pawlhin Palik bawi pawlih umnak leh  Anbar Province Judge in umnak Inn karlak ah an kamih  mithi lakah Palik bawi leh Judge khal an thitel.
NATO Ram Foreign Minister, Pawl Tong Khawmaw
Afghanistan ram ihsi NATO ralkap pawl lakkir saldang thu relkhawm dingih NATO ram Foreign Minister, pawlcu Estonia ram khawpi Tallinn ah an tongkhawmaw ih, Himi ah Afghanistan ramih NATO ralkap 90.000 umlai pawl lakkir sal dan dingleh Afghanistan ram ih Cozah hngetkhoh a um theinak ding thupawl an reltlang ding.
NATO hotu Anders Fogh Rasmussen cun  NATO in a duh bikmi cu Afghanistan ramih Cozah hngetkhoh a um theinak ding leh  buainak leh hro awknak pawl tireh a siih, Mipi thin daitei an um theinak dingcu NATO in a duh bikmi a siih, Curuangah  Afghanistan ram ihsi NATO ralkap pawl laksuah nak dingthu relkhawm si hman  sehla cuti lok maiih  NATO ralkap pawlhi Afghanistan ram ihsi laksuah theih an silo ding a ti.
(Visited 36 times, 1 visits today)

Comments

comments

Comments

%d bloggers like this: