Nato In Syria Chemical Hriamhrei Ralrin Pek

Nato Secretary General Anders Fogh Rasmussen in US President Barack Obama hnenah Syria acozah in chemical hriamhrei pawl hmangin an mipi pawl an kap lonak dingah ralrin pek dingin a dil. Brussels ih Nato ramleng minister pawl meetingnak ah Mr Rasmussen in Syria in chemical hriamhrei a hmang ding cu ziangvek kongzawng khalin kan cohlang thei lo tiin a sim. Russia’s Ramleng Minister Sergei Lavrov khalin meetingnak ah a telve ih Syria in chemical hriamhrei a hmang ding cu ziangti kongzawng khalin kan cohlang thei ve loih, leitlunpi huap lungkimnak cu a thlun a ṭul a si tiin a sim ve.  A cuih meeting ah nitlaknak ram raallam ṭangkhawm pawlih ramleng minister lawnglawng 28 an tel.

2011 March ihsin President Assad dodalnak an ṭhok ih tuni tiang mi 40,000 hnakih tam an thi zo. A thawngtel in an ram an suahsan rero. Million 2.5 pawl cu an umnak ihsin hmundang ah an ṭhawn zo. Nato in Patriot timi missile pawl vantlun ih kapsiat theinak hriamhrei cu Turkey ram nisuahnak thlanglam Ankara kiangkap ah ret ding a duh. Turkey cun Syria buainak hi a ṭhang vivo ding a ṭih zet. Ziangahtile atu khalah an ramri pawlah siatnak a suahpi rero ruangah a si. Atufang ahcun Nato in Syria tlunah vanzam zam theih lo tiin kham dingin ruahnak an nei rero.

Curuangah President Obama khalin Syrian President Bashar al-Assad cu chemical hriamhrei na hmang ahcun cumi ih suahpimi le thilcangmi cu na hmaton hrimhrim ding, kan lo zoh men lo ding tiin ralrinnak a pek zo. Obama cun, “Leitlunpi in kan lo zoh ringring. Chemical hriamhrei na hmang ding cu kan cohlang thei hrimhrim lo,” ti’n Washington ih National Defense University ih thu a simnak ah a sim. Syria acozah cun chemical hriamhrei cu kan nei lo ti’n an let ve.

Comments

comments

Comments

%d bloggers like this: