Na Thinlung ah Midang Ret Ve Aw

person-having-a-red-heart-attack

Tuluk canganthiam hminthang pakhat in German putar pakhat ih inn a sang dah. (Annih lam ahcun inn an san tikah thilri pawl kha inn neitu in ret sak thluh dan a si). Ni khat cu canganthiam cun rialno (glass) pakhat a kuaiter pang. Curuangah phone thawn German putar cu a hei sim.

Cutikah putar cun, “A poi lo e. Ti pang thilthu a si si. Khavek rialno cu a man tla a khung lo. Thaizing ah pakhat ka rak lo pe sal ding,” a ti.

A thaizing ah putar cun rialno cu a va pe. Inn sung a vung lut vete’n, “Rialno kuai them pawl teh?” tiah a sut cih. Cutikah canganthiam cun, “Ka phiat ih a leng hnawmbawm ah ka ret zo,” a rak ti.

Cuvete’n putar cun sangka a ong sal lohli ih, hnawmbawm cu a va ong. Cu thluh ah dunglam ra her sal in, “Thaizing ihsin inn dang ah tthawn aw. Ka inn na san ka siang nawn lo,” tiah canganthiam cu a sim. Cumi a ttong phah ah putar cun, ballpen, hmunphiah, caiceh le hnawm retnak dip a la ih, inn leng ih ret mi hnawmbawm ih hnawm pawl cu a sun bung sal thluh hnu ah, hnawm pawl cu a ci a tthen ciamco. Cipciar zet in a tthen hai.

Minute malte a rei tikah rialno kuai them pawl cu hnawm dip pakhat ah a hranpate’n an um thlang. Cumi hnawm dip par ahcun putar in, “Ralring: Rialno kuai them an tel” timi a ngan. A dang hnawm dip ahcun, “Mi tuahmawh thei an um lo,” timi a ngan.

Tuluk canganthiam cun dawisuah a ton thutthi mi cu a theithiam lawk lo. Curuangah, “Ziangah na inn ih ka um na siang nawn lo? Rialno ka kuaiter ruangah maw?” tiah putar cu a sut.

Putar cun a lu thing phah in, “Si lo. Na thinlung sungah midang an um lo ruangah a si,” tiah a sim sal.

Mitu te ah putar in hnawm ci dangdang a tthen lai a mit rori ih a hmuh ruangah, le tu ciah ih putar ih ttongkam pakhat ruangah canganthiam cu a hmai hmuah a sen thluh.

Putar in ngaidam ding awm ngaidam in, thupi ih ret ttul mi thupi ih a ret theinak san cu a thinlung sungih midang a ret hai ruangah a si.

Hnawm dip parih putar in a ngan mi ca cu tampi tla an si lo. A kutngan tla a mawi lo. Asinan khami nganca ahkhan mawinak le duhsakawknak pawl an tel. A hman mi ballpen khal a danglam lo. Asinan hnawm dip parah putar in thupi ah ret zet ih a ngan mi cafang pawl cu canganthiam in cahnah parih a ngan mi cafang mawi zetzet pawl hnakin an tleu sawn.

Hminsin: Nine Nine Sanay ih Tuluk ca a leh mi, leh sawng mi a si.

Sianglianuk Kianghrol

(Visited 59 times, 1 visits today)

Comments

comments

Comments

%d bloggers like this: