NA NUNNAK ALAK IN CEMTER HLAH

January 2

Tlawngkai Ninga

 

Na Nunnak Alak in Cemter Hlah

 

Siar:

Seemtirnak 2:1-7

 

Nunnak a neimi hmuahhmuah in Bawipa cu thangtthat uh.

– Saam 150:6

 

Kumkhat sung Baibal:

          Seemtirnak 4-6

          Matthai 2

 

Ciarbeek malte laak in seem bang sehla, ka hmai cu hnawm le baal in a khat men ding. Asinan Pathian in a thaw a thawt tikah a nungmi, thu a ruat theimi, a tuar theimi, sunmang nei thei, mi duhdawt thiam, cithlah sawngin pungzai thei, kumkhua nunnak nei thei milai ah a ra cang.

 

Ka nunnak ka kai ngah, ka nunnak ka hum ka ti ttheu. Lehhnu ih hman dingah kan nunnak kan khawl thei lo. Atu ih kan neihmi kan nunnak hi ma nneizet ih kan hman lo ahcun kan theihnak tiangin a hlo thluh ding.

 

Pathian in Adam hnenih thaw a peek tikah nunnak lawng a pe lo, nunnak hrangih thuruat thiamnak le Pathian biak hna a thiamter. Hla phuahtu in a sim vekin, “Nunnak a neimi hmuahhmuah in Bawipa cu thangtthat uh” (Saam 150:6). Kan nung, kan tlangleng, khua ka sak thei nain Pathian sunlawinak si loin a dangih kan nunnak kan hmanmi pawl cu nunnak alak ih cemter men kan si (Tirh. 17:28).

 

Seentlung/ciarbeek cu nunnak ka pe thei lo ding na’n, kan nunnak cu mi hnemnak, hlasak ih Pathian thangtthatnak, mi rethei le minaa pawl bomnak ah kan hmang thei. Seersiamtu Pathian sunlawinak hrangah kan thiamnak, kan theihnak le kan thiltitheinak pawl kan hman asile alak in a cem dah lo ding.

 

Nunnak Bawipa, nunnak i pe aw,

Nun thar in i khatter hram aw;

Na duhmi ka duh ve theinak dingah le,

Na tuah duhmi ka tuah ve theinak dingah.

 

Ka sinak le ka neih hmuah hi Jesuh hrangah a si

Comments

comments

Comments

%d bloggers like this: