Na Neih Khalle Neih Lo Khalle Siar Ve aw! Siar A Man

10559188_663936743697408_1700628251_n
January Van

Nikhat cu hnattuannak ihsin inn ah ka tlung. Kan nu cun zaanriah a timtuah rero. Zaanriah ei ding cun a kut ka hon kai ih “to aw, thu pakhat lo sim duh ka nei” ti’n ka ti. Ka ttong/sim duhmi ka kaa in a suak lohli thei lo. Ka theihter lo asile a ttha thiam fawn lo ih ka ttong ngah suak cu asi. “Tthenawk ka duh” ti’n ka tiih kan nu cu thinheng mangbang in a um dingah ka neih na’n “ziangruangah?” ti’n neemte’n i sut lehlam! A thusuhnak cu ngaihsak loin ka um san. Cumi cun a thin a hengter ih cabuai parih chopsticks cu a hlon, “mipa na silo” i ti, cun a ttap. Cu’i zaan cu kan bia aw miah lo. Kan neihawk lai ih thu umdan a phorh suak tum ti ka thei, asina’n ziangruangah tthenawk ka duh timi thu tthate’n ka sim thei lo. Jane timi nu ka duh zo ih kan nu cu ka duh thei nawn lo. Ka zaang cu a fah ta rori!

Phuhrung aw zetin tthenawknak caa cu ka phorh ih kan nu’i kut ah ka pe. Caa sung ahcun kan inn, kan motorcar le ka hnattuannak company ih 30% thil cu na co ding ti’n a um. Cu’i caa cu zianghman ah siar loin a thlek darh thluh. Kum 10 lai caan hmangtlangmi cu midangpi ah a cang! A caan, a thazaang pawl cu alak ah an cang. Cu’i hrangah ka thin a nuam lo zet. Hmanseh ka ttongzomi cu ka khir thei nawn si lo. Netnak ahcun ka hmai ah naapi’n a ttap. Cucu a hmisabik ih hmuh dingih ka ruah ciami cu asi. A ttahnak cun tthenawknak taktak a thlenpi in ka thei.

Nikhat cu hnattuannak ihsin siimpi ah inn ka tlung. Kan nu cu cabuai parah caa a rak ngan rero. Sun ih Jane thawi’ caan kan hmannak ah ka rak baang tuk ih zaanriah khal ei loin ihkhun ka pan cih. Ka hong tthanghoi ih kan nu cu amah kelin caa a ngan rero lai thotho.

Zing ka hong thawh tikah tthenawk ding a lungkim thu i sim. Ka hnen ihsin haimi dang a nei lo na’n diilmi i nei. Cucu a cangtheitawk in nupa vekih thlakhat sung umtlang ding hi asi. A duhnak san cu a ra lai dingmi thlakhat sungah kan fapa te camibuai a nei dingih kan tthenawknak thuhla ruangah kan fapa te thinharter a duh lomi asi. Ka lungkimpi zet.

Cun, kan neihawk lai ih ka cawi lai caan tla i ruatter. Tu khalah zingtinte’ih cawi i ngen. A aa thlang maw si ti tiangin ka ruat. Asina’n kan caan hman netabiknak ding asi ruangah thlakhat sung, zingtin cawi dingih i ngennak cu ka lungkimpi thotho.

A zingkhatnak ka cawi cu kan pahnih in kan tithiam aw lo zet. Kan fapa te cun “Papa in a ttang sungah Nunu a cawi” ti’n aipuang zetin in auh ih kutza in rak beng. Cu’i aw cun ka thin i sun ngaingai. Cuti’n ihkhun ihsin innpi ah, innpi ihsin sangka phurah ka hei cawi ih ka liang kuah phah cun “kan fapa te theihter hlah maw..” ti’n dimte’n i sim. Kei khal cun ka luu ka sut ih “ummm” ka ti ve.

A ni hnihnak cu kan tithiam aw deuh thlang. Ka ttang ah a bek hlenhli, a angki rimte ka thei. A no nawn lo, a sam rawng an pawl velvi thlang, a hmai an kir thok thlang cu fiang zetin ka hmu. Cumi ihsin kan nu hi tthate’h ka zoh lonak a rei tuk ti ka thei aw ih a hrangah ziang ka tuahsuak timi ka ruat aw!

A ni linak ka cawi hi cu nupa kan sinak a rong lang. Hihi si khawh kum 10 lai ka hrang caan petu ti’n.. ni nga, ni ruknak ahcun nupa kan sinak a tthanglian sinsin in ka thei. Thlakhat timi a cem duahdo thlang ih ka cawi khalah a zaang sinsin. Ka theih ngahmi pakhat cu a ttawl sinsin ti hi asi.

Zingkhat cu ziangtlukih natnak, harnak tipawl cu kan nu in a thinlung sungah a khum/pai ding ti ka ruah ah a luu ka hei domsak. Culai ah kan fapa te a rong lut ih “Papa, Nunu na cawi caan a kim” ti’n i ti. Kan fapa te ih hrang ahcun hiti’h kan cawi-awk hi a nunnak ih thil thupi pakhat a rak si. Kan nu cun kan fapa te cu a kiangah a toter ih hngetzetin a pom. Ka zoh ngam lo ih khatlam ka rak her san hai. Ziangahtile cu’i caan malte sungah ka thin ka tthin ngah pang ding ka phang. Cuti’n kan nu cu ka ttang sungah ka cawi ih anih in ka hnawng sehvel ah a kut in i vel. Kan neihawk ni ih kan cawi-awk vek ciah cu asi!

Ni netabik ni ih ka cawi hi cu ka kekar khal an muang thluh. Asi, ziang ka tuah ding ti ka thei suak! Sangka phur ahcun ka tthum ih zamrang zetin Jane hnen ah ka feh. Jane hnenah “Jane, in ngaithiam aw. Kan nu ka tthen sallo ding. Kan neihawknak hi nin um ka ti, asina’n kan nu hi ka duh lo ruangah asilo, fatebik ihsin tumbik tiang thuhla kan ruahawk ttheu lo ruangah asi sawn. Zingtin ka cawi ih ka theih ngahmi cu kan neihawk ni ih ka cawi lai ka von ruatkir lehsal ih thihnak ih in tthen ti lo ahcun damsung ka lo kai ringring ding” ti hi asi ka ti.

Inn lam pan in pangpar dawr ahcun ka lut. Kan nu’i hrangah ti’n pangpar tomkhat cu ka lei. A zuartu nu te cun “card parah ziang ka lo ngansak ding?” i ti. “Thihnak ih in tthen tiangin zingtinte’n ka lo cawi ringring ding” ti’n ka sim.

Hni hiamhiam mithmai thawn pangpartom cu kengin inn ah ka tlung. Kan nu cu ihkhun parah a rak thi zo ka vong hmu. Thla ziang mawzat Cancer nat a rak tuar. A thi cing ding ti a thei aw! Cucing khalin kan tthenawk ding asi hmanah kan fapa te hrangah Pa duhnung ti’h i hmuh ding i duhsak. Kan caan netabik ih ka cawi lai caan pawl cu kan fapa te hrang ahcun Pasal ttha ka rak si.

Kan nunnak ah thil fate cekhrek tipawl hi zianghman asilo kan ti ko na’n nupa karlak ah a rak thupi ngaingai. Kan neihmi thilri, motorcar tipawl cu kan mit ih hmuhnak ah nomnak in pe ko na’n nupa karlak hrangah nomnak taktak mi an pe thei lo.

Minung tampi cun asung kan pek zawngah hlawhtlinnak kan thleng/hlen zik timi kan rak ruat/thei ngah ttheu lo.

Hminsin: Hi thuanthu ngantu hi hmin lang lo asi ih Snopes ih tivek asile 2004,May thla ihsin internet ih laar zetmi thuanthu asi. A tawi theibik ih ka lehmi asi.

(Visited 470 times, 1 visits today)

Comments

comments

One Comment

  1. Azaw..mailam thu theihcia sehla cuti’n ka tonglo ding nan.Lungthin a koih nasa.

Comments

%d bloggers like this: