Na Khawl Maw, Na Ret Khawm?

November 1

TlawngKai Nikhat

Na Khawl Maw, Na Ret Khawm?

Siar:

Thusimtu 5:8-17

Himi khal hi thil ttha lo ngaingai a si, a ratlam vek cekci in a kir saal hi; hna kan ttuan, thli kan dawi ih a kaih kan tum; cuti lawngih hna a ttuan hi ziangso a hrangah miatnak a um?    – Thusimtu 5:16

Kumkhat Sung Baibal :

Jeremiah 24-26

–   Titus 2

Ka pasal thawn inn le innhmun zuarnak hmun ah kan feh ih inn pakhat kan zoh. Cuih inn cu thilri in a khat ttheh ih kan mang a bangzet. Pakan le khokheng pawl cu rawl einak cabuai parah a khat ttheh. Khristmas caan ih inn ceimawinak thilri pawl in inn hmai cu a khat thluh. Mawttaw retnak cu nauhak leknak thilri pawl a peng aw riairiai. Kawzaw, mei-inn, pakan kholhnak cet, roternak cet, le bizu sungih ei in pawl tiangin zuar thluh ding ti a si. Inn neitu te hi hmun dangah an thawn aw maw? Paisa an ttultuk maw? asilole an thi maw? ti’n kan ruat rero.

Hih thil ka hmuhmi in Bible sungih, “A ratlam vek cekci in a kir saal,” (Thus.5:16) timi i vun theihter saal. Hih leitlun ah taklawng in kan ra suak ih lawngfangkheh in kan kir saal ding. Thilri kan neihmi le kan khawl reromi pawl hi caan rei lote sung daih lawng an si, an siatral thluh leh ding. “Nan lennak cu an hloral ttheh dingih nan hnipuan hlawnthil pawl hi an mawr dingih an ciamral ding. Nan sui le ngun pawl cu an tlap ttheh ding” (Jeim 5:2-3). A khawlmi pawl cu rin lopi in a hloral ih a fapa hnenah roh ding zianghman a taang nawn lo (Thus. 5:14).

Atu ah duhhamzet ih thilri kan khawl reromi cu aat hna a si. Ziangahtile nikhat ni kan thih tikah kan neihmi thilri zianghman kan keng thei lo ding. A thupimi cu Pathian ih in pekmi thilri pawl hi ziangti vekin A hrangah kan hmang, timi le kan neihmi thilri parah kan thinlungput a dik maw timi hi a si sawn. Culawngah an umnak ding hmun diktak a simi vancungram ah kan sumsaw le kan hlawnthil cu manneizet in kan khawl ngah ding a si.  – Jennifer Benson Schuldt

Hih leitlun ih kan neihmi cu,

Kan taanta ttheh ding;

Asinan Pathian hnen kan pekmi hmuah cu,

Van ah kan hmu saal ding.   – Sper

Leitlun thilri peksuahnak in vancung ah rothil in neiter.

Comments

comments

Comments

%d bloggers like this: